benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La campagna litala é pieda via
scrit ai 24 July 2008 da les 18:55:40 da noeles

Politica

Na pruma roda de seires de informazion

La campagna litala de Ladins-Dolomites sarà scempla y "lesiera"

Pro la pruma roda de seires de informazion de "LADINS DOLOMITES", en mertesc ai 22.07. a Urtijei y en mercui, ai 23.07. a San Linert, en previjion dles lites provinziales 2008 da d'auton, àn chirì l confont con l publich. Te Gherdeina fòvel truepa jent, a Badia n pue demanco. La serada à metù man con la prejentazion dai movimenc, empruma da pert de Marco Pizzinini per JLD, spo da pert de Adi Demetz per la LL.



Duc a una sun la prerogativa che al vuel ester la coalizion, sce an vuel avei na poscibelté da mete ite n secont ladin a Bulsan. La situazion politica atuala ne é nia scempla: chesta outa él ence trueps ladins che candideia per autri partís. Chest podessa gaujé n gran spidiciament de oujes y a Bulsan ne ruvàssel degun secont raprejentant ladina, ajache i candidac sun les autres listes é al plu apeia-oujes. Valch candidatura é ence da valuté plu desche n fat de protagonism personal y ne é dessegur nia massa bona per la gauja ladina.
L travert é da unì jent ence con deplù pensiers politics per porté inant i debujegns dla jent ladina sun l ciamp enonomich, sozial, cultural y linguistich. Sun la lista "Ladins Dolomites" pò candidé ence persones de autri grups linguistics che é samben benvedus. Tla pruma pert él spo ence vegnù prejenté l simbol deberieda per les lites "Ladins Dolomites" con souracà l emblem de JLD y sotvia chel dla LL, ma unis te n soul simbol.

I doi candidac piza, Pepi Dejaco y Ulrica (Ica) Goller à spo splighé les motivazions y i traverc perciodì che ei se à metù a desposizion. JLD, enscì Dejaco, ti dà dret na gran emportanza che sun la lista él jent dla aministrazion comunala, anter chisc dantfora el, che é entratant da 26 agn te comun y che tol ite dutaorela ciamò d'autres enciaries emportantes tla aministrazion publica. Pepi Dejaco se darà ju con i problems dla jent da vigni di, ma samben ence con l ciamp cultural y linguistich y la colaborazion anter les valedes ladines.
Per cie che reverda l lingaz unitar él da di che tert o adora messaràl vegnì fat valch de concret respetan i idioms de valeda. Al vuel ester n lingaz scrit unitar souradut per la aministrazion publica y per les istituzions per i contac anter eles; al basta pensé che la Lia di Comuns ladins, che à fat enfin a sen scialdi puech, dà fora i comunicac y les deliberes per talian (!!). Ence p. ej. sun la cherta d´identité dla jent ladina de Sudtirol podéssel vegnì metù su la scrita ladina. Samben voléssel ester per chest na scrita unitara y nia una per gherdeina y l'autra per badiot de mesa val.
Dejaco é ence ju ite sun sie temp pro la SVP, olàche él à dagnora cialé da laoré coretamenter y con coerenza dijan ence valch cossa che ne ti plajova nia massa a si compagns de parti. Per cie che reverda n parlamentar ladin él vegnù empermetù dagnora truep ma i ladins à dagnora messù se contenté dl cuart post. I ladins á messù y mess dutaorela sté zeruch can che ala va da corí enciaries autes. Chesta é na cossa che mess se mudé.

Ica Goller à conté de sies ativités tl ciamp sozial y per la jent andicapeda. Ela se darà ju per daidé la jent sun l ciamp sozial, per les families y per i derc dles eles. Ela ne é nia a una con l feminism a les stremes de valch raprejentanta politica. La politica dess daidé cheles omes che volessa sté a ciasa pro i mutons, ma mess ji a laoré per la tré inant. I mutons che à la fortuna da avei les omes a ciasa à manco problems can che ai é gragn.
I candidac ladins, enscì Ica Goller, é dessegur bogn da fé na politica che va ben ence per dut Sudtirol.
Al é spo ence vegnù rejoné cotant da ti dé la poscibelté a les families joenes da se fé n alberch, da ciafé poscibeltés da limité l marcé dles abitazions a folestiers, da cialé en prumadedut a la jent ladina.
Sibe a Urtijei che a Badia él sté dedò na discuscion animeda, olàche truepa jent à podù dì la sia y porté dant propostes. Al é vegnù prejenté i autri candidac che met man da vegnì tres deplù. Samben se aòden la colaborazion de duc y poester él ciamò valgugn che se met a desposizion per na candidatura.
La iniziativa litala veid che la coalizion anter JLD - LL é benveduda da truepa jent. La jent se ghira unité y traverc clers. Se mete a desposizion é na cossa plu zitia, ciodi che dé chest vare ti fej avei tema a truepa jent da vegnì penaliseda a valgamoda tl davegní can che ela podessa adoré valch da la aministrazion publica.
Nia duc ne é contenc che na pert de ladins vuel se raprejenté enstesc, mantegnan de bon raporc con duc chi partis, che sostegn nosta mendranza. An auda ence critiches che dij che i ladins é melcontenc con dut cie che ai ciafa. "Ladins Dolomites" arata che ai ladins ne ti végnel scinché nia, ei laora i paia coutes desche duc. L'economia dles valedes ladines é bona. La jent de nostes valades paia dessegur plu coutes de cie che vegn derevers desche contribuc y sostegns da pert dla man publica.
L laour per i movimenc JLD y LL é dessegur bendebot gran. Ma sce duc crei tla cossa y é bogn da di trasmete a la jent les motivazions con otimism podéssela poester garaté.
Ence i mesi finanziars per la propaganda é rers. An sà avisa cie gran somes che valch candidac de autri partis pò spene y che chestes speises toma spo samben a la fin endò n iade sun i paia-coutes. La campagna litala de "Ladins Dolomites" sarà de chest vers scempla y "lesiera".
Per la campagna litala él ciamò prevedù de autres seredes te duc i paisc de Gherdeina y Badia y samben ence foradeca tles majeres zités dla provinzia olàche al viv ladins.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.33
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.415 seconc