benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Union di Ladins de Gherdina: Vinatzer s'en va
scrit ai 10 June 2008 da les 19:46:26 da noeles

Gherdeina

Egon Vinatzer à dé  les demiscions

Manuela Piazza tol su la presidenza enfin a da d'auton canche al vegnirà tegnù les veles dl consei nuef dla Union

Ajache pro les lies de volontariat ne él nia vedù dant che n conseier o n president posse laoré sciche dependent a paiament te sia medema lia, à l president dla ULG Egon Vinatzer che é te chesta situazion, zapé fora dl consei, dan ju dutes sies enciaries. Si compagns de lia con gran desplajei messù azeté chesta volonté sforzeda dl president.



Da recordé él che l ex-president Vinatzer à dagnora laoré per l ben dla lia zenza sparagné, no temp, viadesc y fadia. L paiament ofizial sciche dependent a mez temp, é zenzauter ben motivé y volù dal consei enstes. Sie gran operat é sté nia da pensé demez per tegnì strenc i liams con les autres Unions di Ladins, con les assoziazions  desferentes interregionales y dantaldut de tegnì de bogn contac ence con i politics. Dut chest sforz y sacrifize per l bon garaté dla gran ativité sozio-culturala de chisc ultims agn y per garantì les truepes novités inovatives portedes ite tla lia. Sia prejenza indispensabla te ciasa à danterlauter ence fat sci che i ofizes y la biblioteca resta vigni di daverc al publich y samben ence per laoré entourn l’aministrazion y control de duta la Cesa di Ladins con sie entourvia.
Egon Vinatzer, che ne à mai mancé a na senteda, é con si passa 24 agn tl consei y da 14 ani president, dagnora for sté bon de motivé duc i conseis, per tré la lia do na bona streda rica de manifestazions culturales de vigni sort y per la realisazion emportanta dles plu publicazions leterares y musicales. Ence sia vizepresidenta Manuela Piazza à te chisc agn for abù na bona colaborazion con l president y dut chel che é vegnù fat, realisé o metù en opera, é vegnù fat ora dal consei te sia maioranza con la mascima trasparenza.
La Ulg vuel rengrazié l president Egon per sie gran laour fat, che ne à nia sparagné datrai valch mueia ben soporteda. Ma dagnora à sies idees for purté suzes y legreza a duta la lia. L consei à te sia ultima senteda pité a Vinatzer, che à na gran esperienza, la stiera da diretour operatif dla Union, per salvé la medema y garantì che l’ativité posse jì inant sun chesta ligna zenza de majeres mancianzes.
La notizia de sies dimiscions à rot l bon clima tla lia, che vuel per entant se tò n temp de reflescion. Per entant ne sàn ciamò nia coche ala dess jì inant. La lia é te na situazion de crisa.
An spera che do n temp curt de paussa y de sentedes a portes sclutes, ésen bogn de fé azeté Vinatzer per la stiera nueva da diretour, y de levé su cherdan de revieres duc i conseiers per laoré inant con vueia, enteres y motivazion, almanco enchin a les veles d’auton.
Manuela Piazza é da sen inant la presidenta nueva dla Union di Ladins de Gherdeina y arà na miscion nia saurida.  An cialarà de abiné na bona streda per laoré con legreza y de salvé na lia che per tradizion à laoré y laoura per la cultura, rejoneda y identité ladina, de chel che Egon Vinatzer con sia prejenza sterscia y marcanta é dessegur sté bon dl desmostré te duc chisc agn.
“Mia miscion é steda chela de laoré per la cultura, tradizion, storia, sozieté y samben per la rejoneda y identité ladina, restan politicamenter for apartitich, y de chel che mie consei à dagnora for sostegnù. Ma bonamenter ti à a zachei desturbé mia posizion y maniera de laoré,” , dij Egon Vinatzer.
Al vegn fat alsavei che d’auton vegniràl tegnù l’assemblea generala dla ULG con les veles dl consei nuef. Chiche à enteres de daié pera fajan pert dl consei pò bele sen se lascé noté su.
A Manuela Piazza volonse ti embincé dut l bon  y truepa legreza con sia nomina nueva y che ela portarà fora con savei. (ULG)
 
 
 

 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.382 seconc