Amisc dla Ladinia: "Los von Belluno!"
L comité contradij la Svp de Gherdeina: nience la colaborazion di comuns ladins tla "Lia di comuns ladins" ne pò sostituì l obietif de na Ladinia sot a Bulsan
Sun la touta de posizion dla Svp de Gherdeina y dantaldut sun sia polemica dla "provinzia ladina" tol sen posizion l comité "Amisc dla Ladinia Unida". L comité rata ence che la "Lia di comuns ladins" y la "colaborazion" tant decianteda ne pò nia sostituì l obietif de na Ladinia unida aministrativamenter sot a la provinzia de Bulsan. "L comité", enscì sia comunicazion, "constateia con plajei che sen él ence la SVP de Gherdeina che definesc l confin sun i joufs de Ciaulonch y de Valparola cie che al é veramenter: n confin fascist ingiust che é vegnù trat dl 1923 y spo danuef dl 1945 contra la volonté di Ladins per podei i assimilé plu debota. L "Scì" cler per Südtirol (78,87% de "scì") fossa tl passé tomé fora ciamò plu gran, ma a la ghiranza porteda dant plu outes ti agn 1945-48 de tegnì n referendum a Anpezo, Col y Fodom ti à les autorités talianes responù con la proibizion de manifestazions publiches y con l saré via i promotours. Chest ne à endere nia sprigolé i conseis de comun de Anpezo y de Fodom de deliberé plu outes (dl 1947, 1964, 1973, 1974 y 1991) de volei ruvé endò pro Südtirol.
Chestes deliberazions é samben atira vegnudes declaredes zenza fazion da Aunejia. La volonté di 3 comuns ladins-tiroleisc de vegnì endò pro Südtirol fova perchel tres viva y pro l referendum di 28-29 de otober se àla endò manifesté clermenter.
Avisa 50 agn do l "Los von Trient" de Südtirol à i 3 comuns ladins-tiroleisc de Souramont proclamé sie "Los von Belluno (demez da Belun)". Nos speron che coche i politics de longia veduda da enlaouta é stés bogn da conduje Südtirol pro sia autonomia, saràl ence sen i politics plu sensibli defront a les mendranzes che sostegnirà la unité di ladins tla provinzia de Bulsan."
L comité "Amisc dla Ladinia" sotrisseia ciamò n iade che la domanda referendara fova: "Voleise che l teritore di trei comuns de Anpezo, de Fodom y de Col Santa Lùzia vegne destaché da la region Venet per fé pert integranta dla region Trentino-Alto Adige/Sudtirol?" y che l comité referendar da Souramont y l comité "Amisc dla Ladinia Unida" se bat demé per chest obietif. D'autri obietifs (sciche p.ej. chel de na provinzia ladina) é minonghes privates che vignun pò avei te na democrazia, ma che ne corespon nia al soul fin di promotours dl referendum che é: la reunificazion aministrativa di ladins sot a la provinzia de Bulsan.
Sclujan ju sotrisseia l comité che "nos raton na colaborazion plu ampla anter i comuns ladins tla "Lia di comuns ladins" n fat plajoul y che é te nostes intenzions, ma na colaborazion mioura ne pò nia remplazé l obietif dla unité di ladins. Despartis te 3 provinzies, te 3 diozejes y te 2 regions ne souravivarà i ladins nia die, cis sce te una de chestes provinzies/regions (Belun/Venet) ne ti végnel reconesciù ai ladins storics degugn derc de mendranza (raprejentanza politica, doura dl lingaz te scola, tla aministrazion y ti media)."
