Dellai ne à nia dit de "scì"
Al conesc dret ben la situazion ladina, ma al ne ti à nia dit a la delegazion ciun che sarà l orientament dla provinzia de Trent canche ala messarà dé ju sie bensté per la anescion
“Nos volon la reunificazion dla Ladinia sot a na soula Region”. Chest é cie che ala ti à damané en lunesc, 17 de dezember, al president dla provinzia de Trent Lorenzo Dellai la delegazion formeda dai capicomuns de Col, Fodom y Ampez, dai presidenc dles trei unions ladines y dal coordinadour dl comité referendar Siro Bigontina.
“L’enconteda” dìjel ”fova vegnuda damaneda ciamò do l’indizion dl referendum per passé con la region Trentin–Sudtirol. Con Durnwalder nes onse vedù puec dis dant de voté. L president Dellai s’àl complimenté con nos per l resultat dl referendum y al nes à seguré la sia desponibelté per arjonje l’unité di Ladins del Sela.” Valch referiment a la posizion che tolarà la provinzia de Trent canche al sarà la ora de voté tl consei regional la domanda de anescion di trei comuns? “No” dij Bigontina, “Dellai ne se à nia destadiré, coche al ne à fat degun referiment ai autri comuns che à fat l medem referendum. No nos ti on splighé che nos volon che al vegne mantegnù la volonté dla jent, sauteda fora dal referendum che fossa chela de passé de region. Ence sce al à recordé che la streda ne sarà nia saurida, é n iter referendar envié via, l president à dit de ester davert a vigni soluzion.” Content ence l capocomun Gianni Pezzei. “La vijion daverta y la gran cognizion dl problem dl’unité ladina de Dellai é per nos na garanzia de nost obietif referendar.” Do i capicomuns y i presidenc dles unions ladines, s’à Dellai ence enconté con la jonta dla Lia di Comuns, te chesta ocajion raprejenteda dal vizepresident y Capocomun da Col Paolo Frena y dal capocomun de Vich de Fascia, Gino Fontana. “Dal president” conta Frena, “onse abù la plena desponibelté a la colaborazion da pert dla provinzia de Trent ai projec comuns che nos enviaron via. De chest vers ti àl dé cherta blancia al dot. Marco Viola, sourastant dl servisc a le mendranzes dla provinzia, per ti sté do a nostes iniziatives. Bele do les feste da Nadel, jironse auna a Roma per descore con i funzionars dl ministere de co podei pro ai finanziamenc prevedus da la lege 482/99.
(ls)
