benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lista Jent Ladina Dolomites-MP Ladins
scrit ai 19 June 2008 da les 19:36:34 da noeles

Politica

La lista ladina: despartéscela o unéscela?

N comentar de Carlo Willeit sun les ultimes noveles stampa en cont de lista LADINS-JENT LADINA DOLOMITES

I ladins auda adum y se met adum; nia valch plu de normal y de dret, ma per la contrapropaganda vuel dì chest sforz da tegnì adum cie che auda adum, despartì i ladins. Clera é la filosofia dovia: i ladins pò ester unis y pò ester ladins, ma sot a n ciapel forest!



 

„Nos – Svp-provinzia-stat- ti on dé dut ai ladins!„

él vegnù dit, ma nos messon respone: „ la liberté da lité deberieda y per nos nò n iade y chel é cie che na mendranza adora l plu, la organisazion sozio-politica te sies mans!" Sce i conscidron demé l pan desche dut (duc dij che al n'é nia dut), spo messonse dì che i ladins se l à paié y se l paia bon cer tres sie laour, sies coutes, sie contribut inteletual y material al svilup dla sozieté. Stredes, istituc, teatri y museums à ence i autri grups tamben y ence deplù y dantadut de cers tratant che per na Cesa di Ladins a Urtijei ne él nia meso da deslocré n pice contribut. La valivanza culturala, tres endò reclamiseda a chi che vijiteia l'autonomia, é per i ladins agn dalonc da sia dreta mesura. Al basta conscidré la adoranza dl ladin y sia lerch ti media, tl radio y tv publics, ti foliec y te d'autri mesi moderns de comunicazion.Les rejons fondamentales dla mendranza, la unité politica y soziala, la sconanza dl lingaz, la dreta raprejentanza politica y aministrativa, la dreta partezipazion al laour, ai benefizes dla ciasa, dl stude, dl progres cultural enstes, à n gran debujegn da vegnì renforzedes y controledes dai ladins enstesc.

 

I ladins ne é nia trei petleri che speta che an ti dae, ma na popolazion che à sies rejons y che ghira l sie!

L confront che é vegnù fat per dì che un ne pò nia tl medem temp ester pro n partì ladin y pro la SVP ne tegn ben nia demassa y fej ence n pue de confujion confescionala. Enfin a dant da puec agn ne à i ladins endut nia abù l'ocajion da se organisé te n partì ladin. L partì ladin é la unica strutura per ti dé esprescion sozio-politica a la jent y a la mendranza ladina, n dovei per chi che à a cuer la cossa ladina. Fossa poester i ladins plu dlongia a se enstesc pro i protestanc?

 

La lista ladina nueva: JENT LADINA DOLOMITES/LADINS

La lista nueva à l fin cler da unifichè i ladins y tl medem temp da i liberé y renforzé politicamenter; na unité culturala é na bela cossa , ma ala ne cleca nia per fé na comunité soziala che à sie dret peis politich che é a la per y vegn respeteda dai autri. Perchel vàl debujegn da se de dé fa en pruma ligna con nostes massaries, con nosta lista. Nost travert ne nes meina nia contra zachei ma và adencontra ai ladins y sie davegnì; i ne saron nia da soui, ma i ciafaron ence de chi che nes deida senziermenter cialan di problems concrec dla sozieté entiera. Desche garanc de na mendranza onse l dovei da sconé nia demé sies rejons politiches, de lingaz y cultura, ma ence la tera olàche i vivon, i bens dla natura, l laour y l davagn di laoranc y dles impreises con mesures concretes che vegnirà metudes adum te n program aposta. Gran emportanza arà per nos na aministrazion reidla y daverta adoreda per la segurté y i servisc soziai y nia per arichì persones y lobbies politiches.
Carlo Willeit


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Baudi ne él dantman degun comentar per chest articul.
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.388 seconc