Les proscimes edemes sarà dezijives
Al vegn chirì i candidac da jì sun lista - Chesta ocajion, enscì MP Ladins ne pòn nia se arjumé via
Ai 30 de jené se à abiné a San Martin de Tor na bela cumpeida de persones, na sort de consei deslarié dl Moviment Politich LADINS, per ejaminé la prejentazion de na lista pro les lites provinziales 2008. La situazion ne é nia saurida, ajache da 4 agn ne à l MP Ladins nia plu n raprejentant tl consei provinzial de Bulsan per ti dé al moviment la visibelté che jissa de uega te chest temp zite per mete en pe na lista con de bogn candidac.
Al é sté na enconteda costrutiva olàche vignun à porté dant con responsabelté sies propostes y sies convinzions, coscienc de chest moment storich dezisif per l davegnì dla Ladinia. Conscidran ence l gran vare fat dai ladins da Souramont, daidés dai amisc dla Ladinia, per la reunificazion di ladins tla provinzia de Bulsan, fova duc a una che ala va debujegn de na lista ladina sciche esprescion politica autonòma de nosta mendranza.
Con de bogn argomenc y zenza ascone les dificoltés él gnù fora de bones idees y propostes per enjigné ca na lista con forzes nueves y con majeres poscibeltés de suzes. Chestes proscimes edemes provaràn da sclarì les cosses y da tò na dezijion.
