Na seira sot a na bona steila
Seira de leteratura ladina a Urtijei con cornisc musicala de Raimond Irsara
La Union di Ladins de Gherdeina (UGL) à endò n iade desmostré che te si fins ti stà dantaldut a cuer la rejoneda ladina. Dì la tia, é sté n ejempl emportant per renforzé, auzé fora y prejenté al publich operes y artisć dla leteratura ladina. En vender seira ai 9 de mei, tla biblioteca dla Cesa di Ladins a Urtijei, él vegnù metù a ji na seira leterara olàche scritours y poec en raprejentanza de duta la Ladinia Dolomitica, à abù endò n iade na ocajion rera per se enconté y deberieda porté dant a n bel publich si scric y novités. Entant la seira él sté meso audì pec de prosa, poejies, stories y n esperiment leterar auditif.
Massa d'inrer végnel pité l’ocajion ai poec ladins de se prejenté a n majer publich y ciamò plu d'inrer vegn chisc portés fora dla Ladinia per fé conesce la leteratura ladina ence al mond de autres rejonedes. Entant la seira él sté meso audì fora la cualité auta di scric y l son fin che la rejoneda ladina pieta a la literatura. L lingaz dl’oma dolomitana te vigni sie idiom, se prejenta scialdi ben y sà da se adaté per vigni ocajion y esprescion leterara.
Anter i poec prejenc al “Dì la tia” à liet dant: Rut Bernardi, Roland Verra, Ivan Senoner y Josef Kostner da Gherdeina; Tresele Palfrader y Iaco Rico da la Pli de Mareo; Franco del Tedesco da Fodom; Stefen dell’Antonio da la Val de Fascia y Lilliana Majoni da Ampez. L cumpositour y ciantautor Raimond Irsara de Urtijei à renforzé musicalmenter la seira tres pec de straordinarité unica con esperimenc nuefs portés dant a la chitara.
Anter la gran fola de jent prejent ence l dot. Alexander Prinoth, diretour de repartizion dla Provinzia de Bulsan. Te sie salut à l diretour auzé fora la emportanza dla leteratura te vigni sia esprescion ence per l mantegniment y l svilup dla rejoneda ladina. “Te nostes poscibeltés cialaronse de sostegnì inant i projec metus en pé da lies o assoziazions che publicheia o che sostegn tres seires emportantes sciche chestes, la categoria di scritours.” Ence Elsa Zardini, vize presidenta dla Union Generala di Ladins dles Dolomites à volù onoré la seira tres sia prejenza. “ Al é bel y dret che les Unions di Ladins sostegn chestes manifestazions leterares. La leteratura é de gran montada per l mantegniment dla cultura, rejoneda y dantaldut dl’identité ladina. Bel él ence sté che la ULG se à festidié de envié adalerch poec da duta la Ladinia. N segn emportant dla vejinanza y colaborazion anter ladins dles Dlomites”.
Na seira garateda sot a la bona steila dla leteratura ladina. N suzes y na garanzia che la rejoneda viv inat. La Union di Ladins de Gherdëna à urté ben. La finalité é ruveda al publich y i scritours a tegnì pera.
Egon Vinatzer
