benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

I peresc dl referendum 2007: Sisto Ghedina y Sisto de Bigontina
scrit ai 22 April 2008 da les 21:00:28 da noeles

Storia

Sisto Ghedina: "Viva ra Zent Ladina Dolomites!"

Seconda pert sun dr. Sisto Ghedina y les entravegnudes con l moviment Zent Ladina Dolomites (ZLD) dal 1946 al 1948 - L resultat dl referendum 2007 ti é vegnú dediché a dr. Sisto Ghedina y al rajonier Sisto de Bigontina

de Paul Videsott

Ai 15 de jugn 1946 s’à abiné sun Jouf de Frera (Frara/Frea) vintecinch persones en raprejentanza de sies valedes (Sisto Ghedina y sie fre Quintino con Sisto de Bigontina y Gino Majoni per Anpezo y Fodom; Franz Gasser [Piculin] y Giuvani Comploi [plovan da Calfosch] per la Val Badia; Tone Sotriffer [Urtijëi], Engelbert Senoner [S. Cristina] y Hans Costa [Sëlva] per Gherdeina; Mario Ghetta, Celestino Weiss [Vich], Unterholzner Fritz, Pescol Alfred [Poza], Morello Gabrielli [Pera], Federico Valentini [Mazin], Iaco Depaul [Ciampedel] y Alfonso Dantone [Cianacei] per la Val de Fascia; Domenico Jellici, Lois, Wolfgang y Giovanni Sommavilla per Moena y laprò Pietro Delfauro [Pardac], Giuseppe Dalladio [Tieser], Redento Giampietro [Ciavaleis] y Alfredo Paluselli [Juian] per la Val de Flem) y à metù su “Zent Ladina Dolomites“ (ZLD). 
 
Albums fotografics de Zent Ladina Dolomites
Fotos dla manifestazion storica sun l jouf dl Sela dl 1946!
 
Clichede sun una dles fotos per vedei i albums fotografics!


President de „Zent Ladina Dolomites“
Chest moviment fova lié a la SVP, che à ence sostegnù sia nasciuda (al ova sciche simbol de partit la bandiera ladina con ta mez la steila da mont). President dl moviment politich nuef é vegnù nominé l dr. Ghedina, secreter general l ampezan Sisto de Bigontina. Con sia personalité calma y rejonoula fova l dr. Ghedina ence dal pont de veduda uman dut l contrar dl fascian impulsif y elocuent Guido Iori Rocia (1912-1987), che é vegnù nominé vize president de ZLD l di do, do da na enconteda de passa cinch ores tla ciasa de Sisto Ghedina a Cortina. A la stampa y al president dl consei di ministri De Gasperi ti él vegnù lascé al savei tres telegrams la novela dla fondazion dl partit y sie program. Ai 25 de jugn ti él spo vegnù mané n telegram al prefet de Bulsan Innocenti con la domanda de podei ti porté dant i dejideres dla popolazion ladina.
N meis do sia fondazion à “Zent Ladina Dolomites” metù a jì ai 14 de messel dl 1946 la manifestazion storica sun l Jouf de Sela, a chela che passa 3.000 Ladins à tout pert se ghiran sie reconesciment y sia reunificazion tla provinzia de Bulsan. Sot al gran aplaus di prejenc à l president Ghedina porté dant l program de “Zent Ladina Dolomites”, depierpul che Iori ti anunziova a la jent che l prefet Innocenti ti ova asseguré che les valedes ladines fora dla provinzia de Bulsan essa podù cerne te n referendum de cie provinzia che ales volova fé pert. Te chela ocajion à l dr. Ghedina dit chestes paroles (per ampezan, demé la ortografia é vegnuda moderniseda):

Zent Ladina Dolomites!
Me sento veramente onorà, inze ra me funzion de presidente de ra “Zent Ladina Dolomites”, de ve podé parlà a chesta magnifica nostra prima reunion al Pas de ‘l Sella.
Permetéme, prima de duto, de ve portà i salude pi sinziere de dute i nostre amighe anpezane, che par ra lontananza o par outra rajos i no n’à podù vegnì con nośoutre come che i arae vorù.
No n’é ra prima ota inze ra storia che ra śente ladina de ra zinche valades dolomitiches ra se raduna inze un unico bloco par seguì dute insieme al medemo destin.
 

LA STORIA DL REFERENDUM TE 4 PERTES    dr.prof.univ. Paul Videsott

Al dess y mess vegní fat giustizia  - Ciodì che i trei comuns ladins de Anpezo, Col Santa Lùzia y Fodom toca pro Südtirol y ciodì che al ti é ti agn 1945-48 vegnù refusé l dert de vegnì endò pro la provinzia de Bulsan. L referendum di 28 y 29 d’otober 2008 sciche ultim vare de trueps tentatifs da ruvé endò adum pro i autri Ladins. 

 

Zent Ladina Dolomites sun l jouf dl Sela - N meis do sia fondazion à “Zent Ladina Dolomites” metù a jì ai 14 de messel dl 1946 la manifestazion storica sun l Jouf de Sela, a chela che passa 3.000 Ladins à tout pert se ghiran sie reconesciment y sia reunificazion tla provinzia de Bulsan.

 

Sisto Ghedina: na plata de storia ladina - Sisto Ghedina é nasciù ai 25 de messel 1899 tla vila d’Alverà via en Anpezo y é vegnù batié l di do tla gliejia de San Iaco dal caplan Jan Mersa (da Calfosch). Al fova l terz mut de Antonio Ghedina (1863-1935) y de Rosa Manaigo de Ago (1867-1948)

 

Viva ra Zent Ladina Dolomites!Canche “Zent Ladina Dolomites” é vegnuda lasceda jì endalauter al scomenciament dl 1948, àla lascé sciche testament l’aodanza che zacai se cruze dl’unité ladina te n temp che essa abù da vegnì, plu democratich y plu davert defront ai debujegns dles mendranzes.
Chesta enciaria é vegnuda touta su y porteda inant dai promotours dl referendum di 28 y 29 d’otober 2007.
L resultat tant cler dl 78,87 % per la reunificazion con Bulsan ti é vegnù dediché ai “peresc dl referendum”, l dr. Sisto Ghedina y l rajonier Sisto de Bigontina.
Ra fondamenta de chesta nostra union, r’é stada fata śa un mes, al 15 de śugno al Pas de Gardena agnó che, in chel di, i s’aea radunà dute i esponentes de ra zinche valades par confermà el desiderio de ra gran parte de ra so śente. E proprio là, su chel pas, ‘l é stà fato el programa de ra nostra union “Zent Ladina Dolomites”.
Duta r’outoritàs conpetentes es é stades informades, e da parte mea me sento in doer de ve fei avertide che r’outoritàs es m’à dimostrà conprension e ben voré… in spezial modo So Ezelenza el dott. Innocenti, Prefeto de Bolzan. Par chesto nos i esprimon ra nostra riconoscenza pi viva, anche par ‘l apojo che ‘l m’à dà e che io son seguro che ‘l me darà anche da ca inaante. ‘L anunzio de ra costituzion de “Zent Ladina Dolomites”, co ‘l so programa, ‘l ea stà mandà a duta ra gaśetes pi conosciudes de ‘ste śones, ma me despiaje che gran parte no me ’l èbe vorù publicà. Velo lieśaré io ades:
“Gli esponenti dei Ladini delle Dolomiti riunitisi il 15 giugno 1946 al Passo Gardena, interpreti dei sentimenti delle popolazioni ladine chiedono:
Riconoscimento ufficiale del gruppo etnico ladino delle Dolomiti (Valli di Ampezzo, Livinallongo e Colle S. Lucia, Val Badia, Val di Fassa, Val Gardena ed i Ladini della Valle di Fiemme) aventi da secoli, lingua, cultura, tradizioni, artigianato, industrie, usi e costumi propri.
Di far parte integrante della provincia di Bolzano, quindi conseguente ritorno del Distretto di Ampezzo-Livinallongo e Colle S. Lucia, nonché annessione alla stessa provincia della Valle di Fassa e dei Ladini della Val di Fiemme.
Comune destino colla popolazione della provincia di Bolzano in quanto legati ad essa da vitali interessi di carattere economico, turistico e da affinità etniche.
Diritto dei Ladini di tutelare e difendere entro le proprie Valli ed ovunque i propri interessi”.
Śente ladina! A vośoutre ra resposta! Se voré coscì, iscrieve dute in masa a chesta union!
Inze chesta union, nośoutre ciataron ra forza par fei varé i nostre derite e par fei tutelà i nostre interese. Nośoutre son senpre stade moralmente leade – se no n’outro – da l nosc caratere: fedeltà, onor, onestà, spirito de sacrefizio, amor a ‘l laoro e tacade sora ‘l duto a ra nostra crodes.
E sora ra nostra śente, sora ra nostra ciaśes, sora ra nostra valades invocon ra benedizion de ‘l Signor… e Dio el me aiutarà!
Viva ra “Zent Ladina Dolomites”!


L di do é les ghiranzes ladines vegnudes metudes ju plu avisa te n telegram de 12 ponc a De Gasperi, ma el ne s’à nience degné da ti dé na resposta. Ai 18 de messel 1946 à perchel Sisto Ghedina y Sisto de Bigontina ortié a inom de “Zent Ladina Dolomites” les medemes ghiranzes te n memorandum scrit per franzous diretamenter a la Conferenza de Pesc a Paris. A Paris s’à dantaldut i raprejentanc de Südtirol Friedl Volgger, Otto von Guggenberg y Hans Schöfl sciche ence la delegazion austriaca dassen dé da fé per arjonje les ghiranzes di Ladins, dantaldut da i tò ite duc tl raion d’autonomia prevedù. La delegazion austriaca ti ova metù dant a chela taliana na lista de vintecater comuns che dovova passé a la provinzia de Bulsan per podei s’empervalei dla autonomia, plu avisa i comuns dla pert todescia dla Val de Non, chi dl Unterland enfin a Salurn, y i comuns ladins de Fascia, Fodom (con Col) y Anpezo. Ma les ativités de “Zent Ladina Dolomites” é atira dassen vegnudes combatudes da pert dla politica taliana, y De Gasperi é resté dur enfin a la fin. Denant che azeté les ghiranzes ladines y l’anescion de Cortina a Bulsan, éssel lascé sauté l’acordanza sun l’autonomia de Südtirol. Chesta é la gauja ciodì che i Ladins ne vegn – con duc i sforc dl’Austria y dla delegazion de Südtirol – nience nominés tl Tratat de Paris di 5 de setember 1946.
Empò jiva “Zent Ladina Dolomites” inant con si sforc: ciamò da d’auton dl 1946 ti él vegnù ortié al govern talian a Roma na petizion sostegnuda da 90 % dla popolazion per l destacament da Belun y na reunificazion con Bulsan, cie che à atira gaujé la reazion dl vedl CLN, che se damanova te na contradomanda al president dl consei di ministri enfinamai che “Zent Ladina Dolomites” vegnissa proibida per “tendenzes antitalianes”. Tant inant ne é De Gasperi nia jù, ma al ova dé da capì cler che al ne essa azeté nience una dles ghiranzes ladines metudes dant.

 
Tenjions te „Zent Ladina Dolomites“
Entratant fòvel vegnù scrit fora lites de comun te Souramont per i 10 de november 1946. Pro chestes lites à “Zent Ladina Dolomites” ciafé la maioranza assoluta tamben via en Anpezo (16 aconsiadours sun 20) che a Col (12 sun 15); ta Fodom ne òven nia podù lité ajache al ne se ova prejenté deguna lista alternativa a ZLD. Tant benveduda da la jent che “Zent Ladina Dolomites” fova, pòn ence vedei dal fat che te puec meisc se òvel scrit ite passa 12.000 persones, sceben che al vegniva azeté sciche membri demé jent ladina dl post con almanco 18 agn. Ma chisc membri fova spartis su te na maniera scialdi desvaliva, y chest fova n pont de debleza dl moviment: i entourn 12.000 sozes raprejentova plu o manco duta la popolazion dles valedes ladines fora de Südtirol, depierpul che i Ladins dla Val Badia y de Gherdeina, che fajova bele pert de Südtirol, se ova dal scomenciament inant scrit ite tla SVP (l’iscrizion tla SVP te Fodom y te Anpezo fova pu vegnuda proibida) o tles Unions di Ladins, che s’ova tout dant n program blot cultural. L aiut talian ofizial y asconù per l’Union di Ladins l à per forza porteda en oposizion a “Zent Ladina Dolomites”, che fova dret vejina a la SVP y sies idees pan-tiroleises. Y per rejons politich-strategiches n’à a la fin nience la SVP plu dé ju si membri ladins de Badia y Gherdeina a “Zent Ladina Dolomites”, sceben che chest fova tl prum vegnù empermetù. Ma ence Iori se arlontanova tres deplù da la linia di ampezans Ghedina y de Bigontina. Per evité che al ti vegnissa da pert taliana tres trat dant a “Zent Ladina Dolomites” de ester “sezescionista” (l prefet Innocenti ova descredité l dr. Ghedina sciche “bandiera dell’austracantesimo tra i ladini”) ti òvel pité a les autorités talianes de rosedé la direzion ampezana dl moviment, sce ales essa spo reconesciù “Zent Ladina Dolomites” y sie program sot a n president nuef Iori. Ma l referendum per l’anescion a Bulsan fova ence per Iori na conditio sine qua non dla politica ladina.

Da la speranza a la delujion
Te chest temp vegnìvel bele laoré pro l dessegn de n statut d’autonomia per Südtirol. Sibe la proposta dl prefet Innocenti, sibe chela dla SVP che chela dl ASAR (Associazione Studi Autonomistici Regionali) prevedova n referendum per i trei comuns ladins. Ma ence chilò plovòvel delujions: ai 27 de jugn 1947 deliberova la Enduneda Costituenta da mete su na region unica per l Trentin y l Südtirol zenza i trei comuns ladins.
Empò ne volova i trei comuns aministrés da raprejentanc de “Zent Ladina Dolomites” nia la dé su. Do n auter memorandum ai aliés ai 8 de mei dl 1947 s’ài apelé con trei deliberes ai 17, 18 y 19 de messel 1947 al Ministere di Interns a Roma con la domanda da reporté i confins a coche ai fova dant l fascism o de conzede altamo n referendum.
Avisa te chest temp (26 d’aost 1947) à l dotour Ghedina endò tout pert a n concurs per la stiera de dotour de comun de Cortina, ma endò él vegnù metù al secont post.
Sciche ultima speranza ova i trei comuns damané l’anescion a la provinzia de Trent. Duc i partic locai fossa stés a una, ma Roma no. Roma volova demé ti conzede valch ai Ladins de Südtirol con la speranza de mete empé n contrapeis italofil a la SVP. Perchel n’àn tout en conscidrazion deguna dles propostes che l dr. Ghedina ti ova fat a inom dla popolazion di trei comuns de Souramont a la Comiscion di Set, che fova tl laoré fora l statut d’autonomia definitif. Enscì é i Ladins de Souramont restés defora dal raion d’autonomia y taiés fora da vigni norma de sconanza dles mendranzes. Nia demé chel: la polizia ova sprigolé ju y ensciautrì con tant de manacedes y percuisizions de ciasa i raprejentanc de “Zent Ladina Dolomites”, che chisc à, a la fin dl 1947, dé su demoralisés sia batalia.


Dotour di Juesc Olimpics
Sun chela se à l dr. Ghedina trat zeruch daldut y ne se à mai plu dé ju con politica (a desferenzia de sie fre Quintino che é sté vize-ombolt de Anpezo dal 1946 al 1951), ma al se à ciamò n iade prejenté al concurs per deventé dotour de comun de Cortina, y ciamò n iade él ruvé demé secont. Enscì é Sisto Ghedina sté enchin ai 5 de mei dl 1954 – dlongia sia ativité tl “Ospedale Civico” – demé d’inrer y ad interim dotour ofizial de sie paisc. En chel di él vegnù nominé sostitut dl mede de comun, davia che l post fova endò vacant, y al à tout su chesta enciaria enchin ai 21 de messel dl 1955. Spo àl dé les demiscions per podei se conzentré demé plu sun sia ativité de profescionist lede.
Ma bele mez ann plu tert, entourn la fin dl 1955, à ence l dotour de comun apeina nominé, l dr. Zampetti, dé les demiscions. I Juesc Olimpics fova dant porta y Cortina fova zenza dotour. Sun chela é ai 9 de jené 1956 l dr. Ghedina vegnù nominé dotour de comun dla zité olimpica y te chesta funzion àl abù na responsabelté emportanta tratant i Juesc.
Canche al é vegnù nominé dotour de comun, à l dr. Ghedina atira damané sce al podova laoré inant te sie ambulatore privat tl Corso Italia, davia che chest ova – a desferenzia de chel de comun – l sciaudament zentral y ence n aparat Röntgen. L dr. Ghedina é romagnù dotour de comun enchin ai 25 de mei 1961; spo àl ciamò curé inant si pazienc privac. Ma davia che sia femena ne se ova mai sentì dret da ciasa a Cortina y do da n valgunes esperienzes scialdi encherscioules con jent nia de familia te na chestion de arpejon, à l dr. Ghedina tout la dezijion de trapiné endò a Persenon. Persenon fòva la zité dla joneza dla familia Ghedina, y ala fova ence plu damprò da Maran y da Desproch, olache i mutons vivova entratant.
Tl prum stova l dr. Ghedina y sia femena a Persenon demé via per i meisc da d’invern, ma dl 1976 se ài arciasé ilò definitivamenter. Ma la ciasa a Cortina é resteda enfin aldidancuei proprieté dla familia.
L ann do ti él vegnù diagnostiché al dr. Ghedina na ulcera duodenala, opereda a Desproch zenza problems. Ma tratant la convalescenza, ciamò te clinica, él sauté fora complicazions che à gaujé, do da diesc dis de coma, la mort de Sisto Ghedina ai 3 de jugn dl 1977 a Desproch. Al é sepolì tla cortina de Persenon.

Reconesciment
Sisto Ghedina é sté dotour con anima y corp. Duc si zertificac de servisc ne l lauda nia demé per sia competenza profescionala, ma ence per sie bon raport con i colegs y i pazienc y per sia desponibelté da daidé endlonch olache al fova debujegn. Tant da volei bon che al fova con i autri, tant rigorous fòvel con se enstes. Sport n’àl duta la vita mai pratiché.
Ma l dr. Ghedina é ence sté n ladin de planta, che savova tant emportanta che l’unité fova per l souravive dl mender grup linguistich de nosta region. Al à abù l coraje de sté a cef dl moviment ladin “Zent Ladina Dolomites” ti agn entravaiés 1946-1948, sceben che chest partit é vegnù ataché dassen y sceben che perchel àl messù tegnì fora cotant de scicanes y dificoltés ence desche persona privata.
Canche “Zent Ladina Dolomites” é vegnuda lasceda jì endalauter al scomenciament dl 1948, àla lascé sciche testament l’aodanza che zacai se cruze dl’unité ladina te n temp che essa abù da vegnì, plu democratich y plu davert defront ai debujegns dles mendranzes.
Chesta enciaria é vegnuda touta su y porteda inant dai promotours dl referendum di 28 y 29 d’otober 2007. L resultat tant cler dl 78,87 % per la reunificazion con Bulsan ti é vegnù dediché ai “peresc dl referendum”, l dr. Sisto Ghedina y l rajonier Sisto de Bigontina.
(Traduzion dl test original per todesch de Nadia Chiocchetti, verscion definitiva de pv)


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 4.33
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.383 seconc