benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N comentar a - Ladins tl monn -
scrit ai 14 August 2008 da les 21:32:16 da noeles

Politica

"Ladins tl monn": n sit de utl o n prum reclam lital?

A la pert pro la prejentazion fova ence Bruno Senoner, president dla Lia di comuns ladins - Da canche el é president deguna iniziativa plu

Mussner à fat crié da sie assessorat a la cultura ladina n sit  dal slogan:"Ladins tl monn" (www.ladinstlmonn.org), reclamisé te chisc ultims dis alangrana tla stampa. Sce an ti ciala al sit endere se en anadàn atira che al é fat dassen en prescia con puec contegnus y chi superfiziai. An ne pò nia fé auter che sospeté che viadedò él dut de autres intenzions: se fé  valch publizité litala, tant deplù che Mussner se met enstes prum pro les testemonianzes.



Sce al vegnissa dit: "Ladins tla Ladinia" spo éssel n sens, ma i ladins tl mond n'é gonot nia plu ladins. Demé bele i ladins fora dles valedes entourn al crep dl Sela, davejin a les valedes ladines, é sforzés de dé su sia identité.  A Bulsan, a Maran, a Persenon, a Trent, duc i mutons soura i chindesc agn, sceben fis de genitours trami ladins, ti à bele out l spinel al ladin. Cheles pueces paroles ladines emparedes da pici jian con i genitours su per les valedes é la soula picera recordanza ladina destineda a morì con ei. Chesta é la situazion dla vita, ajache bele i genitours y sourauldut i nevous mess vive anter autra jent. Perchel pensé de defene l lingaz y la cultura ladina tl mond é demé na utopia.

Demarevueia é i testemonesc che se à dé ca per la prejentazion dl sit: Giorgio Moroder y Richard Agreiter. Moroder, l musizist, rejona demé plu ladin con sie fré al telefon. Richard Agreiter, l artist, é todesch con pere y oma ladins, ma ne rejona nia plu ladin. Mussner anuzeia chestes does personalités per sies finalités de reclam dl projet.

Ence l terz testemone a la prejentazion dl sit é na dreta contradizion: Bruno Senoner, l president dla Lia di Comuns ladins. Da canche al é president, é la Lia  desparida. An ne auda plu net nia. Bonamenter á el azeté de tó pert a la prejentazion dl sit per podei desmostré che ence la Lia é demé plu n organ cultural, tla speranza che ala devente na nueva Generela. De sia funzion politica, ajache ala se trata de union de ombolc y no demé de poec, musizisc' y artisc', ne auden nia.
Ma la gran contradizion dl sit, de sia volonté de crié liams anter i ladins de dut l mond, é propi chela che sibe Mussner che Senoner ne vuel nia la unificazion politich-aministrativa di ladins dles Dolomites. L sit é demé un n  "escamotaje", na vertola per fé desmentié la volonté politica, i referendums per l'anescion de chi da Souramont, n conzet nuef de colaborazion empede de unificazion. I ladins ne dess nia ti mete averda y tegnì sun la volonté politica  de ruvé adum. "That is the question"! Dut l rest é demé tentatifs de destorje la volonté dla jent.

N'autra contradizion dl sit é chela de adoré desche lingaz chel de mesaval dla Val Badia con si vedli segns de grafia. Chest desmostra cler does cosses:
1)  che an é dutaorela tla intenzion de scluje fora l ladin standard;
2)  che per ladins enténen dantaldut chi dla provinzia de Bulsan. Puecia y deguna conscidrazion per chi da Souramont  y de Fascia.

 L sit pò deventé de utl per l turism y perchel é clera la volonté de Mussner de utilisé l projet-sit per propaganda litala. Al pò despone nia demé di trueps dinés de sie partì, ma al anuzeia ence sie assessorat con sie personal per arjonje sies finalités litales. Y duc scouta? (ui)



 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 3.21
Oujes: 14


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: N comentar a - Ladins tl monn - (ponc: 1)
da Jan ai 14 August 2008 da les 13:16:58
(Infos sun l utilisadour | Ti mané n messaje privat)
Touta per se enstesa él na bona scomenciadiva. Mo ududa tl contest él ma na strategia politica. Na politica de fassada. An vuel renforzé la identité di ladins tl monn, canche l problem maiour é l endebliment dla identité di ladins tla Ladinia. Contradizions él nlonch te chesta politica. An é contra l'unité di ladins, dijan che al é oramai truep massa desferenzies, tl cajo de "Ladins tl monn" endere ciàlen ma a ci che i lieia adum. An vuel laoré soura i confins fora, ajache te na Europa unida – pèrel – n él nia plu confins, mo d'autra pert defénen i confins de Südtirol con mans y piesc.
An ne vuel nia i ampezagn prò i ladins, mo sen tòlen ite ence chisc. N zich-zach-curs che ne ruvarà iniò, na politica de “panem et circenses” per destol la jent dai gragn problems dla Ladinia.



Re: N comentar a - Ladins tl monn - (ponc: 1)
da Jandaniel ai 14 August 2008 da les 15:03:08
(Infos sun l utilisadour | Ti mané n messaje privat)
Dessegur ne ruvaràl sun chest sit dl assessorat mai n liam a noeles.net ;-))



Re: N comentar a - Ladins tl monn - (ponc: 1)
da alfadolomiti ai 18 August 2008 da les 08:56:21
(Infos sun l utilisadour | Ti mané n messaje privat)
Moroder: magari ti da scrì val inn.

Agreiter: por söes operes ti paia (à paié) la provinzia engröm de scioldi, o no?



Re: N comentar a - Ladins tl monn - (ponc: 1)
da travers ai 18 August 2008 da les 11:27:30
(Infos sun l utilisadour | Ti mané n messaje privat)
Na infrastrutura per lié adum i ladins? OK, ma chi à pa encuei debujegn de chi: i ladins dl mond dla Ladinia o vizeversa? La scomenciadiva de Mussner l desmostra avisa: al é Mussner che adora y anuza G. Moroder per se fé reclam lital y no Moroder per reclamisé sia mujiga.



Re: N comentar a - Ladins tl monn - (ponc: 1)
da Jandaniel ai 18 August 2008 da les 11:29:37
(Infos sun l utilisadour | Ti mané n messaje privat)
A Alfadolomiti: no Agreiter ti à scinché dut al museum ladin, zenza pretene na lira (o n centeisem encuei).



Re: N comentar a - Ladins tl monn - (ponc: 1)
da christian ai 18 August 2008 da les 14:40:35
(Infos sun l utilisadour | Ti mané n messaje privat)
iu mo ponsi che l' iniziativa "Ladins tl monn " sides na bela iniziativa.



Re: N comentar a - Ladins tl monn - (ponc: 1)
da Jandaniel ai 18 August 2008 da les 17:10:53
(Infos sun l utilisadour | Ti mané n messaje privat)
Empermò l temp dijarà, sce al é valch de utl y funzional per i utilisadours de chest servisc.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.401 seconc