benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Hermann Grossrubatscher nes à lascé
scrit ai 03 March 2003 da les 07:26:11 da noeles

Persones

 

"Nton y cuntënt me sentivi canche i fovi tl bosch, sentà pra na pitla fontana d'ega frescia y pudovi scuté su la melodia mujela dl'ega"

 

L zipladour y musizist Hermann Grossrubatscher nes à lascé, a 68 agn. Sia musiga popolara y si raimli musichés da el enstes à daidé descedé Gherdeina ti recordan la beleza de sia "rujeneda", de sie ambient y de sie laour artistich y turistich. Al à soné y cianté dantaldut sia valeda. N pue duc i setours dla vita é passés tres sia anima poetica y musicala: da les matedes y la bona luna a les orazions y devozions a Santa Maria. D'ert y de profescion zipladour, ma a temp lede musizist y componist. Co passé l temp ne n'é mai sté n problem, plutost ti manciòvel.



Deberieda con sia femena àl trat su na bela familia, n mut y 3 mutans, che ti à tres volù n gran ben, dal sanch musical sciche el y tres enjigneda a jì a proes. Sia familia é conesciuda lonc y lerch propi per sies manifestazions musicales. L grup musical Grossrubatscher vegniva cherdé n pue da vigni pert, al é sté enchinamai tla America. Al ne se daudova nia da jí a soné con sia familia ence pro i ladins da Souramunt y te Fascia. Al é ruvé te trueps paisc sud-y nord tiroleisc y ence plu dalonc ti paisc todesc. Dlonch lasciòvel audí la rejoneda de Gherdëina y al à fat conesce Gherdeina. N ladin tiroleis, ma souradut y zenza ombries ladin. Sie sistem pedagogich de tré su la familia, cherian festa y vueia de sté adum con la musiga, é vegnù tout su oramai da cotant de autres families. Al à lauré dassen, ma al à ence volù che sia femena fajess dandaldut la oma. La familia ti é tres steda a cuer y i mutons y les mutans ti à stimé y volù ben. Grossrubatscher é ence conesciù sciche zipladour, autour de de gragn Crisc': un de chisc, fat per na plovania taliana, é enchinamai vegnù benedí dal Papa. Hermann fova na persona dassen sensibla, amich de Luis Trenker y de d'autres pesonalités de Gherdeina, dla provinzia y de Tirol, ma nia dagnora aprijé da valch artist de val.
Recordon valgunes de sies esprescions: "Nosc pitli ie cresciui su cun mujiga y dantaldut cun na bona oma, che ie for stata cun gran amor pro si pitli. Cun de blota cianties adatedes univa nosc pitli uni sëira acumpaniëi a durmí da si oma. Canche i ova da 3 a 4 ani, ciantans bele deberieda tel pitla cianties acumpaniedes dala ghitarra. Per nes crié nosta bela gheneda, ons fabricà na cësa, dut sun de gran debitons vieres dla banches. On abù 30 ani da la paié ju, cun dastramp de gran sacrifizi y perchel ons for abù na gran stenta, ma just per chel ons for abù dastramp bel te familia y for tení adum. A avei patins (ospiti/turisti) te cësa, fossel nia stat mesum tré su duta na familia cun mujiga. Sovenz me ven fates la domandes: Co fejeisa a tení adum duta la familia che sona bele tan giut deberieda? Ne avei nia l complexe a stè te cësa. Depona fé puecia proves y canche n fesc prova, pona dessel vester tl medem tëmp na pitla festa te familia. Npue se la suné, npue se la rí y a mesa la prova ven mi fëna da suaut ju cun zeche de bon da bever y da maië. Dassënn de nportanza ie ënghe suné puech y jí a suné puec iëdesc a l an, y chël mé ulache a duc ti sa veramënter bel. Pona mantení te nosta vëira mujiga populera l diletantism, samben zënza ulei fé l var plu lonch dla jama y tení cont dla capaziteies de duta la familia. Mo zeche de me nstess. Son uní tra su plu o manco tl bosch. Ië fovi enravisà ite tla natura y perchël fova l jí a scola elementera per me en spinacian (ficer) te n uëdl. A jí ju tl luech a Urtijëi fovi for sprigulà. Nton y cuntent me sentivi canche fovi tl bosch, sentà pra na pitla fontana d'ega frescia y pudovi scuté su la melodia mujela dl'ega, l' armonia dl muvimënt di lëns, nanei dal vënt de Resciësa. Chësta fova la mujiga de mi cuër. Ei abù na bona oma y n pere da na capazitá de marueia da ziplé tl lën.Me ncunfortovi dastramp canche l pitl mandl che jiva da na cësa a l'autra cun si mercanzia te n tel pitl castl de lën, ch'el purtava sun l spinel, cherdova ënghe te nosta cësa, lasciova ju sun mëisa te stua si pitl castl y trajova ora i tatli. Te un de chisc tatli fova i organi da bocia de fabricazion Knitlinger y mi pere n cumprova unitant un a mi. Nscila à scumencià mi legrëzia a fé nstess mujiga. (uc)


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Hermann Grossrubatscher nes à lascé (ponc: 1)
da tomescbornert ai 03 March 2003 da les 16:08:39
(Infos sun l utilisadour | Ti mané n messaje privat)
de gra al segneur Hermann Grossrubatscher per si contribut de valeur a fe conescer incanteur la mujiga, pert de nosta arpejon culturela. De gra per avei descedá te truepesc la legreza per la mujiga.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.370 seconc