benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lia di comuns ladins: enduneda a Cianacei
scrit ai 22 November 2007 da les 18:48:28 da noeles

Politica

La Lia di comuns ladins peia via con sies ativités

Sen n iade demé 3 projec sun meisa - Plen sostegn ai comuns referendars sun sie troi devers la region Trentin-Sudtirol - Tost na enconteda con Lorenzo Dellai


 
A Cianacei/Fascia él vegnù tegnù enier la pruma senteda de laour dla Lia di comuns ladins do l reconesciment ofizial da pert dles trei provinzies de Trent, de Bulsan y de Belun. Al fova ence vegnù encondé la partezipazion dl president dla jonta de Trent, Lorenzo Dellai, che à tl ultim moment desdit per empegns prioritars a Trent. Te sia luegia él vegnù adalerch l assessour Luigi Dellai. Mancé manciòvel l ombolt de Badia, Ugo Dorigo, chel de Ciastel, Hartmann Reichhalter y chel de Ciampedel, Leonardo Bernard. "Con Dellai", enscì l vizepresident dla Lia Paolo Frena, "nes encontaronse plu inant pro na abineda dla jonta (metuda adum dai ombolc Bruno Senoner, Gino Fontana, Paolo Frena y Franz Complojer, n.d.r.). I ti é clermenter damané n sie aiut finanziar y sun chest rejonaronse".



Sun meisa él naoutatant vegnù metù trei propostes concretes de merscia culturala da mete a jì tl ann che vegn. La pruma proposta reverda n projet linguistich da envié via deberieda con les universités de Trent, de Bulsan y de Personen. L secont projet veid dant la realisazion de n vocabolar ladin on-line. L terz projet, metù dant da Paolo Frena, vedessa dantfora scomenciadives culturales d'isté per mutons dles scoles dl'oblianza. "Tres chest projet", dij Frena, "daidàssen truepes families che ne sà nia olà via con i mutons via per l isté. Empera arjonjéssen doi obietifs, i mutons fossa sot souraverda y nia en banon sun les plazes, en plu vegnìssei afrida de emparé zeche madurì te sia cultura." Y tl davegnì pa? Frena: "I pensaron soura? L obietif é chel de envié via cooperazions ence tl ciamp economich che reverda dutes les valedes." Deguna discuscion sun temesc ciauc sciche chel dl transiament soura i joufs? "Nou", dij Frena. Anter les tratandes al orden dl dì fòvel ence chela dla cuota de assoziazion che é vegnuda determineda te 2000 euro per comun, plu na cuota che i comuns ladins paia ite aladò dl numer de popolazion. I ombolc ladins à spo arjont plena acordanza tl sostegnì i trei comuns ladins de Col, de Fodom y de Anpezo te sia batalia per mudé ju region. La enduneda plenara de duc i ombolc se abinarà endò de auril dl 2008. (lo.so.)

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.382 seconc