benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

L Trentin à na lege litela neva
scrit ai 12 November 2002 da les 22:17:05 da noeles

Politica

 

La provinzia de Trent à na legia litala nueva

Intervista al assessour Fontana sun les chestions ladines

de Riccardo Zanoner

Instadì, più avisa en vender ai 8 de november, l Consei provinzièl de Trent l’à aproà sia neva lege litèla. La maoranza che à sostegnù chesta neva sort de litazion la è stata de passa i 2/3: 24 dapro, 2 zedoles biences e 5 de contra. La lege la jirà en doura ofizialmenter, se nisciugn chiamarà ite l referendum, te trei meisc e donca de november de l’an che vegn jiron a dèr la stima con chesta neva modalitèdes.



L’idea del referendum la resta aboncont semper amò averta, ma endirao col fat che la lege à abù la maoranza califichèda, apontin i 2/3, da pèrt di conseieres no l’è più permetù l domanèr; la soula possibilità la pel vegnir diretamenter da la popolazion olache però se cognessa ruèr a tor sù 25.000 sotescrizions.
Per l conseier ladin l’è vegnù garantì l post te consei aldò de la modalitèdes jà pervedeudes te la “norma transitoria”, e donca vegnarà lità chelun o cheluna che ciapà l maor numer de stimes personèles te la lista più litèda te Fascia. L’era apontin chest l’obietif de nosc conseier Fontana ence se se cogn dir che no l’è stat tant sorì el mantegnir te chesta foja. Zachei enfati, più avisa PATT e LEGA NORD, desche jà dit ti meisc passé , i aessa volù na lege olache l conseier ladin fossa stat nominà demò aldò del numer de stimes personèles, zenza tegnir cont del resultat de la lista.
Apede chest, la neves de maor emportanza l’è la litazion direta del President te na soula tornèda, nia più donca balotaje, e la possiblità per l president de se nominèr fin a trei assessores da foravia. Autra neva l’è na forta distinzion anter legislatif e ejecuitif determinèda più avisa da l’incompatibilità anter l’encèria de conseier e assessor. Co la legislatura che vegn enfati se un conseier doventarà assessor no l podarà più fèr pèrt del consei.

Domanon fora a nosc raprejentant Fontana sia imprescions en cont de chesta lege.

Che pissède pa de chesta neva lege litèla per la Provinzia de Trent?
FONTANA: Cogne dir che timpruma no cherdee che chest consei l fossa bon de ruèr a se dèr na neva lege litèla. Aldò di raporc politiches enfati chesta legislatura à desmostrà che col sistem atual l’è zis senester lurèr e fèr legi da tant. En verità enveze l’è sozedù che per chesta reforma se à creà n schierament descheche se disc trasversal e per chest fat se è stac bogn de ruèr a licenzièr chesta neva lege. L’era ampò enteress de duc aer na riforma litèla bona de schiarir la situazion politica locala e soraldut bona de portèr e garantir n goern al Trentin.

Dijede che chesta lege la posse ge garantir na dreta goernabilità a la Provinzia de Trent?
F: Da me en fora chesta lege l’è n vèrech inant per ge dèr na impostazion politica più moderna e dinamica al Trentin, ma n muie sarà da fèr ence a livel de legislatif, l’organ chiamà a fèr e licenzièr la leges. Chiò enfati aon n regolament che ge lascia gran lèrga ai partic de opojizion e se chisc i se emponta i pel ferèr de bel o adertura no fèr nience passèr na lege. No l’è segur chest l spirit democratich de n organ legislatif. Co la neva reforma aboncont i schieramenc i vegn prejenté jà dantfora, chi che venc a n vadagn de maoranza che l va da n minimum de 18 a n maximum de 23 conseieres con en più l President. Chest portarà se no auter a aer na maoranza segura. Se mencia la maoranza o vegn a mencèr la fiduzia tel President, sozet che l consei entriech vegn demetù. Amò apede i assessores no podarà più fèr ence i conseieres e donca i doi organs istituzionèi de l’ejecutif e del legislatif i vegn despartì fora avisa con si doveres e si oblighes.

Ne podede dir zeche de olache la è ruèda Voscia proponeta de lege litèla?
F: Mia proponeta no l’aea na gran valuta dal pont de veduda del contegnù, chesta la jia dò la “norma transitoria”; l sistem con vadagn de maoranza. Chesta formula la era valiva che chela di etres doi proponenc Dellai e Leveghi e per chest, amò ti lurieres de la comiscion, l’è stat lurà fora n soul test de lege che à binà adum duta trei la propostes. Aboncont ge tegne a dir che la rejons più emportantes che aee metù dant les à troà dutes so post tel test definitif. Recorde ence che inlouta aee portà dant mia lege per n obietif politich ben chiar, che l’era dandadut chel de poder tor pèrt de persona ai lurieres de la comiscion, ence se no fajee pèrt de chesta.

Colune él la rejons più emportantes per nos ladins pervedudes da chesta neva lege litèla?
F: Ben dandadut ge tegne a dir che no duc vedea polito el descors del raprejentant ladin lità te la foja coche à semper domanà la UAL e che la perveit la nomina de chelun che ciapa l maor numer de stimes personèles delaite de la lista più litèda ti comuns de Fascia. En particolèr jà te comiscion i conseieres Panizza del PATT e Divina de la LEGA NORD i volea fèr passèr la foja del raprejentant che ciapa l maor numer de stimes personèles, zenza tegnir cont de la lista. Enlouta è cognù entervegnir con forza per fèr entener l’importanza e la dificoltèdes de portèr inant la soravivenza de na mendranza linguistica, demò na politica de val enfati e de conleament dret anter la comunanza e l conseier ladin, zenza filtres de partic politics da fora, pel ruèr a svelupèr propostes e lurieres al ben de la soravivenza del lengaz e de la comunanza de mendranza.

Apede chest la neva lege la perveit ades avisa l’assegnazion de competenzes en cont de mendranzes linguistiches a n assessor. Chest vel dir donca che tel davegnir la mendranzes del Trentin les arà, apede a n referiment aministratif dat da l’ofize aposta (l servije metù su con la L.P. 30.12.1999 nr.4), ence n referiment politich dat da n assessor. Sul pian politich ades la mendranzes del Trentin les à n so post te l’ejecutif , na competenza spezifica, n tratament descheche l’è pervedù te la provinzia de Busan. Amò apede aon n’autra neva da me en fora veduda desche na gran ocajion per nos ladins che la vegn cà da la neva incompatibilità anter l post de conseier e assessor. Se l raprejentant ladin enfati l’aessa da doventèr ence assessor, te Consei provinzièl cognessa tor so post l secondo che à ciapà l maor numer de stimes personèles de chela medema lista. N doman podessa sozeder donca che Val de Fascia l’aessa doi raprejentanc istituzionèi a livel provinzièl; un te la Jonta e un te Consei. Amò apede l raprejentant ladin del Consei provinzièl, a livel regionèl l pel aspirèr a doventèr o assessor regionèl o vize-president del Consei regionèl. Chisc neves aspec i ne consent amò n auter vèrech inant, l se trata de n vadagn de gran emportanza per la comunità de Fascia e per duta la mendranza ladina de la Region Trentin - Südtirol.

Che reazions èla soscedà chesta reforma?
F: La reazions negatives più pesoches les è vegnudes cà da la LEGA NORD, dal PATT, e dal CENTRO. Ic i se à semper batù per l manteniment del proporzionèl e no i à mai volù azetèr l sistem de la litazion direta del President col vadagn de maoranza. Etres che se à lamentà l’è stat la femenes del Consei che les volea na resserva per la eles, la “quota rosa” del 50%, e na pèrt de conseieres che aessa volù la doi tornèdes empede che una soula. N cert mèlcontent l’è vegnù ence da Dellai canche l’è passà l’articol che à metù l’obligh de demiscions per i candidac che i è ombolc de chi comuns con passa 5.000 abitanc.

Che perveidel ades l’iter?
F: Ades la lege la doventarà ofizièla te trei meisc e la vegnarà metuda en doura per la pruma outa de november de l’an che vegn. Resta avert l problem del referendum ma ajaché la lege l’à abù l’aproazion califichèda di 2/3 del Consei, ge volessa ben 25.000 sotescrizions e chest me sà che l’è piutost rie.

Cai éi i lurieres che Ve speta ades?
F: Ades cognaré vardèr dò la lege leèda con chesta reforma e che la revèrda l referendum. Ence chiò enfati ge volarà cerir la dreta foja che miec carenea acioché la mendranzes linguistiches del Trentin posse tor pèrt diretamenter a la vita politica provinzièla. Recorde che la leges de maor emportanza per la defendura de la mendranzes te la Provinzia de Trent les è states fates col derit de scomenzadiva popolèra, n derit portà dant apontin dai fascegn de grazia a particolèra normes a favor de noscia mendranza.

Aede pissà a zeche ence per Vo personalmenter?
F: Mah, vedù che la lege litèla la è jita tant ben e se autertant ben va ence la lege sul referendum, peisse che a la fin de chest meis me tolaré do-trei dis per jir a me fèr l cors de ajornament de maester de schi.

Develpai per l’intervista.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.75
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.363 seconc