Al vegn chirì la parola y la parolata dl 2007
Na iniziativa metuda a jì dal Sudtiroler Kulturinstitut, da la EURAC y da la repartizion ladina dla université de Bulsan
Cie é pa la “parola” y la “parolata” dl ann? La parola dl ann é na parola che à fat rejoné la jent, che à gaujé discuscions, che é steda tl zenter dl’atenzion tratant l ann 2007. La vela dla parola dl ann à na gran tradizion ti paisc de lingaz todesch. Chest ann él vegnù lité tla Svizera “Sterbetourismus” (davia che chest paisc à na legislazion sun l’eutanasia dret liberala) y tla Germania “Klimakatastrophe” (pervia dl resson che tematiches ambientales à al moment tla discuscion publica). Te Südtirol rùven sen a la terza edizion de chesta manifestazion. La parola ladina dl ann 2006 é steda “université” (a gauja dl’istituzion dla pruma professura de ladinistica al mond).
La parolata dl ann (ampezan “parolata” = burta parola) é endere na parola nia o puech garateda dal pont de veduda linguistich, ajache ala prova da abelì o da ascone la realté. La parolata dl ann 2007 é steda “nëif prugrameda”, davia che ala dà da entene che chesta neif sie dagnora desponibla, depierpul che l invern ciaut dl 2007 à desmostré che contra la natura ne la davagna nience la tecnica. L Post linguistich dl Südtiroler Kulturinstitut, l’Istitut per Comunicazion Spezialistica y Plurilinguism dla EURAC, l Zenter Linguistich y la Repartizion Ladina dla Université Ledia da Bulsan envieia endò duc i ladins da fé propostes per la “parola” y per la “parolata” dl ann 2007. Les propostes ladines pò vegnì menedes fin a i 13 de jené 2008 tres e-mail a la miscion:
Liam e-mail (cliché sun parola-parolata y indiché les does paroles): Parola-parolata
