André Hofer, la liberté dl variuel
Doplaje tl lingaz ladin dla fiction todescia "Andreas Hofer - die Freiheit des Adlers"
En juebia ai 14 de fauré y en juebia ai 21 de fauré mostrarà la RAI TV Ladina, tla trasmiscion da les 20.30 l film "André Hofer - la liberté dl variuel". Enscì se clama la verjion ladina dl film "Andreas Hofer - die Freiheit des Adlers", film nasciù sot a la regia de Xaver Schwarzenberger, con Tobias Moretti desche atour prinzipal, jobelné aladò dl test de Felix Mitterer.
L doplaje tl lingaz ladin de chesta "fiction" per todesch é vegnù realisé tl ann 2007, da na idea de Gustl Kaneider, che à deberieda con Pablo Palfrader coordiné l projet. Pro l film se tràtela dla pruma sincronisazion per ladin de n film te n auter lingaz. L projet à raprejenté per i promotours na gran endesfida. La regia ti é vegnuda sourandeda tles mans a Mateo Taibon d’La Pli de Mareo, depierpul che le poet y ciantautour Iaco Rigo s’à festidié per la traduzion di tesć. L projet é vegnù finanzié da la Region Trentin/Südtirol, dal Comun de Mareo, da la Cassa Raiffeisen Val Badia y da deplù sponsours privac. La sincronisazion dl film é vegnuda realiseda con blot amatours. N valgugn ova bele esperienza tl mond dl teater, d’autri fova a sia pruma esperienza te chest ciamp. L film à podù spo vegnì prejenté l prum iade l ann passé, en la veia dla festa dl Sacher Cuer de Gejù, a Al Plan de Mareo. L film é ence da ciafé sun DVD, che an pò ence aposté telefonan al nr. 333/4762010 o al 335/1050216. "André Hofer - la liberté dal variuel" sarà da vedei sun la RAI TV Ladina anter does pertes, plu avisa la juebia ai 14 y la juebia ai 21 de fauré. La programazion met man dagnora da les 20.30.
