benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La lege sun les mendranzes nueva tl Trentin
scrit ai 22 February 2008 da les 18:59:00 da noeles

Politica

La lege nueva sun les mendranzes tl Trentin

La relazion dl conseier a les mendranzes dr. Luigi Chiocchetti en cont dles desposizions nueves 

Image Hosting by PictureTrail.comEn vender, ai 8 de fauré à la Jonta provinziala aprové n dessegn de lege su les mendranzes linguistiches dl Trentin; na proposta de lege che vegnirà metuda tla programazion di laours dl Consei provinzial de chisc ultims meisc de legislatura. Al se trata de n dessegn de lege frut de n grup de laour metù su aldò, componù da raprejentanc dles trei mendranzes linguistiches che viv sun l teritore dla Provinzia Autonoma de Trent extra che dal sotescrit y da funzionars dl servisc per les mendranzes linguistiches dla provinzia daidés a livel tecnich da esperc.

 



Dessegur chi che à sapù de chesta nueva se à damané: percie pa vàl pa de uega na lege nueva per l stravardament y la promozion dles mendranzes linguistiches?
 Dantdaldut él ben fat recordé che la provinzia autonoma de Trent da n mudl de agn se dà ju per la promozion, tl ambit de sies competenzes, per l stravardament, la valorisazion y l svilup dles carateristiches etniches y culturales dles mendranzes linguistiches locales. Chest per mete en doura l prinzip de stravardament dles mendranzes linguistiches declaré dal art. 6 dla Costituzion, dl statut spezial dla Region Trentin Sudtirol y da les normes de atuazion aldò (souraldut dai decrec legislatifs 16 de dezember 1993, n. 592, 15 de dezember 1998, n. 487 y 22 de mé 2001, n. 261). N empegn che se à palesé, tl jì di agn, te na lingia de provedimenc normatifs metus a jì te momenc storics y contesć soziai y culturai desvalifs y te desvalives materies: dai profii istituzionai a la scola, a la cultura, al aprendiment, acertament y doura dl lingaz de mendranza, a la toponomastica, a l’informazion, a la trasmiscion dl lingaz tres i mass media. Encuei é l cheder normatif complessif en cont de mendranzes linguistiches dassen gran ma tl medem temp màncel n endrez; chest ne vuel nia dì che al sie vedl o nia adaté. Alencontra, per cerc aspec, él ence plu inant de chel dla Provinzia de Bulsan. Al se trata, tl concret, de n emplant che ne troa nia ispirazion te na filosofia unitara o che ne someia nia respone a na soula strategia ence percie che tempruma les leges sun les mendranzes nasciova desche resposta a les revendicazions di Ladins de Fascia per l reconesciment de mendranza linguistica y donca fòvel mìngol na “conzescion” da pert dla provinzia a chela comunanza.
Sen se tràtel de mete adum y endrezé te n test normatif unich les normes en cont de stravardament dles mendranzes, normes che tol ite les trei comunités, ladina, mochena y zimbra, n mudl desvalives l’una da l’autra. Sce da una na man él n rich panoram normatif en cont de mendranzes linguistiches, da l’autra se tròen tedant a na locia tl’aplicazion dla normativa o puramenter a n “entardivament” de sia atuazion:  al vuel donca ester n endrez nuef y souraldut mete en doura l gran numer de normes che à da vedei con les mendranzes linguistiches dl Trentin. Ma rencuré y ti dé n endrez nuef a la normativa te chesta materia ne vuel nia dì demé fé na operazion de “tecnica legislativa”; y defat l dessegn de lege aprové da la jonta ne é nia bele n “test unich” dla normativa sun les mendranzes. Al se trata de na proposta che fej na sintesa di reflèsc significatifs che an à realisé ti ordenamenc che rejona de stravardament dles mendranzes linguistiches per efet dl svilup istituzional y politich di ultims agns che à porté mudamenc inovatifs ti referimenc metus ju da la Costituzion, sibe per cie che reverda i desvalifs liviei de govern dl teritore - che troa sie fondament tl prinzip de “sussidiarieté” che tla valivanza de dignité de duc i enc teritoriai - sibe tl’evoluzion dl raport anter Istituzions y sozieté zivila. I mudamenc che al é sté ti ultims agn tla sozieté zivila y tl raport anter chesta y les istituzions, la maiour perzezion dla comunanza plu grana respet a l’emportanza dles mendranzes linguistiches desche pert dla identité dl Trentin, olache sia desvalivanza é na richeza. Les reformes emportantes che à enteressé chesta provinzia ti ultims agn (souraldut la reforma istituzionala y la reforma dl’istruzion), fej a na moda che sie debujegn de n endrez nuef dla normativa en cont de mendranzes linguistiches, da una na man per mete a fuech les antinomies y stimé la valuta dles normes en doura per l stravardament dles mendranzes y da l’autra per mete a jì posizions plu evoludes y de fazion te chesta materia, ence tolan ejempl da les esperienzes europeanes che se troa bele plu inant te chest ciamp. Al nasc enscì na proposta normativa che, touc fora i problems dés dal emplant normatif y regolamenté d’aldidancuei, ti sourandà al Trentin un di modiei de stravardament y promozion dles Mendranzes linguistiches anter i plu moderns tla Talia y tl’Europa.
            L pont da olà pié via é belavisa chel dla coscienza che les identités - en cont de carateristiches etniches, culturales y linguistiches - dla popolazion ladina, mochena y zimbra é n patrimone fondamental dla comunanza trentina entiera (enscì dij l art. 1 dla neva lege). Chest troa sie post te chel conzet de stravardament y de promozion dl’identité storica dla comunanza locala che tl Trentin é plu gaierda che autró y che é un de sie elemenc fondamentai. De fat l Trentin é caraterisé da n fort liam al teritore da pert de si sentadins, da n fon sentiment de partegnuda di singui a sia comunanza y da na situazion particolara de identité che é cis chela dles mendranzes, element vif, y da sostegnì, da l’identité de duc; chestes pò ester per la comunanza trentina na ocajion per mete a la proa sia capazité de fé integrazion y coejion soziala y culturala. Per chest  vuelel ester che l argoment mendranzes vegne fora dal certl strent de chi che é enteressés diretamenter, di “addetti ai lavori” per se renforzé y deventé patrimone de duc. Sce la coejion soziala é n ben dla comunanza entiera, l’azion de sostegn dles mendranzes deventa ciamò plu emportanta per na comunanza con identités desvalives desche chela trentina.
 
Ma ti cialon ai ponc fondamentai dla lege.
Prum. Al se paleseia la volonté de ti dé n endrez unitar al argoment mendranzes linguistiches. Mete adum te n test unich normes che reverda les trei comunités de mendranza dl Trentin, n mudl desvalives l’una da l’autra per lingaz, storia, cumpeida, condizions sozio-economiches y posizion sun l teritore, vuel dì nodé la gran emportanza dl argoment per la comunanza trentina y mete en cler les prerogatives de na comunanza olache al viv, con n bon livel de integrazion, cultures desvalives y lingac desferenc che la Provinzia vuel vardé via y sostegnì per garantì tl temp la souravivenza dla desvalivanza de modiei culturai y linguistics che adenjonta conserve liviei preziousc de coejion soziala.
Secont. Al vegn sorissé  ciamò plu clermenter la filosofia che la provinzia à adoté te sia azion de stravardament, valorisazion y promozion dles mendranzes linguistiches storiches locales: l critere “teritorial”. An rejona de comunanzes che viv sun cerc teritores dla provinzia caraterisés dal fat de avei n lingaz sie che se met apede al lingaz nazional tla doura de duc i dis y tla ofizialité di documents publics. N model nuef  per l ordinament talian ma che troa ejempli tl’Europa y che se arvejina dret al model dla Catalunia tla Spagna. L’art. 3 dla Costituzion dij de fat che “L castilian é l lingaz ofizial dl Stat. (…) Ence i autri lingac spagnoui é conscidrés ofiziai tl contest de sia “Comunités Autonomes aldò de si Statuc”. “La richeza di desvalives modìe linguistics dla Spagna é n patrimonie cultural che vegnirà respeté y vardé via a na vida particolara”. Da pert sia, l statut de autonomia dla Catalunia dij che “L Catalan é l lingaz ofizial dla Catalunia, deberieda al Castilian, lingaz ofizial de dut l Stat spagnoul”. Ciamò “La Generalitat (Region) garantiarà la doura normala y ofiziala di doi lingac; ala metarà a jì les mesures che và debujegn per arseguré sia conescenza…” y “la rejoneda spezifica dla Val d’Aran vegnirà respeteda y vardeda via a na vida particolara” (la Val d’Aran é na comunanza de mendranza tla Catalunia). y duc sà cotant che l sistem catalan da chest pont de veduda sie n model inovatif tl’Europa.
Terz. Al vegn declaré per i sentadins che fej pert de na mendranza l “dert de conesce l lingaz de sia comunanza y de l adoré tant a ousc che tl scrit te duc i raporc y les ocajions dla vita soziala, economica y aministrativa zenza cognei padì discriminazions” y l dert “de emparé l lingaz de sia comunanza y de avei te chel lingaz na dreta formazion”. En relazion a chisc derc végnel afermé “la responsabelté y l dovei” dla comunanza de mendranza “de garantì les condizions per la promozion de sie lingaz y per l’eserzize di derc de si sentadins”. Les comunités de mendranza linguistica cogn se fé ciaria, y al é giust che al sie enscì, dl dovei de fé a na moda che dutes les persones che fej pert dla comunanza posse conesce sie lingaz y posse se emprevalei de duc i derc di sentadins de na comunanza “speziala”. Chest tl cheder dl prinzip plu general che les Istituzions dla comunanza de mendranza cogn se dé ju per l stravardament y souraldut per la promozion de sia cultura y de sie lingaz.
Cuart. Al é vedù dant l’istituzion de n emportant istitut nuef: l’ “Autorità indipendente per le politiche a sostegno delle minoranze linguistiche”. Ala se trata de n organism de gran peis y independent che adenjonta a podeis de valutazion, souraverda y ispezioneia per la dreta atuazion y la realisazion la disciplina legislativa y regolamentara en cont de stravardament y promozion dles popolazions de mendranza linguistica. Ala à souraldut doveis consultifs ti confronc di enc che à responsabelté sun chesta materia y donca na funzion emportanta de sensibilisazion y de mediazion con podeis nia demé de solecitazion o de racomanazion. A chest organism ti pervégnel ence les funzions dl defensour zivich relatives a documenc y prozedimenc che va a pesé sun posizions giuridiches liedes al stravardament o a la promozion dles popolazions de mendranza.
Na dezijion emportanta y nueva tl panoram dla normativa de stravardament dles mendranzes che consent che tla fasa de atuazion dl emplant normatif végnel valuté tl merit la percacenza dles normes y che chestes vegne portedes a na politica coerenta y che se muev te na soula direzion. Cuint. Al vegn sorissé l prinzip che, dlongia ai istituc tradizionai metus a fondament de dutes les politiches per l stravardament de na comunanza de mendranza y che laora pro la valorisazion dla cultura y pro la doura dl lingaz, végnel pensé a strumenc che arsegureie n svilup sozial y economich che posse vardé via sia identité. Desche al é vegnù dit tla relazion al dessegn de lege “méssel vegnì metù a jì n sistem istituzional che permete liviei de autogovern, de autonomìa y de dezentrament aministratif i plu auc che al é meso, y na raprejentanza unitara dles desvalives comunités”.
Y chest deventa concret tres la previjion de n organism unitar, la “Assemblea mochena”, che tol ite i Mochens, dlongia a la raprejentanza istituzionala dla popolazion zimbra che é l consei de comun de Luserna; chisc se met dlongia al “Comun General de Fascia” che lieia adum i ladins de Fascia. Na previjion che é la dreta conseguenza dla reforma istituzionala y dl prinzip de “sussidiarieté” y dla valorisazion y responsabilisazion di teritores sun chi che ala troa sie fondament.
Sest. Al é pervedù che la composizion di organs dla provinzia y di enc publics y privac metus su y regolamentés da la lege provinziala, che à competenza sun i teritores olache al viv les mendranzes linguistiches, mess favorì la prejenza de raprejentanc dles popolazions de mendranza. Chest per sotrissé y amarscé l debujegn de integrazion con la comunanza trentina dles comunités de mendranza tla coscienza che chestes é na ressoursa reala per l Trentin y che laes pò sporje n contribut de utl al govern de chesta tera.
 
            Donca chesta  lege nueva se met desche n tassel emportant tl’azion metuda a jì da la provinzia tl contest de na atenzion y partezipazion dl Trentin ai gragn mudamenc che aldidancuei tol ite dutes les sozietés dl mond y che ne po’ nia lascé endò la valorisazion plena y veira de dutes sies componentes. A majera rejon sce an conscidreia  che “l stravardament y la promozion dles desvalivanzes culturales”, desche al é scrit tl program de chesta legislatura, “ne é nia demé una dles seves olàche troa fondament nosta autonomìa, ma ence la garanzìa de na crescimonia armoniousa y rica de dut l teritore provinzial”. Na nueva lege spiedl de n Trentin dinamich che se pon desche laboratore de idees nueves y de projec nuefs, element de trasformazion dl’autonomìa speziala te n strument de inovazion. Nosta autonomìa, ence sot a chest profil, ne è nia chieta y vigni moment de sia storia deventa ocajion per cueie la poscibelté de fé front tres modalités nueves a la gestion di profii che à da vedei con a defendura y la valorisazion de spezifiches carateristiches linguistiches y culturales dles mendranzes ladina, mochena y zimbra. L cheder de reformes normatives che à caraterisé chesta legislatura, y souraldut la reforma istituzionala y la reforma dla scola, che ti dà su a les Mendranzes linguistiches na pert de emportanza fondamentala tl contest dl endrez istituzional nuef dla provinzia y na posizion speziala tl sistem educatif de istruzion y formazion dl Trentin, fej a na moda che an ne posse fé  a manco de na nueva lege en cont de stravardament y promozion dles mendranzes linguistiches che viv tl Trentin. Na lege, desche chela proponuda, che scluj n certl y che se met en relazion con i prinzips che stà a la basa de chestes reformes. L dessegn de lege proponù é n model inovatif, unich y original tl panoram nazional y european en cont de stravardament y promozion dles comunités de mendranza linguistica. Per chest, canche al deventarà lege, cognaràl ester n pont da pié via per i intervenc sun l Statut de autonomia dla region Trentin-Sudtirol. An cognarà, te chela ocajion, tò dutes les dezijions, con l contribut di raprejentanc dles comunités de mendranza, percie che l emplant normatif complessif per l stravadament y la promozion dles Mendranzes linguistiches sie adaté al svilup istituzional, politich y sozial che é vegnù realisé te chisc ultims agn. Al ne podarà nia resté fora dal percurs de chesta prospetiva de endrez normatif-istituzional, per cie che reverda i Ladins, la volonté de reunificazion dles comunanzes ladines dles Dolomites deda adentene con forza tl referendum di comuns ladins de Fodom, Col y Cortina che encuei se troa tl teritore dla region Venet. L model de stravardament y de promozion dles Mendranzes che vegn fora da la lege nueva podarà daidé dò ence l percurs che cognarà porté a la reunificazion.
Sce la sodisfazion per chesta proposta de lege é grana, sce ala contegn soluzions inovatives y ence corajiouses, sce dut l emplant respon a na soula strategia outa a fornì i strumenc per l’elaborazion de politiches che posse sostegnì y valorisé les popolazions de mendranza dla Provinzia Autonoma de Trent, nia demé per arferé l prozes de erojion cultrurala y linguistica padì da chestes comunités, ma ence per valorisé sia identité y daidé do l svilup ence sozial tl respet dles carateristiches de vignun, tamben grana é la responsabelté che sen végnel metù tles mans dles comunités de mendranza per cueie, adum a les autres reformes che i on recordé, dutes les oportunités sportes da chest provediment normatif per respone al empegn de valorisé y sostegnì la cultura y l’identité dles popolazions de mendranza. Sen à les Mendranzes linguistiches dassen a la leta n model normatif che les valoriseia y che, sce entenù dlvers, les met te na posizion dassen inant tl panoram talian y european en cont de stravardament y promozion dles mendranzes linguistiches.
L’empegn dles Mendranzes linguistiches dal livel istituzional a les formazions soziales y culturales, da la scola ai singui sentadins, cognarà estr gaiert y segur per l dovei de onoré  tla vita de duc i dis sie ester “patrimonie fondamental dla comunanza provinziala” che ti permet de avei na atenzion primara y desferenta, aldò di temps. Te na parola, al ne basta nia na lege, ence sce ala é bona, per valorisé les carateristiches de identité, linguistiches, culturales di Ladins, Mochens y Zimbres y daidé do sie svilup: al vuel ester la volonté de chestes comunanzes de ester protagonistes de sie davegnì, che ales se embaste l am de interpreté tla mioura maniera sia identité y l sentiment de partegnuda a sie teritore y de orguei per sie lingaz y sia cultura. Avei strumenc normatifs ence nuefs ne joa a nia, sce chisc ne ciafa nia na resposta “tl sentì” y tla volonté de cresce dles comunités de mendranza. Demé enscì na posizion giuridica desferenzieda respet al rest dla comunanza trentina podarà vegnì entenuda y partida daldut.
L clam, donca, ai Ladins, ai Mochens y ai Zimbres é chel de tò su chesta nueva endesfida storica con la aodanza che ence chest strument normatif posse daidé a fé cresce la capazité de ne ester nia “privilejés” ma atours y costrutours de sie davegnì y protagonisć speziai dl’identité storica de duta la comunanza trentina.
 
Trent, ai 14 de fauré 2008

 
Luigi Chiocchetti
Assessour per les Mendranzes linguistiches
dla Region Trentin Südtirol

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.430 seconc