benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Convegn dl istitut MdR
scrit ai 25 March 2008 da les 18:26:03 da noeles

Ladin Standard

Convegn dl Istitut MdR: ie me aodasse n "new deal"!

L laour dl istitut ne varenta nia i idioms, sce al ne vegn nia integré te n "language planning" miré a la unificazion linguistica dla Ladinia 

consciderazions de dr. Erwin Valentini

Tl ultim numer de “La Usc” pòn lieje che l Istitut ladin “Micurà de Rü” (MdR) organiseia ai 28 y 29 de merz n convegn sun l tema: “Ester Ladins incö” (tl titul dl articul végnel enjonté “por avëi n dagnì”). L fin dl convegn é, aldò dl articulist, de baraté fora idees anter i raprejentanc dl istitut y esponenc dl mond cultural, academich y politich y de mete a jì na discuscion sun chest argoment. Na bela scomenciadiva, che pò avei na gran fazion a condizion che an ne ti ciale nia tant al passé (magari per se laudé se enstesc) ma dantaldut al doman y che al vegne rejoné de obietifs y strategies per l davegnì. La chestion sun meisa é scempla ma dramatica: Cie podonse y messonse pa fé per garantì alalongia l souravive di ladins sciche grup etnich-linguistich, sciche “Ladinia”? 






 

 
 
 
 

 

 

Comentars y posizions

 Ester ladins encuei, resté ladins doman

 Referendum da souramont: prospetives nueves
 Referendum y unificazion linguistica 
 Micurà de Ru se desceida: les posizions dl diretour Leander Moroder

 La delibera marora: n comentar de Erwin Valentini

 N comentar a les chestions entourn al referendum

 I Bantustans, i vilins ladins
 Comentar al comunicat dl istitut MdR
 Mussner - Chiocchetti: does posizions dassen desvalives
 Comentar a la intervista de Mussner tla USC
 Unité: ciacoles é plu de dann che d'utl
 LS: plu saurì da scrive y da capì da duc
 La letra de demiscions da la UGL
 Chestions de lingaz: gramatica ladina
 Assessour ladin o assessour a la cultura gherdeina y badiota?

 100 agn Union Ladina: les 11 teses

 Media Ladins: la minonga de n letour
 Memorandum dles Unions Culturales
 Intervista a Erwin Valentini
 Les fauzités dl MdR envers l LS
 Ladin: la comedia en 5 ac
 SPELL: la situazion tl 2004
 La ladinité dl 2000
 L prum articul dl 1979

Per definì na strategia onse a la leta essenzialmenter does stredes: una “bottom-up”, l’autra “top-down”; les does striares metodologiches é conzentualmenter desferentes ma ales pò se encrujé y se combiné tla pratica. L “modus operandi” dl Istitut “Micurà de Rü” é n “approach” tipicamenter bottom-up: laoré te vigni ciamp, crié fac concrec (enrescides, publicazions, massaries linguistiches, manifestazions y mostres) sciche fondamenta y motor dl  svilup cultural, zenza se damané plu avisa cie che dutes chestes ativités porta alalongia. L diretour dl istitut, rejonan di majeri apontamenc y projec sun meisa (cfr. intervista a La Usc dai  prums de merz 2008) porta dant na longia lista de laours scientifics y de manifestazions culturales, metus a jì en pert adum con d’autres organisazions ladines. Te sia compeida métel l azent, souraldut  per  cie che  reverda i “laours normai” dl istitut, chi linguistics, sun la continuazion dles ativités bele sun streda (“nos jarun inant”). L ”prozedere” é per enjonta y acumulazion: an mete permez al patrimone esistent n toch nuef. No l diretour no, plu en general,  sie referent politich, l assessour a la cultura ladina, nes pieta na reflescion sun l obietif strategich de siei programs, auter che chel generich de volei svilupé l lingaz y la cultura ladina.
La tendenza y l pericul de n tel approach é de vedei tl grum, tla massa y no la cualité la sostanza dla cultura. La maiour locia ti programs culturai de truepes istituzions politiches-culturales ladines é che ai ne pieta deguna resposta concreta a la chestion fondamentala: cie Ladinia volonse pa y ciunes é pa les condizions nezesciares per la realisé. Per arjonje na maiour eficazité y evité magari n spaterlament de ressurses inteletuales y finanziares jìssel debujegn de integré tla programazion ence conscidrazions top-down, spezifican y giustifican dantfora prinzips, obietifs y priorités essenziales de sia ”miscion”. Da olà fòssel pa da pié via? Les does priorités per cheles che la Union di ladins se à dagnora batù é l’unité di ladins y l svilup dl lingaz sciche condizion per garantì l souravive dla Ladinia. La ghiranza de unité di ladins à giaté na relevanza politica nueva do l referendum di comuns de Souramont. Dant da chesta sfida à nostes istituzions mostré na gran melsegureza per nia dì confujion (ciala les contradizions anter l assessour Mussner y sie partit, la SVP). Samben, duc rejona di torc dla tripartizion fascista y vuel a paroles l’unité ma trueps se para dapò de fat contra la reunificazion y propon enveze na cooperazion souraregionala (na sort de provinzia ladina virtuala, aldò dles paroles de Dellai, cfr. L’Alto Adige, 12.12.2007). La cooperazion anter les valedes y sie istituzions (che é plu gonot declareda y mediatiseda che sostanziala) é dessegur nezesciara ma ala ne arà mai la medema fazion che na strutura unitara che lieie adum aministrativamenter duc i ladins. I confins despartesc (ence tl’era dla globalisazion!) nia demé a livel politich ma ence a livel cultural ajache les istituzions y assoziazions culturales y profescionales é liedes a strutures zentrales (Dachverbände) esozentriches che ti sforza su a nostes valedes enteresc,  modiei y lingac foresc’. Per fé n ejempl fora dal  mond da paur (chel che dess avei conservé miec l lingaz ladin):  duc rejona encuei te Badia y Gherdeina de ”Grossvieheinheit” ajache chesta é la terminologia che i bacans aud te conferenzes y veid ti formulars per damané contribuc partis fora da Bulsan. N ejempl scempl che desmostra tant strent che é l liam anter aministrazion y cultura; perchel ne à la ghiranza de autoraprejentazion politica di ladins nia demé na fondamenta politica ma ence culturala.
Na componenta essenziala dla unité ladina é, sciche i on bele dit, chela dla lingaz scrit. Chest ne scemplificassa nia demé la comunicazion anter les valedes ma podessa deventé n fatour atifs de coejion, ence identitara, de cie che al va n gran debujegn tla Ladinia. La zentralité y donca la valenza strategica dl ladin scrit unifiché é vegnuda sotrisseda ciamò n iade te na maniera clera dal ombolt de Corvara, Franz Pedratscher ( La Usc, 1. 3. 2008): “I arati che nosc lingaz pois ma speré da vire inant sce i sarun bogn de n’un avëi un su unifiché, almanco tla scritöra. Chësc ne po sambëgn nia orëi dì la mort di idioms de valada, che podess suravire tla forma baiada da vignidé” . Sce chesta vijion é dreta – enscì la pensa la gran pert di spezialisc’ – spo messonse nes damané sce la politica linguistica dles istituzions ladines de Bulsan – assessorat, scola, Micurà de Rü” – ne fala nia sia finamira declareda: la sconanza y l svilup dl lingaz ladin (y no demé di idioms gherdeina y badiot).

L laoré fora gramatiches, dizionars, coretours ortografics, etc. per i idioms é dessegur dret y bon ma al ne basta nia, y alalongia ne varéntel nience i idioms, sce chisc laours ne vegn nia integrés te n ”language planning” general miré a la unificazion linguistica dla Ladinia. I raprejentanc  dles istituzions culturales (Union Generela y istituc culturai ) ova perauter vedù ite dant vint agn l’emportanza de n lingaz scrit unifiché y a chest fin òvei metù su SPELL. L boicot atual dl ladin standard da pert dles istituzions che fej cef a Bulsan arfera l prozes de unificazion linguistica y culturala, voluda perauter, almanco a paroles, ence da chestes organisazions enstesses.
Tl convegn dl Istitut “Micurà de Rü” vegniràl “baié dl Istitut, mo ence dla Ladinia y de ci vers che ala podess jì”. Ie me audasse – y al fossa na gran bela novité – che da chest event vegnissa fora n ”new deal”, magari metù ju te n papier strategich de politica culturala, che tolessa en conscidrazion no demé i bujegns dl Istitut ma les ghiranzes de duta la Ladinia.


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 5
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Convegn dl istitut MdR (ponc: 1)
da MateoTaibon ai 26 March 2008 da les 09:19:48
(Infos sun l utilisadour | Ti mané n messaje privat)
veira !
les propostes de democrazia direta é döes gnüdes refodades tl consei provinzial.
Le referendum fat a Urtijei é stada na farsa, o miú po ester na tragicomedia:
la domanda por le referendum ea fata te na maniera estremamonter sbilanciada, ince con baujies tla domanda enstessa. Chesta consulta ea dalunc da vigne livel serius de democrazia direta.
N zich de serieté fossel sté bun avei, y zich de profescionalité ince, albü án le diletantism de esponenc de partí che i á n gran senn al ladin. Chest senn é n segn dl nazionalism todesch de chisc ladins - n paradox, sciöche ince jent dla SVP todescia dij: "Sie wollen deutscher sein als die Deutschen".



Re: Convegn dl istitut MdR (ponc: 1)
da MateoTaibon ai 25 March 2008 da les 19:25:48
(Infos sun l utilisadour | Ti mané n messaje privat)
dötes les propostes de democrazia direta é gnüdes metüdes te fossa dala SVP, l partí de E.Dellago.





Re: Convegn dl istitut MdR (ponc: 1)
da EValentini ai 26 March 2008 da les 09:17:08
(Infos sun l utilisadour | Ti mané n messaje privat)
Apropos democrazia direta: L referendum é, en prinzip, la forma plu democratica de tò dezijions ma al é ence na massaria pericolousa ajache al pò vegnì manipulé de vigni vers. Ti rejims totalitars végnel gonot adoré per confirme "democraticamenter" dezijions bele toutes dal aut. Nia per nia é l referendum vegnù proibì tla costituzion todescia do le burtes esperienzes fates sot a Hitler.
Truep depen ence da coche y da ciunes domandes che vegn fates. La formulazion dles domandes dl referendum sun l ladin dolomitan organisé a Urtijei ne fova de chest vers nia dldut neutrales.
Pro la democrazia direta auda ence na discuscion daverta. Miec de beles polemiches che l scuté chiec sciche al vegn pratiché da cerc esponenc de nostes istituzions che ne soporta nia les critiches. N valgugn à finamai dit che ai ne vuel nia respone a les critiches de "chi estremisc'" de noeles.net per ne ti dé nia massa ressonaza. De tel comportamenc ne é desseur nia democratics ma plutost n segn de aroganza.
Doca, benvenudes ence les polemichs tant inant che a vegn mantegnì n cert fair-play.




Re: Convegn dl istitut MdR (ponc: 1)
da EDellago ai 25 March 2008 da les 18:19:13
(Infos sun l utilisadour | Ti mané n messaje privat)
L dutor Erwin Valentini a duta la rejons. Me che n "new deal" de na tel gran dimension messessa unì damandà dala Ladinia "in toto" y no me da n Istitut, tan cumpetent che chesc pò nce vester. Iel pa de bujen - sci o no? Uel pa la jent dla Ladinia vel de tel - sci o no?
Tla Svizra ven fat uni sort de referendum per vel de tel. Ie pa tlo pra neus la democrazia mo nia tan inant?



Re: Convegn dl istitut MdR (ponc: 1)
da EValentini ai 25 March 2008 da les 18:53:56
(Infos sun l utilisadour | Ti mané n messaje privat)
Scì, a una con n referendum sun l'introduzion dl ladin scrit unifiché. Ie damanasse demé che sce la majoranza essa da dì de scì, i paisc o les valedes che dijessa a maioranza de no respetassa la volonté dla Ladinia "in toto".



Re: Convegn dl istitut MdR (ponc: 1)
da EValentini ai 26 March 2008 da les 10:09:54
(Infos sun l utilisadour | Ti mané n messaje privat)
Ie volesse prié duc chi che à liet mie articul y se enteresceia dla chestion de vegnì con comentars, toutes de posizion y propostes sun l argoment traté.
La programazion de MdR y de truepes autres organisazions culturales é dagnora vegnuda fata y deda dant dal aut zenza consulté la jent. Ma al é ence da dì che la passivité (o dejenteres) dla jent ne deida nia pro a "democratisé" la politica culturala. Donca preibel idees y propostes concretes!. I son segur che chi che dess audì audiarà (ence sce ai j de ne lieje nia noeles.net)



Re: Convegn dl istitut MdR (ponc: 1)
da marco ai 26 March 2008 da les 17:57:25
(Infos sun l utilisadour | Ti mané n messaje privat)
L´Istitut Ladin Micurá de Rü dess romagne le punt de riferimont por ci co reverda la cultura y le lingaz ladin.
Por le dagní m´aodi che al vegnes de en segn sterch de sostegn a la reunificaziun dla Ladinia;
che an vai endô deboriada sön le tru por arjunje le lingaz scrit unifiché respetenn i idioms de valada;
che an se tigni sön le ciamp cultural y linguistich plü a criters scientifics y manco a presciuns politiches y
che al vegnes ciaré spezialmonter te cösc momont a chi ladins co na nia albü cina sen na sconanza desco nos te Südtirol.



Re: Convegn dl istitut MdR (ponc: 1)
da Claudio ai 27 March 2008 da les 09:16:59
(Infos sun l utilisadour | Ti mané n messaje privat)
Tla situazion da sen ne me aspeti nia truep dal istitut MdR. L diretour é n gran baiocher. Canche al é vegnù a les dretes pro l LS àl trat ite la coda. Pro la festa di 30 agn se àn bele desmentié de dut y à enfinamai fat comunicac contra l statut dl istitut enstes. Al é sen enfinamai tomé demez dai projec scientifics. Sce al ne vegn nia na scasseda jiràla demé piec.



Re: Convegn dl istitut MdR (ponc: 1)
da travers ai 27 March 2008 da les 09:21:22
(Infos sun l utilisadour | Ti mané n messaje privat)
L parola "unité ladina" é vegnuda liteda sciche la "parola dl ann" per l 2007. Per la cerna dles paroles dl ann végnel tout en conscidrazion esprescions che à fat rejoné la jent, che à gaujé discuscions, che à marscé a valch moda l'ann. La pruma rejon dla frecuenza mediatica y popolarité de chesta parola é steda samben l referendum, donca n event dantaldut politich, ma i recordon che ala é ence l "leitmotiv" de duc i movimenc storics politics y culturai, sciche anter l auter la Union di Ladins y Zent ladina.
Ne podesse nia l' unité ladina deventé na fontana d'ispirazion y d'azion y l leitmotiv di programs de nostes istituzions culturales, y plu damprò, dl Convegn de MdR sun "Ester Ladins incö (por avëi n dagnì)"? Na proposta concreta y saurida da realisé podessa ester chela de mete su n pest anual per na ativité, n laour o na pubicazion che à dé n contribut emport a l renforzament dla unité di Ladins



Re: Convegn dl istitut MdR (ponc: 1)
da travers ai 31 March 2008 da les 12:06:55
(Infos sun l utilisadour | Ti mané n messaje privat)
L. Moroder à na vijion dret clera dl ladin: al tol ca se enstesc sciche ejempl y parameter dla comprenjion interladina y deriveia na conclujion generala en cont dl ladin standard . Nos duc (i idioms, les valedes) nes capion, dìjel, tamben tla comuncazion orala che scrita. Prova: el, sce al ti sciv a n badiot, ne à nia bria de adoré l ladin standard ajache l badiot capesc pu l gherdeina. Tant scempla é la chestion dl lingaz ladin.
Na domanda: l capéscel mo ence n fodom o ampezan canche al rejona y sciv per gherdeina?


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.388 seconc