Noeles.net - Informazion ladina - L'ert y l amour: liber te trei rejonedes

Poejies y depenc enlumineia y descriv l amour

Erotism, amour y filosofia, ai 20 de jugn la prejentazion a Eppan - Sensazions y colours straordinars te n liber particolar

Passa cincanta depenc acompagnés da tesc' te trei rejonedes, deura n paragraf nuef tla leteratura ladina. L'idea é orida dal artist Peter Hiegelsperger de Prissian deberieda con Nicoletta Montel de Bulsan. N liber che tres chedri y poejies desdramatiseia y naturaliseia la vita armoniousamenter sessuala anter pers.

Sensualité, amour, ma ence delujions, mueies y sté ert. De gran sensazions dl vignidì ilustredes y descrites tres colours, formes y tesc', metus adum da n grup de laour enteressanta. L avei gen; dé amour y giapé amour, é na cossa bela, dejidereda y aprijeda da duc y da lonc ti agn. Nia demé l cialé fora, ma ence l dedite, l spirt y l cuer dess avei na pert emportanta te n raport de per. Da nia ascone él che ence la sessualité fata con redleza, amour y stima à na sia funzion y fazion emportanta tla vita. L mond imens y labirintal dla vita sessuala dai agn tegnù asconù y tabuisé, giata tl liber "L'ert tl amour" na dimenscion duta naturala, neta y plena de pascions. I depenc de marevueia con argomentazions y temesc desferenc, laorés con tecniches fines dal artist Peter Hiegelsperger, vegn encoronés, jontés da formes, armonies y colours astrac deleghés ite con stil y fineza, da l'artista Sieglinde Gufler de St. Leonard de Passaier. L dut é vegnù splighé, conté y poester ence filosofé poeticamenter con tesc' passenenc metus adum da Nicoletta Montel de Bulsan y da Egon Vinatzer de Urtijei.

"L liber dess ester complet te vigni sia pert, nia proibitif y ence no volgar. Al é bel, dret y emportant che l argoment dla sessualité tl amour vegn respeté y tout sun l scer zenza na banalisazion scempla y volgara. L dut vegn premié da tesc' tles trei rejonedes dla provinzia. Enscì per talian, per ladin-gherdeina y per todesch. L projet é garaté. Do chest liber su, laoronse bele da passa nuef meisc deberieda te n'armonia demarevueia. L caje à volù che anter i autours sonse doi ei y does eles. N el y n'ela che à depent, n el
y n'ela che à scrit. Ie y Sieglinde ai peniei y Nicoletta y Egon a la mascin da scrive. Enscì onse ence valivé fora l'argomentazion dl projet y deberieda onse ence chirì fora sibe i depenc che ence i tesc' metan l peis a livel. I ne son mai vegnus sotsoura. Sibe l el che ence l'ela, à enscì tl liber dagnora la medema emportanza. Enteressant y cajual, él che vignun de nos cater vegn da n auter luech y raion dla provinzia, à na rejoneda dl'oma desferenta y contribuesc enscì à porté pera tl liber n toch de sia cultura, raijes, savei y rejoneda" .
Enscì l artist Peter Hiegelperger. N gran contribut per l bon garaté dl liber à ence sport Manuel Perktold (OK Internetservice) tla pert grafica y Sylvia Kompatscher (Komuica) per les traduzions tl todesch.

Entant che l liber é bele vegnù prejenté tla televijion dl'Austria y à arjont n gran suzes y enteressament, sarà "L'ert tl amour" ence prest da vedei te nostes valedes. La prejentazion ofiziela dl liber é a Eppan tl restaurant Ciastel Korb, n vender ai 20 de jugn 2008 da les set da seira. Daldò saràl meso a ciarcé n menù entitulé "L'ert tl amour" a n priesc de plajei.

Ert y leteratura che bossa y lieia les trei rejonedes tres n argoment dut d'amour. Endò na demostrazion sana y concreta che i sentimenc plu soc ne conesc degugn confins, razes, linies politiches y rejonedes. N impuls tl segn dla vejinanza, pesc y amour. Na publicazion n iade n puech autramenter, ma dessegur nasciuda sot a na bona steila. (EV)


Vos ne seis nia loghé ite. [ Loghé ite ]