benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Union di Ladins de Gherdeina: plan 2008
scrit ai 15 February 2008 da les 21:51:03 da noeles

Gherdeina

2008: endò n ann plen de ativités

N rich program de manifestazions y de publicazions per l 2008 - Da d'auton vela dl consei nuef 

L consei de aministrazion dla Union di Ladins de Gherdeina à tles prumes edemes dl ann 2008 tegnù deplù sentedes. La motivazion dles truepes encontedes é l gran laour da mete ju apontin l program de ativité per dut l ann, ma dantaldut ence per les chestions de gestion dla cesa enstessa. Al é vegnù scomencé l ann con de gran energies y truepes de bones idees. Samben él ence vegnù rejoné dl referendum di vejins ladins fodoms y ampezans. An cialarà  a dutes les manieres de sostegnì y renforzé  la reunificazion di ladins dles cinch valedes.

L president en ciaria, Egon Vinatzer.



Dant a n’edema él spo vegnù trat adum y ofizialisé l program per l ann 2008. Scialdi emportanza tla programazion ti él vegnù dé a les manifestazions sozioculturales che reverda la sconanza y l miorament dla rejoneda y dl mantegniment de nosta cultura. Al é ence vegnù rejoné de ambient y de sozieté. L majer problem che an cialarà de ressolve y de jì inant tla pruma mesité dl ann é l projet dla Cesa di Ladins. Chilò ésen sun na bona streda de dialogh y de n bon raport ence con l consei dl Museum. Les speises de aministrazion é bendebot autes.
Bele l soul mantegniment y la manutenzion di enjigns y dla Cesa di Ladins, comporta per la lia de gran sacrifizes economics. La Cesa é tl zenter dl luech y perchel vuelen ence mostré su na cesa degnia de na valeda de cultura. La ULG ciala dagnora de sparagné dlonch olache ala và. Ma l’ativité dess jì inant dàn n gran contribut a la cultura y a la rejoneda ladina. Ultimamenter pro na enconteda anter l president dla ULG Egon Vinatzer con l assessour dla Provinzia de Bulsan Florian Mussner, él vegnù fora cler che l assessour conesc l problem dla Union y dla Cesa y sà ence da aprijé l gran empgn per tegnì en pe n’ativité culturala scialdi ghirenta y de bon livel ence sozial. Mussner cialarà de sostegnì inant la Union. Chesta encunteda  à dessegur porté pro da fé cresce la vueia de jì inant y de porté la lia do na dreta streda respetan i fins scric dant.
Ti proscims dis vegniràl tout su, do na selezion cureda y do che Zenz y Hilda é jus en pension, n’autra familia che à debujegn de n cuatier y che cialarà sun la Cesa di Ladins.
Bendebot de emportanza, adenfora de cialé de ressolve de vigni sort de problems aministratifs gragn o pici, ti él vegnù dé a les manifestazions endrezedes a la populazion. Entant l’ultima senteda scialdi longia y raidousa, é l consei sté bon de mete ju definitivamenter n bel program cultural rich de alternatives che ne fajarà dessegur nia paussé i membri dla union bele enscì souraciariés de laour.
N liber sun la usanzes te Gherdëina y d’autra publicazions: Sciche feter vigni ann ciala la ULG de dé fora, o almanco de scomencé l coordinament de valch publicazion. Entant ésen tl laour de ti dé forma al Calender de Gherdeina 2009. N auter laour é l liber sun les tradizions y usanzes te Gherdeina vedù da la pert cristiana ma ence pagana. An tegnirà spo cont dles sajons, dles festes, dl laour y dles credenzes. Chest vegnirà realisé tres la colaborazion anter Marta Senoner de Selva y Toni Senoner de Urtjiei. L liber é vegnù pensé de dé fora te trei rejonedes.
Per enjigné ca la publicazion dl CD Gramofon 2, él tratant vegnù aposté y dé su i laours de regisrazion al studio Sisi Record’s de Urtijei. L gran laour de organisazion, coordinazion y de selezioné les cianties y i gups é bele envié via.
Chertes per augurs : deberieda con la Scola d’Ert de Urtijei y con la souravijion y colaborazion dla professoura Bruna Senoner, ésen tl laour de fé chertes depentes a man per les aodanzes dla Pruma Santa Comunion, Confermé y per d’autres de beles ocajions, samben dutes acompagnedes con de biei tesć per Gherdeina o te trei rejonedes. De gra ence al diretour prof. Karlheinz Mureda de nes avei conzedù la colaborazion con sia scola.
D’autres manifestazions: L festival di cors di mutons dla Ladinia “Ciantede con nos”, cursc de gherdeina, na mostra enteressanta per l auton, na seira de cabaret y de leteratura ladina, l conzert d’avent, deplù referac ence con chedri a colours. An jirà inant enchin d’isté vigni seconda juebia dl meis con la trasmiscion Dolomit, da audì sun Radio Gherdeina. Al ne manciarà naine no valch autres manifestazions che va inant bele da deplù agn sciche la cripl viventa y e.i. Ence les plates internet dla ULG plej dassen. Entant l’ann 2007 éles vegnudes cialedes ite da 27.407 persones desferentes. Per n sit cultural dessegur na blota arjonta.
D’auton vegniràl tegnù la reunion generala dla Lia con la vela dl consei nuef.
La ULG n consei de 8 persones y na colaboradoura sterscia y volontiva te ofize tla persona de Ivana Moroder.
 
 
L ofize dla Union di Ladins de Gherdeina deberieda con la biblioteca Ladina, é davert al publich vigni di da les 9.00h dadoman enchin a les 12.00h y domesdi, fora che la juebia, vigni di da les 2.00 domesdì a les 6.00h da seira. Les sabedes y les domenies resta l ofize sclut.

 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.345 seconc