benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Jent Ladina Dolomites: i prums varesc tl publich
scrit ai 30 May 2008 da les 18:28:20 da noeles

Politica

"Jent Ladina Dolomites" fej tremolé la SVP

Entourn a la esperienza dl referendum da souramont nàscel n moviment politich nuef, sen ence tla provinzia de Bulsan "Jent Ladina Dolomites" (JLD)

L cuertl dla discrezion sun l moviment politch nuef, "Jent Ladina Dolomites" (JLD) é vegnù destopé l prum iade enier sun la FF-Suedtiroler Illustrierte y encuei amplamenter sun i sfueis todesc "Tageszeitung" y "Dolomiten". Entourn a la esperienza dl referendum da souramont se muevel valch politicamenter en previjion dles lites provinziales da d'auton tla provinzia de Bulsan, do che al fova vegnù encondé a Cortina y ta Fodom. Ence la Union Autonomista Ladina (UAL) de Fascia dess tost se lié ite al moviment y sourantò sie inom. Pepi Dejaco, ex-obman dla Svp-Ladina y ombolt de San Martin de Tor, à clermenter dé adentene sia volonté de tò pert, eventualmenter ence a cef de chesta lista nueva a les competizions litales de november dl 2008. Nia propi cis desplajuda de chisc ultims svilups ne pèr nience la Svp-obfrau ladina Paula Bioc Gasser, dan enscì indiretamenter esprescion al melcontent che an mouj gen les oujes ladines en gaujion de lites, ma ne ciafa nia retù valch a livel de enciaries y candidatures politiches. Chest melcontet é dantaldut deslarié tla Val Badia. Mussner se à dé na dreta sperduda y prova bele de descredité, rejonan de "provinzia ladina". Tres l inom "Jent Ladina Dolomites" se lieia l moviment al predezessour "Zent Ladina Dolomites", alié strent dla Svp ti agn dal 1946 al 1948 y organisadour dla gran manifestazion storica sun l jouf dl Sela dl 1946 (ciala articui storics sun noeles). Deguna marevueia che sostegnidours atuai é ence persones che à milité tl partì Svp, sen endere ciariés con l ardiment nuef dl referendum che à endò fat vedei na Ladinia che aspireia dutaorela a na unité aministrativa sot a la provinzia de Bulsan.



Bele n auter esponent dla Svp ladina, Werner Stuflesser, ova constaté plu iadesc che i ladins tla provinzia de Bulsan é sotraprejentés tl consei provinzial y che aldò dl proporz ti spetàssel perdret 2 raprejentanc (9.000 litadours per un n scagn). Te chesta otica vuel ence l moviment politich nuef se posizioné, nia na candidatura dampertfora contra l raprejentant Svp, ma per arjonje tres les lites n secont raprejentant ladin tl consei provinzial de Bulsan, n travert nia imposcibel, sce an pensa che da les ultimes lites provinziales dl 2003 ti manciòvel a la lista Ladins demé n pugn de oujes (entourn a 350) per arjonje n mandat de rest. Ma propi tla relazion con la Lista Ladins nàscel sen i maiours problems. Cler él che per does listes ladines ne él nia lerch con poscibeltés de suzes. Demé sce una fej n vare endour pòla garaté. Chi dess pa endere l dé? Tla lista Ladins ésen dassen ensciautris da chest svilup. L moviment "Jent Ladina Dolomites" essa la venta de ester valch de nuef y de sbroché ite tl eletorat Svp con esponenc dla Svp sciche Dejaco y enfinamai valch auter ombolt dla Val Badia, jent che à sostegnù da empruma encà l referendum da souramont y sia ghiranza de vegnì permez a la provinzia de Bulsan, a desvalivanza dla linia de Mussner. L sit internet Jent Ladina Dolomites.org é bele enjigné a tò su les idees y i contegnus dl moviment politich nuef.

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.36
Oujes: 11


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.387 seconc