benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Jent Ladina Dolomites: storia, refondazion, simbol
scrit ai 01 July 2008 da les 21:30:42 da noeles

Politica

La refondazion de Jent Ladina Dolomites

La raprejentanza di ladins é resteda debla, tla provinzia de Bulsan enfinamai sot a sia consistenza numerica

La storia
Desche l referendum ti trei comuns de Souramont é sté la coronazion de na aspirazion che i Ladins n’à mai arbandoné dal 1945 encà, é ence steda la refondazion de “Jent Ladina Dolomites” n vare che nasc y che à sies raijes tla storia di Ladins. Foto: refondazion de Jent Ladina Dolomites (enlaouta Zent Ladina Dolomites) ai 28 de auril 2008 a Corvara.





Anter l 1946 y l 1948 él sté atif l moviment politich “Zent Ladina Dolomites”, metù su da persones de dutes 5 les valades ladines y con l sostegn y la colaborazion dla SVP per ester l partì de racoiuda de duc i Ladins (al à arjont plu de 12.000 iscrizions te puec meisc). A gauja dles oposizions politiches dl temp, souraldut da pert taliana, ne à “Zent Ladina Dolomites” endere nia podù arjonje sie fin prinzipal, chel dla reunificazion de duc i Ladins tla Provinzia de Bulsan. Entratant à i Ladins fat de gran varesc. Souraldut tla economia turistica, ma ence te trueps d’autri ciamps (laour da paur, artejanat, scola y cultura ecc.) ài arjont n livel aut, reconesciù lonc y lerch. Demé sia raprejentanza politica é resteda debla, tla provinzia de Bulsan enfinamai sot sia consistenza numerica (i Ladins fej fora l 4,36 % dla popolazion de Südtirol, ma sie soul aconsiadour garantì fej fora demé l 2,86% di 35 membri dl consei provinzial). L ejempl storich dla SVP desmostra che n partit de racoiuda pò avei de gran vantajes per na popolazion. L partit de racoiuda ti dà la poscibelté a deplù idees politiches de rejoné con la forza de na lista sterscia, empede se spidicé su anter deplu listes. Prest vigni lista che candideia per les lites provinziales à ence sie candidat ladin. Jent Ladina Dolomites volessa endere tegnì adum chestes forzes. Perchel ciafa lerch te sies files persones con pensiers politics desvalifs, ma che à sciche prum travert chel de mantegnì, valorisé y de garantí l souravive de nosta mendranza ladina dal pont de veduda linguistich, cultural, sozial y economich.


La refondazion
“Jent Ladina Dolomites” é vegnuda refondeda a Corvara en lunesc 28 de auril 2008 da 23 persones en raprejentanza de dutes 5 les valedes ladines. Prejenc y firmatars dl at de refondazion fova ence Adriana Ghedina Fraio (Anpezo/Desproch), muta dl prum president dl partit dr. Sisto Ghedina Fraio, y Ronny de Bigontina (Anpezo), nevou dl prum secreter Sisto de Bigontina.


L’organisazion
L’organisazion de “Jent Ladina Dolomites” preveid trei sezions autonomes aladò di confins provinziai, che à deberieda i ponc prinzipai dl program, ma che à duta l’autonomia per cie che reverda i problems spezifics de sies valades. Al é l prum iade dal 1948 encà che al nasc n moviment politich che vuel tegnì adum y laoré per duc i Ladins dles Dolomites.
La sezion “sudtiroleisa” de Jent Ladina Dolomites é vegnuda metuda su da Marco Pizzinini (Al Plan), Albert Pizzinini (La Ila/Persenon), Lois Craffonara (Bornech), Cristian Ferdigg (Al Plan), Albert Palfrader (Al Plan), Giovanni Mischi (Longiarü) Paul Videsott (Al Plan), Pepi Dejaco (San Martin) y Ivan Lezuo (Fodom/Bulsan). Responsalbel dla sezion é vegnù lité l dr. Marco Pizzinini. La sezion "trentina" é vegnuda metuda su da componenc dl’Union di Ladins de Fascia y dl’Union Autonomista Ladina: Bepe Detomas (Poza), Antone Pollam (Vich), Fabio Chiocchetti (Moena), Lucia Gross (Poza) y Silvano Ploner (Cianacei). La sezion “beluneisa” é vegnuda fondeda da Ugo Ruaz (Renac), Daniela Templari (La Plié), Oskar Troi (Col), Elsa Zardini (Anpezo), Ronny de Bigontina (Anpezo) y Siro Bigontina (Anpezo). Chesta sezion ti dà na importanza particolara da avei de bogn contac y n bon raport con la SVP, sie prum partner per la reunificazion di trei comuns de Souramont tla provinzia de Bulsan. Tla chestion dles lites te Südtirol ne se mescedaràla nia ite.


L simbol
L simbol de “Jent Ladina Dolomites” é na bandiera ladina con 5 steiles y l’eguia de Tirol laite. Les 5 steiles raprejenteia les valedes ladines dl Sela y la eguia/l variuel de Tirol dess mostré la volonté da ruvé endò duc adum. “Jent Ladina Dolomites” sourantol la bandiera ladina dal simbol de sie predezessour “Zent Ladina Dolomites” lian ite la eguia de Tirol, enfin al 1918 daciasa de duc i ladins dles Dolomites. Duc i ladins adum é ence un di obietifs de Jent Ladina Dolomites encuei.
La bandiera ladina é nasciuda ai 5 de mei dl 1920 canche al se ova abiné sun jouf de Frera 70 raprejentanc dles 5 valedes ladines, gherdeines, badioc-maroi, fascians, fodoms y ampezans, per protesté contra la niazion dl dert de autodeterminazion y dl reconesciment desche grup etnich ladin da pert dla Talia. L sfuei "Der Tiroler" reportova enlaouta: "Te chesta ocajion, canche duc chisc raprejentanc fova abinés sun Jouf de Frera tl chiet dles belezes de sies Dolomites, vedòvei tant brum che sie ciel fova, tant blancia y adorbenta che la neif se destenova sot a si piesc y tant scurs-verc che i peceis fova tles vals dessot. Te chel moment savòvei che chisc y degugn d'autri fova i colours dés dant al popul ladin: brum-blanch-vert!"
En gaujion dla candidatura pro les lites te Südtirol vegnirà l simbol ciamò integré con l logo dl Moviment Politich “Ladins".


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.14
Oujes: 14


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.405 seconc