Noeles.net - Informazion ladina - Reunion generala dl MP Ladins

MP Ladins devers les lites provinziales 2008

Lites provinziales, referendum da souramont, renovament dl consei y dles enciaries dl MPL, chisc n zacotanc di tems dla reunion generala ai 24 de november a Urtijei

L Moviment Politich Ladins tegn chest ann sia reunion generala en sabeda, ai 24 de november, da les 3 domesdì a Urtijei, tla sala Ghisela dla Cesa de paussa S. Durich con n program che tol ence ite la preparazion per les lites provinziales dl 2008. De chest vers ciala fora enfin a sen la situazion ciamò empermetoula dal pont de veduda legislatif. A la Svp ne ti él nia garaté de fé jì tres - enfin a sen - tl consei provinzial de Bulsan na lege litala nueva con scialier lital o mandat plen, per gauja dla oposizion bendebot gaierda dl conseier de Unitalia, Donato Seppi. A sostegn di ladins él perauter ence na sentenza costituzionala, la n. 356/1998 che dij clermenter che na lege litala tla provinzia de Bulsan ne pò contegnì degun lim lital, nience chel dl mandat plen che coresponessa a 2,9%. Al é na sentenza dla plu auta Court giudiziara dl Stat, la Court Costituzionala.

Heinrich Demetz (Adi), president dl MP Ladins.

La reunion generala veid dantfora l salut dl president, Adi Demetz. Dedò vegniràl fat n rendicont dla ativité dejouta entratant l ann 2007, splighé l program per l 2008, la situazion de cassa y metus dant per l'aprovazion da pert dla assemblea.
Do chesta pert "burocratica" passaràn a relazions curtes con l comerzialist dr. Stuffer Luis che rejonarà de: "Les coutes é massa autes, ales peisa for de plu sun i conc dles families y dles piceres aziendes". Dr. Lezuo Ivan, storich y president dla Comunanza ladina a Bulsan, rejonarà dles conseguenzes dl referendum de Souramont. Na ampla lerch tolarà samben ite les lites provinziales dl 2008. Al rejona l president dl MPL Heinrich Demetz: "Lites provinziales 2008, situazion di ladins y previjion per la Lista LADINS". Dedò saràl lerch per la discuscion, propostes, minonghes y an passarà al renovament dles enciaries dl MPLadins scrites dant dal statut do 3 agn de ativité y an tolarà na dezijion sun l aument dl cumpeida di consiadours/res. Daldò litaràn l consei nuef. La enconteda se scluj ju con na picera marena y aorela curta sot al moto: "Unité di ladins, ester ladins, resta demé na bona aodanza zenza la dreta organisazion soziala y politica che ti dà forza, convinzion y traverc clers, al fossa sciche n bel ciamp zenza massaries da l coltivé".
L envit va a duc, dantaldut ence ai joegn y a les joenes che vegn enviés a la senteda y a colaboré per l ben dla popolazion ladina. L auto pòn mete te garaje comunala dlongia la Cesa de Paussa. Chi dla Val Badia che vuel jì deberieda a Urtijei pò se mete en contat con Hans Trebo, tel. 3491536684.


Vos ne seis nia loghé ite. [ Loghé ite ]