benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Storia dl referendum da souramont - II. pert
scrit ai 10 April 2008 da les 19:00:00 da noeles

Storia

Zent Ladina Dolomites sun l jouf dl Sela

Al mess y dess vegnì fat giustizia! Les raijes storiches dl referendum - Seconda pert: dal 1946 inant 

de Paul Videsott

N meis do sia fondazion à “Zent Ladina Dolomites” metù a jì ai 14 de messel dl 1946 la manifestazion storica sun l Jouf de Sela, a chela che passa 3.000 Ladins à tout pert se ghiran sie reconesciment y sia reunificazion tla provinzia de Bulsan.
La manifestazion ladina sun l Jouf de Sela (14 de messel 1946). Al rejona dr. Sisto Ghedina, president de „Zent Ladina Dolomites“. Sun la tofla a man ciancia: „Anpezo ladin vo zì con Bolzan“. Dede na odleda ai albums on-line!
Zent Ladina Dolomites


 
 
 
Zent Ladina Dolomites

Dr. Sisto Ghedina, president de „Zent Ladina Dolomites“.

Te n telegram a De Gasperi vegniva les ghiranzes ladines cumpededes su plu avisa:

(a) reconesciment ofizial di Ladins sciche terz grup etnich;
(b) reunificazion de duc i Ladins tla provinzia de Bulsan;
(c) na zircoscrizion litala ladina;
(d) na sia aministrazion autonoma;
(e) ecuiparazion dl lingaz ladin con i autri doi lingac dla provinzia;
(f) scolines y scoles ladines, foliec y libri ladins;
(g) respet dles usanzes, tradizions y festes ladines;
(h) na pretura ladina ambulanta;
(j) mesures contra l’emigrazion;
(k) trasmiscions a la radio per ladin;
(l) adoranza dla toponomastica ladina.

Ma davia che De Gasperi ne ti ova nience responù, à “Zent Ladina Dolomites” – tres n memorandum – tout su ai 18 de messel dl 1946 diretamenter contat con la Conferenza de Pesc a Paris. A Paris s’à dantaldut i raprejentanc de Südtirol Friedl Volgger, Otto von Guggenberg y Hans Schöfl sciche ence la delegazion austriaca dassen dé da fé per arjonje les ghiranzes di Ladins, dantaldut da i tò ite duc tl raion d’autonomia prevedù. Ma ai sforc de “Zent Ladina Dolomites” ti soflòvel dantaldut tla provinzia de Belun n vent freit decontra: al memorandum di 18 de messel ti ova responù l CLN ai 6 d’aost con n contramemorandum, a chest ova “Zent Ladina Dolomites” repliché ai 9 y l CLN endò ai 18 de setember.

Free Image Hosting at www.picturetrail.com
N auter telegram de „Zent Ladina Dolomites“ a De Gasperi che se damana la reunificazion di Ladins. „Zent Ladina Dolomites“ à dl 1946 dé fora per 11 edemes n foliet dal medem inom. Cliché sun la foto per la engrandì.
 
Free Image Hosting at www.picturetrail.com
Imprescions dla manifestazion ladina sun l Jouf de Sela (14 de messel 1946). Cliché sun la foto per la engrandì.
 
L tenour di contramemorandums dl CLN fova tresfora l medem: la popolazion di trei comuns é taliana; la reunificazion con Südtirol é demé voluda da n valgunes pueces persones, a cheles che al ti encresc do l temp nazist. Sce Cortina ruvassa pro Südtirol, podessa la Talia adora o tert la perde. De Gasperi à sourantout chisc argomenc y à mantegnù tla chestion ladina na posizion dura. Al à enfinamai manacé da lascé sauté l’acordanza sun l’autonomia de Südtirol, sce la SVP y l’Austria essa inant batù sun les ghiranzes di ampezans y fodoms. Chesta é ence la gauja ciodì che i Ladins ne vegn – con duc i sforc dl’Austria y dla delegazion de Südtirol – nience nominés ne tl Tratat de Paris di 5 de setember 1946. An pò desmostré che De Gasperi se lasciova consié tla “chestion ladina” da Ettore Tolomei: te na letra ti metova chest a cuer con insistenza de rejoné tres demé de “doi” grups etnics te Südtirol y de conscidré y traté i Ladins dagnora sciche talians. Ciamò da d’auton dl 1946 ti vegnìvel ortié al govern talian a Roma na petizion sostegnuda da 90 % dla popolazion per l destacament da Belun y na reunificazion con Bulsan, cie che à atira gaujé la reazion dl vedl CLN, che se damanova te na contradomanda al president dl Consei di Ministri enfinamai che “Zent Ladina Dolomites” vegnissa proibida per “tendenzes antitalianes”. De Gasperi ti ova responù de ester informé sun la “volonté separatista” de “Zent Ladina Dolomites” y che al se stravardarà perchel da azeté ence demé una dles ghiranzes metudes dant. Canche i raprejentanc de Südtirol damanova ciamò n iade la delegazion taliana a Paris da jì ite sun les ghiranzes di trei comuns de Souramont, ti ova l ambasciadour talian Carandini responù che ala se tratova de na popolazion demé ciadorina y perchel taliana, de chela che Südtirol n’ova nia bria da se cruzié.
Pro les lites de comun di 10 de november 1946 à “Zent Ladina Dolomites” ciafé sibe a Anpezo (16 de 20 mandac) che ence a Col Santa Lùzia (12 de 15) la maioranza assoluta (ta Fodom n’àn nia podù lité, davia che al ne s’ova prejenté deguna lista alternativa a “Zent Ladina”). Danuef él vegnù ortié na petizion, en chest iade a la Enduneda Costituenta, ma endò zenza suzes.
 
Da la speranza a la delujion
Te chest temp vegnìvel bele laoré pro l dessegn de n statut d’autonomia per Südtirol. Dal prefet dla provinzia de Bulsan Silvio Innocenti ciafova “Zent Ladina Dolomites” al 1 d’otober 1946 l’assegurazion che al fossa vegnù scrit fora n referendum per la reunificazion. N referendum per la reunificazion prevedova ence l dessegn de statut d’autonomia laoré fora da Karl Tinzl per la SVP. Ence la proposta dl moviment autonomistich trentin ASAR prevedova na region ti confins dl 1922 sciche ence na terza “curia” per i Ladins, dlongia chela taliana y todescia. Ma ence chilò plovòvel delujions: ai 27 de jugn 1947 deliberova la Enduneda Costituenta da mete su na region unica per l Trentin y l Südtirol zenza i trei comuns ladins.
Empò ne volova i trei comuns aministrés da raprejentanc de “Zent Ladina Dolomites” nia la dé su. Do n auter memorandum ai aliés ai 8 de mei dl 1947 s’ài apelé con trei deliberes ai 17, 18 y 19 de messel 1947 al Ministere di Interns a Roma con la domanda da reporté i confins a coche ai fova dant l fascism o de conzede altamo n referendum. Ma atira à la jonta de comun de Belun protesté energicamenter.
Oramai parova la provinzia de Bulsan n travert nia plu meso da arjonje, tant sterscia fova la politica d’ostruzionism taliana. Perchel ova i trei comuns damané – sciche ultima poscibelté da vegnì empò ciamò touc su tl raion d’autonomia – ai 28 de november 1947 (con l’enjonta de na lista de sotescrizions dl 70 % di peresc de familia) y ciamò n iade ai 13 de jené dl 1948 da vegnì metus almanco pro la Provinzia de Trent. Sceben che i parlamentars trentins sostegniva adum a la maioranza dla DC chesta ghiranza (bele ai 16 de november dl 1947 s’ova duc i partic trentins pronunzié per n referendum), s’ova l vizepresident dla DC da enlaouta, Paolo Emilio Taviani (aposta – sciche al à scrit enstes te sies recordanzes) metù adum te chesta chestion con l’oposizion fajan enscì tomé la mozion. Enscì fova ence l’empermetuda dl president dla region Luigi Menapace, fata sun domanda dl deputat Defant (ASAR) y touta su con gran aplaus di prejenc tratant la pruma senteda dl Consei Regional ai 13 de dezember dl 1948, de s’impegné da conduje derevers i trei comuns ladins, demé plu na empermetuda vueta. La SVP fossa steda a una con l’agregazion di trei comuns a Trent, sce l Unterland fossa passé pro Bulsan: chesta seconda ghiranza é vegnuda azeteda, depierpul che la pruma é romagnuda per streda.
Roma se mostrova demé desponibla ti confronc di Ladins de Südtirol, speculan de mete empé n contrapeis italofil a la SVP. Con chestes intenzions él vegnù tout n valgugn provedimenc che contrastova enlaouta la linia di raprejentanc ofiziai di Ladins y dla SVP y che vegniva perchel tl prum conscidrés sciche sforzés su (enscì p.ej. l’introduzion dl sistem scolastich paritetich, che vegniva demé sostegnù da na mendranza di Ladins, sceben che al s’à a la fin desmostré ideal per i debujegns de nostes valedes). Nience les ghiranzes giustifichedes di Ladins de Fascia ne vegniva toutes en conscidrazion, condut che chisc essa audì pro la medema region Trentin-Südtirol. Da vigni mesura de sconanza dovova endere romagne scluc fora i Ladins di trei comuns tla provinzia de Belun. Do che la polizia ova sprigolé ju y ensciautrì con truepes manacedes y percuisizions de ciasa i raprejentanc de “Zent Ladina Dolomites”, à chisc dé su demoralisés sia batalia a la fin dl 1947.
 
I dejenés enfin a l 1991
 

LA STORIA DL REFERENDUM TE 4 PERTES   de dr.prof.univ. Paul Videsott

Al dess y mess vegní fat giustizia  - Ciodì che i trei comuns ladins de Anpezo, Col Santa Lùzia y Fodom toca pro Südtirol y ciodì che al ti é ti agn 1945-48 vegnù refusé l dert de vegnì endò pro la provinzia de Bulsan. L referendum di 28 y 29 d’otober 2008 sciche ultim vare de trueps tentatifs da ruvé endò adum pro i autri Ladins. 

 

Zent Ladina Dolomites sun l jouf dl Sela - N meis do sia fondazion à “Zent Ladina Dolomites” metù a jì ai 14 de messel dl 1946 la manifestazion storica sun l Jouf de Sela, a chela che passa 3.000 Ladins à tout pert se ghiran sie reconesciment y sia reunificazion tla provinzia de Bulsan.

 

Sisto Ghedina: na plata de storia ladina - Sisto Ghedina é nasciù ai 25 de messel 1899 tla vila d’Alverà via en Anpezo y é vegnù batié l di do tla gliejia de San Iaco dal caplan Jan Mersa (da Calfosch). Al fova l terz mut de Antonio Ghedina (1863-1935) y de Rosa Manaigo de Ago (1867-1948)

 

Viva ra Zent Ladina Dolomites!Canche “Zent Ladina Dolomites” é vegnuda lasceda jì endalauter al scomenciament dl 1948, àla lascé sciche testament l’aodanza che zacai se cruze dl’unité ladina te n temp che essa abù da vegnì, plu democratich y plu davert defront ai debujegns dles mendranzes.
Chesta enciaria é vegnuda touta su y porteda inant dai promotours dl referendum di 28 y 29 d’otober 2007.
L resultat tant cler dl 78,87 % per la reunificazion con Bulsan ti é vegnù dediché ai “peresc dl referendum”, l dr. Sisto Ghedina y l rajonier Sisto de Bigontina.
N’autra rejon per chela che Roma ne volova nia ti lascé Cortina a Südtirol fova i Juesc Olimpics da d’invern dl 1956, vegnus assegnés a Cortina ai 4 d’auril 1949 (ciamò ai 4 de jugn 1947 s’ova l consei de comun de Anpezo declaré contrar ai Juesc Olimpics). Chisc fova i prums Juesc Olimpics che vegniva metus a jì tla Talia: ai dovova perchel ence vegnì fac te na localité y provinzia “taliana”.
I Juesc dl 1956 à abù, dlongia les pertes positives per l’image turistich de Cortina, repercuscions catastrofales sun l marcé di cuartiers. La prescion di speculanc ne fova tost nia plu da soporté, la jent dl post ne fova defata nia plu bona da tegnì vare con i priesc pités da interessés da foradecà. Laprò ruvova l fat che la couta sun les arpejons fova per gauja dla classificazion turistica auta de Cortina enfin a la fin di agn ’80 tant grana che na ciasa arpeda messova en sostanza vegnì “compreda zeruch” dal Stat (an rejonova dl “panich da messei arpé”). Te chesta situazion se fajova cotanc de joegn ampezans plu saurì da vene per trueps scioldi sie avei a Cortina y jì a se fé na esistenza nueva da valch autra pert. Ti agn 1971 enfin al 2007 à Cortina perdù l 27 % de sia popolazion. Per d’autres rejons (mancianza de infrastrutures y de poscibeltés de laour) é ence Col y Fodom seghités da na gran emigrazion: chilò é la popolazion juda endò ti ultims 40 agn dl 34 % resp. l 16 %. L soul liam istituzional resté anter Südtirol y Souramont fova enfin a l 1964 la diozeja de Persenon (al temp di Juesc Olimpics fova mons. Heinrich Forer plovan y degan d’Anpezo). Tant plu grana é spo steda la delujion dla jent canche al é vegnù metù su la diozeja de Bulsan-Persenon y de conseguenza – ence sun prescion dl Ministere di Interns talian – taié via ai 8 d’aost dl 1964 ence chest ultim fil storich de coliament. Ma l prum plovan nia consacré a Persenon é empermò vegnù metù en servisc a Cortina l ann 1986 (!).
Ciamò tl 1964 (ai 5 de messel) se ghirova empruma l consei de comun da Fodom y spo, ai 17 de dezember dl medem ann, sibe l consei de comun da Fodom che ence chel de Anpezo la reunificazion a Südtirol. Do che i Ladins de Souramont é ence con l Pachet dl 1972 endò jus fora a vuet, vegniva ta Fodom chestes deliberazions ciamò n iade toutes a gran maioranza ai 5 de mei dl 1973 y ai 27 d’otober dl 1977. Ai 15 de dezember dl 1978 se damanova l consei de comun de Anpezo te na senteda straordinara a l’unanimité l’atuazion di derc de mendranza ence per i Ladins di trei comuns da Souramont. L ann 1980 à spo raprejentanc d’Anpezo y Fodom abù deplù encontedes con l President dla Republica Sandro Pertini che passova sies vacanzes te Gherdeina. Da chestes encontedes él nasciù tl Venet na “Comiscion per i Ladins dles Dolomites”, ma che n’à a la fin porté a degugn resultac concrec.
 
I referendums programés dl 1991
Ai 18 de november dl 1991 à l consei de comun de Anpezo finalmenter deliberé de endì n referendum per la reunificazion con la provinzia de Bulsan, trei dis plu tert ence l consei de comun de Col. Do che i politics beluneisc se temova che l referendum jissa fora positivamenter (anter l auter, davia che la jent ova tout su ben la “mateda” tla nuet di 14 de november, olache al ti é vegnù mudé ju a cenc d’auti la targa da BL sun BZ), ài fat tan die che al é vegnù metù a jì en duta prescia n pre-referendum ta Fodom, che é spo vegnù fat con puecia informazion, ma con truepa polemica ai 10 de mei 1992. L resultat negatif dl 55,35 % à basté per ti tò flé ai ampezans y a chi de Col de jì inant.
Empede enrescì y tò sul scerio les gaujes dl referendum, à la provinzia de Belun amplié d’ofize sun basa dla lege 482/99 l raion ladin sun d’autri 36 comuns, che ne se ova denant mai definì, tant demanco sentù ladins. Te chesta “neo-ladinité” de passa 50.000 persones fova i 5.000 ladins tiroleisc di trei comuns tla gran mendranza. Ence chest prozede à na paralela storica: De Gasperi ova destenù l raion de autonomia a duta la region Trentin-Südtirol avisa per arjonje na maioranza taliana.
En l ann 2001 éla garateda, do laours bendebot lonc di ampezans y tres l aiut di raprejentanc dla SVP a Roma, de mudé l art. 132 dla costituzion che regoleia les variazions di confins regionai. Demé che chesta desposizion nueva, che dovova refé l tort fascist envers i Ladins, é vegnuda sfruteda da trueps d’autri comuns, delojan na ona de referendums: endò n iade cioda Souramont da vegnì raité sot da la storia.
 
Motifs economics
Entratant l referendum se tolova valch tres endò a dì che Anpezo, Col y Fodom volova demé na mudazion di confins per rejons economiches. Ma la volonté de mioré sia situazion y de avei n davegnì miour dal pont de veduda linguistich, cultural, sozial y economich ne é nia valch da despriejé. Ence te Südtirol à la gran emigrazion podù vegnì architeda empermò canche la provinzia à ti agn ’60 arjont de majeres poscibeltés economiches. Con la reunificazion di trei comuns a la provinzia de Bulsan podessa entrames does les pertes en avei dancialà: a stim à i trei comuns n pion fiscal de ca. 15 milions de Euro (gran pert de chisc a Cortina) y de chisc nen rùvel zeruch demé 10 %, depierpul che con la regolazion sudtiroleisa en ruvàssel endour l 90 %, oben ca. 13 milions. Ence sce demé l 50 % de chisc scioldi ruvassa tles casses di trei comuns, éssei danz cotant deplù a desposizion per podei modernisé sies infrastrutures. Dessegur en aprofitassa impreises de Südtirol (implanc portamont, firmes da muradour, artejans y e.i.) l plu de chestes neo-investizions.
 
Na odleda al davegnì
Da dutes les desposizions de sconanza che i Ladins à ciafé tla region Trentin-Südtirol é i Ladins tla provinzia de Belun scluc fora. Zenza ladin te scola, zenza ladin desche lingaz ofizial, zenza raprejentanza politica él ben na marevueia, che l ladin à podù se mantegnì ti trei comuns de Souramont enfin al didancuei. La reunificazion di Ladins sot a la provinzia de Bulsan é perchel n dert di Ladins che se cuer deplen con i prinzips europeics de sconanza dles mendranzes. Ence l proporz se mudassa demé minimamenter. Endut à i trei comuns na popolazion de 8025 persones (dac dla cumpeida dla jent dl 2001), de chisc é 4127 ladins y 3898 talians (dantaldut a Cortina, depierpul che Col y Fodom é al 90 % ladins). L grup ladin aumentassa enscì tla provinzia de Bulsan de 0,85 % (da 4,00 a 4,85 %) y chel talian de 0,42 % (da 24,50 a 24,92 %); i todesc depierpul calassa de 1,07 % (da 64,00 a 62,93 %) y i “autri” de 0,12 % (da 7,40 a 7,28 % – aladò de calcolazions dl prof. univ. Christoph Pan tla USC di 13.10.07, pl. 11).
Cialan encuei endour pòn dì che la popolazion di trei comuns de Anpezo, Col y Fodom à fat dles dutes per ruvé endò adum ai autri Ladins sot la provinzia de Bulsan. La Talia democratica ne se à endere nia astilé autramenter che l fascism. La volonté di trei comuns ladins-tiroleisc de Souramont é endere fin a sen steda plu sterscia de dutes les intrigazions politiches. Bele perchel se merìtei nost plen sostegn. (Traduzion dl test original per todesch de Giovanni Mischi, verscion definitiva de pv)
Liam a la pruma pert dl articul:
I. Pert: "Al dess y mess vegnì fat giustizia!" - La storia dl referendum y les entravegnudes enfin al ann 1946
 


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

AmpezFodomStoria

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Storia dl referendum da souramont - II. pert (ponc: 1)
da medo ai 11 April 2008 da les 12:39:54
(Infos sun l utilisadour | Ti mané n messaje privat)
En momont emportant de nosta storia - en momont emportant ince dla storia dl Europa!
La côssa plü envasiva y manco envadonta co ejist sön cösc monn é la conoscionza, porchel m'arati ch'al sides ora da fa conesce al monn entier la storia dai Ladins - nosta storia. No mat por le monn entier, na soradöt por la recordé a nos Ladins enstesc. Le monn é madü por nosta emanzipaziun!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.361 seconc