benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum: lege ordinara o lege costituzionala
scrit ai 30 November 2007 da les 19:52:05 da noeles

Politica

Passaje da region a region: deguna lege costituzionala, ma ordinara

Carlo Willeit rata che al ne va nia debujegn de na lege costituzionala, ajache no tla costituzion no tl statut de autnomia ne él de tel clausoles

Vuelel ester na lege costituzionala o na lege ordinara per l passaje de comuns da na region a statut ordinar a na region a statut spezial, tl caje concret chela dl Trentin-Sudtirol? La desferenza é bendebot grana. Depierpul che per na lege ordinara val debujegn demé de na maioranza scempla (50% di parlamentars +1) jìssel debujegn pro leges costituzionales de na maioranza dret ampla de 2/3 (ciamena y senat con letura dopla). Carlo Willeit, giurist de dert publich, rata che al ne va nia debujegn de na lege costituzionala, ma che al cleca na lege ordinara. Al en é endere, sciche l parlamentar di Verc Marco Boato, che rata depierpul de scì.



Art. 132
1. Si può, con legge costituzionale, sentiti i Consigli regionali, disporre la fusione di Regioni esistenti o la creazione di nuove Regioni con un minimo di un milione di abitanti, quando ne facciano richiesta tanti Consigli comunali che rappresentino almeno un terzo delle popolazioni interessate, e la proposta sia approvata con referendum dalla maggioranza delle popolazioni stesse.


2. Si può, con l'approvazione della maggioranza delle popolazioni della Provincia o delle Province interessate e del Comune o dei Comuni interessati espressa mediante referendum e con legge della Repubblica, sentiti i Consigli regionali, consentire che Provincie e Comuni, che ne facciano richiesta, siano staccati da una Regione e aggregati ad un'altra,

L articul 132, tl secont coma che reverda l passaje de comuns, ne veid nia dantfora l iter de na lege costituzionala che é depierpul espressamenter vedù dantfora per la formazion de regions nueves tl coma 1 dl medem articul. Che les regions a statut spezial ne é nia blindedes da prozedures costituzionales à la Court Costituzionala ence confermé tres sentenza n. 66/2007 tres chela che ala à desbuté n recurs dla region Aosta contra la indizion dl referendum tl comun de Noasca tl Piemont, che ova endit n referendum per passé via tla region Aosta.

Carlo Willeit rata che "dal moment che no l articul costituzional y nience l statut de autonomia dla region Trentin-Sudtirol y respetivamenter dles does provinzies autonomes de Trent y de Bulsan ne contempleia espressamenter na tel clausola tl caje de ampliament teritorial, él da raté che al cleche na lege ordinara". Chest é ence plu logich do la reforma costituzionala dl 2001 che à  daurí l ciancel a la poscibelté de passaje da region a region, plu avisa dl 2004 canche la Court Costituzionala à sentenzié che al ne va nia plu debujegn de interpelé tres referendum les popolazions dles respetives provinzies de destach/agregazion, ma che al cleca n referendum ti comuns enteressés a na mudazion teritoriala da region a region.

Dut é pié via n valgugn agn denant, plu avisa dl 2001 canche l govern Amato dl zenter man-ciancia à reformé l titul cuint dla Costituzion (Regions y autonomies locales)  che tol ence ite l articul 132. L secont coma dl articul 132 é vegnù scemplifiché y clarí: al é vegnù delimité l raion te chel che al pò vegnì tegnì l referendum consultif al comun enteressé (y nia plu a les provinzies entieres) y al ne ti vegn dé plu degugn ours despositifs al legisladour che mess enjigné ca na lege de passaje aladò dla volonté referendara. Enscì él vegnù a se l dè de refles la ilegitimité costituzionala dl secont coma dl articul  42 dla lege di 25 de mei 1970, n. 352 che regoleia l dejouje di referendums. Al é sté l comun furlan de San Micjel a Tiliment/San Michele al Tagliamento tla region Venet a dejanché la prozedura stara, prejentan recurs al Ofize zentral di referendums pro la Court de Cassazion. L Ofize ova desbuté la domanda de destach demé en basa a la deliberazion comunala. L comun à empugné la delibera pro la Court Costituzionala che à sentenzié con la sent. n.  334 dl 2004, declaran la ilegitimité costituzionala de pert dl articul 42 dla lege sun i referendums (352/70), ratan massa pesocia la desposizion che per n eventual destach/agregazion messéssel vegnì damané les popolazions dles respetives provinzies tochedes. Chesta sentenza ti à dé speranzes nueves a trueps comuns che ova bele dé adentene plu outes de mudé region, desche Anpezo, Fodom y Col. Al ne é ciamò degun caje concret de passaje che vel desche model. Dal moment che la reforma costituzionala dl 2001 à prevedú na scemplificazion per l passaje, él da deduje che al ne entravegne nia - do avei arjont n referendum positif - na prozedura de lege costituzionala che comportassa n enciamp bendebot aut. Al ne é nia sclut fora che la Court Costituzionala mess ciamò n iade sentenzié te chest ciamp. Entratant él tla Talia 171 comuns che vuel n mudament teritorial/regional. Na pert à bele tegnù l referendum y al ne se trata endie ne nia de n fenomen limité a comuns entourn a regions a statut spezial.
.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.364 seconc