benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Fascia: lites provinziales 2008
scrit ai 09 August 2008 da les 21:42:52 da noeles

Politica

La UAL: degun partit ideologich, ma de abineda

Entourn al ex-conseier dla UAL se formeiel n grup politich de "zenter dreta" che podessa ti fé concorenza a la UAL pro les lites de chest auton

La Val de Fascia é n certl lital per sie cont y pro les litazions végnel lité 1 n raprejentant ladin asseguré tl consei provinzial. Enfin a sen ova duc i candidac abù lerch sun la lista dla "UAL" (Union Autonomista Ladina). Chest podessa se mudé pro les proscimes lites provinziales de chest auton. N grup entourn a Emilio Talmon y l ex-conseier dla UAL, Gino Fontana, laora per mete su na lista de "zenter dreta" en contraposizon a la UAL che ai rata massa pro l schierament de zenter ciancia. Contra chesta "scemplificazion" tol sen posizion n grup "Union y comunanza", sostegnidours dla UAL y esponenc dla Union di Ladins de Fascia.



L grup dij: "Nos constaton che l obietif dla lista de Gino Fontana per les litazions provinziales de otober, anunzié a gran ousc (L’Adige di 4 de aost) é chel de “fé vence l zenter dreta a les provinziales”. Posizion legìtima, samben, che aboncont é daldut subordeneda a logiches politiches che é aldefora y dalonc da la comunanza ladina: al someia beleche de jì deretourn tl temp, canche i “notabli” fascians se dova les mans dentourn per sostegnì chest o chel auter partit, per emprometudes o plajeis clientelars. Aboncont les declarazions de Fontana à sce no auter l merit de ester cleres: sia lista se paleseia desche “la assoziazion di Ladins de zenter dreta”, y dachelenvìa se métela dant de ti porté demez l scagn fascian a l’Union Autonomista Ladina, l “nemich” da bate. Ence chest é legitim, i son en democrazia. De chel vers, còntel puech sce l candidat plu emportant dla lista “Fassa” é sté president dla UAL, candidat y conseier provinzial metù su apontin dal moviment ladin e lité dal zenter ciancia trentin: na outa mudé bandiera, la UAL deventa sen l aversar, l campion dl auter schierament, l’esprescion di “ladins de ciancia”, la seponta de Dellai y dut l rest. Scemplificazion saurida y de utl tl contrast lital, ma la chestion ne é nia propi enscì.
L’Union Autonomista Ladina ne enten nia raprejenté i “ladins de zenter ciancia” y souraldut ne enténela nia fé vence l’una o l’autra coalizion en liza. Chesta vida de pensé, de pert y ideologica, ne ti pertegn nia al DNA dl moviment politich ladin: l’Union Autonomista Ladina é nasciuda del 1982 per mete adum i fascians, sourafora les ideologies y les desvalivanzes politiches, entourn a n obietif comun, chel dl “rescat” de na comunanza sofoieda massa die alalongia, tegnuda tla sudizion y tl’emarginazion propi a cajon de sie peis politich daldut mender, per l fat de ester na comunanza nia demé picera de numer, ma ence despartida te fazions desferentes.
Te chisc ultims 25 agn é la UAL steda bona de mete adum les forzes mioures dla val, de revendiché degnité per les mendranzes linguistiches enfin enlaouta meltratedes, de mete en pé endodanuef tla comunanza n sentiment de partegnuda, de davagné n rodul politich y istituzional per la jent ladina de Fascia, desche pert dla comunanza ladina dles Dolomites, y nia da ultim de mete dant n projet stabel per l davegnì dles generazions joenes. Y dut chest de gra al empegn de oms y de femenes che à lascé da na man sie orientament politich, sies preferenzes ideologiches, sia colocazion partitica, per ti jì do al obietif dl “Ben Comun”.
Valch un – per tournacont – dij che la Ual à abù sie temp? Al pò ester, al sarà i litadours, al sarà i fascians a l dezide. L'Union Autonomista Ladina se prejentarà al apuntament lital forta de sia storia y de si valours, y ala ne arà nia debujegn dl sostegn de degun partit politich trentin, no de dreta, no de zenter, no de ciancia. Ma souraldut se prejentaràla ai litadours con idees cleres y con projec concrec, ispirés a la solidarieté, al spirit comunitar, al sentiment de identité y de partegnuda, a na doura mesureda dles ressurses, valours che fej fora l'arpejon plu auta de nost passé y che podarà ti asseguré, demé ei, n davegnì degnitous a nosc fis."
Al é te chesta direzion che ala jirà la proponuda litala dl’Union Autonomista Ladina, y i ti lascion gen a d'autri les polemiches de pert, les chestions ideologiches y i contrasć de partit che ne nes partegn nia.
Ai 26 de otober la endesfida te Fascia ne sarà nia anter Dreta y Ciancia, anter i sostegnidours de Dellai y chi de Divina; al sarà da cerne anter chi che vuel TEGNI' ADUM i fascians y chi che vuel i DESPARTI', anter chi che vuel servì l “Ben Comun” y chi che se met al servisc de enteresc de pert, anter chi che vuel fé vence n schierament y chi che vuel fé vence la Val de Fascia."

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.366 seconc