La consulta per les families se dà n statut
Al vegn tresfora rejoné de economia y de turism, ma ence les families con fions enconta tres plu problems - Familia Card
Do na fasa longia de preparatifs y de abinedes él vegnù prejenté i dis passés a Poza de Fascia la consulta nueva dles families. Te chesta ocajion àn tamben tegnù la pruma senteda publica tla gran sala dl comun. Al fova na enconteda dassen emportanta a chela che al à tout pert truepes autorités y responsabli dla vita dl'aministrazion de Fascia y dla provinzia de Trent: anter chisc l'assessoura provinziala Marta Dalmaso, Luciano Malfer dirigent provinzial dles politiches soziales, Lucia Claus y Alessandra Viola dla portela Familia de Trent, l president del comprensore C 11 Leonardo Bernard, l'assessoura comprensoriala a les politiches soziales Alessandra Cloch, dlongia ai raprejentanc di comuns y dla lia " Famiglia Insieme" y "Movimento per la vita" y en plu l'assoziazion "Flem y Fascia adum". Familia fasciana (cliché sun la foto per la engrandì).
L capocomun Cloch de Poza a recordé desche an rejona gonot demé de turism y de economia, se desmentian depierpul les chestions liedes a la familia, a si problemes y a les grovaries dl vive che les families enconta. La consulta dla Familia raprejenteia n moment concret de deidament a les families de Fascia. Ala é deventeda a chesta vida na assoziazion nueva che laora te chesta direzion. L'assessoura dla provinzia de Trent Marta Maso a sorissé l'emportanza de chesta consulta che sarà dessegur luech de referiment y de deidament per dutes les families de Fascia.
Entant la senteda él vegnù liet ju l statut per entene ciugn che é i obietifs. Trueps é liés a la Familia CARD, na cherta de desconc per families tla stenta, d'autri a les politiches tarifares per les families, a l'ativité de formazion per la copia, ai servisc per les families con fions, a la chestion dla pruma ciasa che é per truepes families dagnora bendebot de problem.
Entant la senteda él ence vegnù lité l consei diretif nuef che veid en raprejentanza de Cianacei Lucia Carmignani y Federica Iori, Chiara Lazzer y Giorgio Riz per Ciampedel, Maria Cristina Rizzardi y Maria Grazia Spinel per Mazin, Evelyn Bortolotti y Giovanni Sornatale per Poza, Carlo Camerano y Lena Zanon per Vich, Elena Bernard y Cristina Zulian per Soraga y Donatella Compagnoni, Fulvio Chiocchetti, Stefania Dellagiovanna y Cristina March per Moena. Coordinadour é l moenat Fulvio Chiocchetti da agn aficé tl chirí respostes ai problems familiars: l'aodanza é che la consulta nueva posse dé respostes concretes ai problems dles families che é ence te Fascia cotanc y gragn, dessegur deplù chi che an veid y che an podessa creie.
Domenico Volcan Terla
