benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N comentar sun i ultims svilups politics
scrit ai 06 July 2008 da les 21:37:29 da noeles

Politica

La unité di ladins é na cossa sceria y nia da ostaria!

Sce Costa dij sen de ester dagnora sté n vert, spo desmòstrel de avei demé azeté de fé l president dla Generela per avei n ciar da se fé reclam

La dreta revoluzion à metù man con l resultat positif dl referendum de chi da Souramont. La discuscion s’à mudé, l rejoné é garaté concret, l conzet de "unité di Ladins" à ciafé na forma, n sostegn real tres la consulta di comuns da Souramont y tres l comité di "Amisc dla unité ladina". Da ultim n auter gran vare inant: l Moviment politich "Jent Ladina Dolomites" y sia dezijion y coraje de se prejenté deberieda con l Moviment politich "Lista "Ladins" pro les lites provinziales da d’auton. Les tratatives per ruvé a chesta alianza é stedes ries, ma l obietif "Unité di Ladins" ti à dé dessegur na bela sburla.




La jent ti sta do con coriosité a duc chisc avenimenc y ala à vedù ite ch’al è valch danuef che se muev. Da aprijé y da laudé la touta de posizion dl ombolt da San Martin, Pepi Dejaco, tl vers dl moviment "Jent Ladina Dolomites". Dejaco se merita n laut y les mioures aodanzes de n bon suzes lital. Sie laour é daspavent rie: desmostré d'ester bon de mantegnì i contac con la Svp d’origen y smendrì l sens de oposizion de Lista "Ladins" per envié via na colaborazion politica nueva, con duc i partis tla region Trentin-Sudtirol. Al mess ti tò a Forian Mussner l'idea che l’alianza Jent Ladina Dolomites y Lista "Ladins" fej demé oposizion y ne vuel nia colaboré, depierpul féjen dles dutes per colaboré tla speranza de podei vegnì conscidrés tl temp na "Svp autonoma ladina de serie "B". I ladins dess vedei ite chest sforz nuef che é dant man. Enfin a sen ne pòn propi nia dì cie che la "Lia di Comuns ladins" fej y coche ala se ouj tl vers dla unité di ladins. President de chesta Lia é n gherdeina, Bruno Senoner, che ne meina dessegur nia do y ne sburla daldut nia acioche valch se mueve. En pert pòn ence capì. Ajache la Lia di Comuns é n organ politich y perchel ne vuelen nia se ficé ite.
Misterious é l comportament dla Generela. Éla pa ciamò en pé? Sie president se dà ju dassen con les Maratones dles Dolomites y chilò ál dessegur arjont valch bon resultat, desche fé conesce les Dolomites tres la "Direta televisiva", ma tla Union Generela él te chest moment plu vera che pesc. L'enciaria de president é steda per el plu na ocajion de personal-show che de organisazion y de svilup dla Union. Encuei vuel dì "Generela" la Usc di Ladins y dutes les problematiches relatives reverda souraldut l'archirida de finanziamenc. Ti confronc dla Jonta da Bulsan àla plulere fat vegnì i raporc plu sclec. N valgugn articui dl president, vegnus fora ti media todesc y talians, é jus zenz'auter sourafora, é stés de massa. Al pò critiché liberamenter, ma degugn ne pò critiché el zenza ne se ciafé nia na drameda da si amisc. Al é ben veir che l president à laoré debant y con na certa astrologia, inventiva personala, souraldul ledia, deslieda da prescions politiches, ma l resultat general é n faliment, desche la fin de sie mandat l desmostra. Al à tout pert a la discuscion per la fondazion dla lista "Jent Ladina Dolomites" y "Ladins" y sen s’en mùcel jian con i Verc. Al se desmostra dassen vedl ajache al clama ciamò chest partì i "Verc", encandenò ései plu cuecens di cuecens. Bele l vedl president Andreotti dijova che i Verc é desche i fajuei: ei nasc verc, ma ai deventa cuecens. Pro les ultimes lites parlamentares é i Verc jus enfinamai con "Rifondazione comunista": plu cuecens che enscila ne él nia meso. Resultat: ai n’é nience ruvés te Parlament, tant grana é la creta che la jent à te ei. I Verc é n mescedoz y la desmostrazion vegn propi dal president dla Generela. El enstes dij de ne volei nia plu audì rejonan de "etnies". Todesc, talians y ladins, duc unfat, duc con la medema ciameija. Te chestes condizions n’à pa nience plu n sens la Generela enstessa. Sce al se à tresfora sentì vert con chestes idees, spo àl propi demé azeté de fé l president dla Generela per avei n ciar aposta da se fé reclam. Al pò s’en jì liberamenter. L'unité di Ladins é na cossa sceria y no demé da ostaria. (ui)

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 3.75
Oujes: 44


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc