benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Paroles dl conseier dr. Luigi Chiocchetti
scrit ai 06 December 2007 da les 19:43:27 da noeles

Politica

Provinzia de Trent: reconesciment plen dla Lia y dla Generela

La Union Generela ne vegn dutaorela nia reconesciuda ofizialmenter da la provinzia de Belun y da la provinzia de Bulsan - Paroles dl conseier dr. Lugi Chiocchetti: "An mess sen chirì les sinergies anter istituzions-Lia-Generela"

Tres l’adozion dles deliberazions de en vender ai 19 de otober, à la jonta provinziala de Trent dé n auter vare per l sostegn y l renforzament dla unité di Ladins dles Dolomites. Tres chest provediment, defat, végnel reconesciù formalmenter la Lia di Comuns Ladins desche organism de coordinament y de proposta per la tratazion de chestions y problematiches dles popolazions ladines che viv entourn al Sela. Chest reconesciment ruva te n contest y te n moment storich emportant per i ladins: n moment che porta segnai gaierc, souraldut da la provinzia autonoma de Trent y da sie president, a na moda che al ti vegne dé la dreta conscidrazion al popul ladin y a sies istanzes.

 



      Segnai desche l reconesciment dla Union Generela di Ladins dles Dolomites desche partners dl PAT, deberieda ai comuns fascians y al comprensore ladin de Fascia, per la promozion dla mendranza linguistica ladina desche esprescion dla unité culturala y linguistica dla Ladinia, l reconesciment dla Lia di Comuns Ladins, la reforma istituzionala dl PAT, la reforma dla scola da una na man; i ejic dl referendum fat anter la jent di comuns ladins storics dla provinzia de Belun per la reunificazion con i ladins dles valedes dolomitiches da l’autra man; dut chest nes ensegna che olache al é na volonté gaierda y canche an crei tles idees y ti oms che les porta dant, pò dut cant vegnì arjont.
 
            L reconesciment dla conferenza di ombolc Ladins é n auter vare che paleseia la volonté dles istituzions de daidé do l prozes de unité anter les valedes ladines, n prozes de cooperazion anter les provinzies out a sostegnì l stravardament y la valorisazion dles mendranzes linguistiches.
 
            An liej tl statut dla Lia di Comuns Ladins che, anter i obietifs dl organism nuef, dlongia al renforz di raporc aministratifs anter i comuns ladins y la gestion coordineda di servisc y dles ativités de competenza de chisc comuns, él ence chel de «vardé via, svilupé y renforzé l patrimone cultural y linguistich de dutes les comunanzes locales, per valorisé chestes particolarités ladines en generèl» y chel de «mantegnì y de renforzé l sentiment de partegnuda a na soula entité sozio-culturala y i liams che al é anter les comunités che viv entourn l Sela».
 
            Con chisc obietifs clers, capéscen coche la provinzia autonoma de Trent ae plena comprenjion dl’emportanza y dl segnificat dl sentiment del popul ladin de partegnì a na soula entité sozio-culturala y la volonté de unité di ladins dles Dolomites, ti dan sie reconesciment ence a la Union Generela di Ladins dla Dolomites che, adum ai istituc culturai, vegn conscidrés da la provinzia autonoma de Trent «partners “da ne podei nia fé a manco” per l stravardament dl’identité, dl lingaz y dla cultura ladina» desche organisazion che à raijes fones tl teritore dla Ladinia dolomitana, che da semper laora do al stravardament dla mendranza linguistica ladina con scomenciadives de valour y anter chestes ence tres l sfuei ladin “La Usc di Ladins”.
 
            Cie che é  sen sun meisa é l renforz dla unité anter i ladins de Trent, Bulsan y Belun. Chesta podarà ciafé realisazion tla mesura che ti jian adencontra a chestes chestions liedes a la identité, a la cultura y al lingaz, saràn bogn de troé sinergies y cooperazion anter la Lia di Comuns Ladins, la Union Generela di Ladins dles Dolomites y i istituc culturai. Da chilò l’emportanza dl “segn” dé da la jonta provinziala de Trent acioche la “Lia di Comuns Ladins” deide do l’unité di Ladins laoran deberieda con chisc sogec.
 
            Demé enscila podaràn sclarì l sotissoura che é vegnù fat anter la conferenza di ombolc Ladins, la “Lia”, con l debujegn de n comité che paleseie, metan en doura la lege 482/1999, les chestions liedes a l’identité, a la cultura y al lingaz ladin.
 
            La aodanza é che, sun la basa de chesta unité de obietifs y de sinergia anter i sogec nominés desssoura, rùven, desche bele fat da la jonta provinziala de Trent (y da duc i conseis de comun de Fascia), a chel reconesciment dl’Union Generela di Ladins dles Dolomites ence da pert dla region autonoma Trentin-Sudtirol y dles provinzies de Bulsan y de Belun.

L conseier dr. Luigi Chiocchetti


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Paroles dl conseier dr. Luigi Chiocchetti (ponc: 1)
da travers ai 06 December 2007 da les 17:08:01
(Infos sun l utilisadour | Ti mané n messaje privat)
Fianlmenter zachei che à na vijion clera, generala y unitara dla chestion ladina. Cie contast con la politica ciampanilistica, isolazionistica y antiunitara dl assessour a la cultura ladina de BZ!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.415 seconc