La Svp de Gherdeina: les contradizions

Ultimamenter sona la ciampana dla Svp de Gherdeina n pue manco sfoleda

Da chest referendum de souramont àn podù lieje toutes de posizion y comunicac stampa de feter vigni colour. L plu ti uedli ai ladins ti é dessegur juda la posizion che i ladins dla Svp de Urtijei à tout; ai se mostrova contra la sourantouta de souramunt pro Bulsan; tl medem corn à soflé nia demé un n iade l raprejentant ladin, Florian Mussner: "Chi da souramont podéssen ben ence daidé, sce chi ladins romagnessa olache ai é". Spo me damani ie: ne éssen nia podù i daidé enfin a sen bele cotant? An sà pu tant debujegn che ai essa per sia cultura, per erje deplù sie lingaz, per emponté sie Istitut Ladin “Cesa de Jan?” Al é veir, chesta posizion freida defront a souramont ne vegn daldut nia capida no dai autri ladins no dai todesc! Chi scì se à desmostré amisc di Ladins con ester atira PER Souramont, duc i partis todesc a una adum con i scizeri.

Co é pa la contradizion anter la posizion dla Svp de Urtijei y chela dla Svp da Bulsan da entene? Co pòn pa ester decontra da tó su ladins pro la familia ladina, chi che é stés cotant de secui pro Tirol? Volòven ti dé dert al fascism sun co che al à traté i ladins? La familia ladina pò demé vegnì renforzeda con deplù oujes, con na identité plu gaierda, sce ala à na maiour garanzia da ti ester ai pericui che la sita tres.
Nia dadie àn podù audì y lieje che l rebech é vegnù destout: sen ne sona la ciampana da Urtijei nia plu tant sfoleda desche denant, ala sona miour sen do che l resultat dl referendum de Souramont é ju fora a feter l 80% de PER Balsan; chest fej gran plajei sce la delouta é senziera. Spo podaràn speré che chi dla Svp de Gherdeina se alisteie pro i autri ladins, che ai ne sciampi nia plu fora de souc, che ai tire tla medema corda, che ai respeteie duc i Ladins; che ai deide ruvé duc i Ladins a arjonje i medems derc y che al ti vegne conzedù ai ladins ence dut cie che al ti mancia ćiamò per ruvé a n tratament giust dlongia i autri grups.
Lois Trebo