Noeles.net - Informazion ladina - Lites provinziales 2008: Ladins Dolomites tost enjignés

LADINS DOLOMITES: la lista dles candidates y di candidac é sen enjigneda

Prejentazion ofiziala en sabeda, ai 6 de setember, tla ostaria Cendevaves sun Mont de Pana/Santa Cristina, da les 11.00

L diretif jont de "Ladins Dolomites" laora bele da edemes per enjigné ca la lista per les lites provinziales de chest auton. Sen ésen finalmenter ruvés pro i ultims detais. Al sarà na lista plena de 34-35 persones lassoura, anter chestes 10 eles y 24-25 ei, 11 laureés de vigni sort, da primars de ospedal a enjiniers. Laprò él ence na laureeda de lingaz todesch.

Ence la data de prejentazion é sen vegnuda fisseda: en sabeda, ai 6 de setember 2008, da les 11.00 tla ostaria Cendevaves sun Mont de Pana/S. Cristina. Te chestes does edemes ésen tl laour de abiné adum les 450 firmes ti comuns che va de uega per prejenté la lista a les proscimes lites provinziales che vegnirà bonamenter tegnudes ai 26 de otober. Duc vegn enviés de jì ti comuns a firmé per la prejentazion dla lista a na moda che an arjonje tost la cumpeida de 450 sotescritours. Ence i ladins atualmenter nia aciasés tles valedes ladines à la poscibelté de sotescrive per la prejentazion dla lista, jian ti comuns de Bornech, Persenon, Bulsan y Maran. An rata de avei dut enjigné ca (lista y sotescrizions) per la fin de aost, prums de setember.


Vos ne seis nia loghé ite. [ Loghé ite ]