benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum a souramont: les gaffes
scrit ai 30 October 2007 da les 23:27:54 da noeles

Politica

Les gaffes pro chest referendum

L president dla Generela minova de fé n scoop, ma encandenò àl fat na scleta paruda - La "colaborazion, colaborazion, colaborazion, colaborazion" aladò de Mussner - Ernesto Majoni: "Ritenete che?"

Entratant la senteda stampa sun l resultat referendar encuei dantmesdì a Bulsan à l president dla Generela, Michil Costa, volù fé n scoop, cherdan su sun l fonin l president dl govern Romano Prodi, amplifiché che duc audissa. Prodi ti à endere atira responù, descedan n vedl pregiudize che fej da tres la roda sun i ladins te nosc raions, Prodi: "Anche voi ladini andate dove ci sono i soldi". Riudes. Chest telefonat à fat la roda de duc i telejornai locai y nazionai encuei y la fajarà endoman sun duc i foliec. L'autra "gaffe" vegn dal assessour Florian Mussner che ne se stancia nia da perdiché desche n mulin de prieres tibetan, ma a paroles, che al dess vegnì colaboré, colaboré, colaboré, colaboré y rejoné, rejoné, rejoné per ascone via sie spiso al referendum. Propi en la veia dl referendum àl fat declarazions te na intervista al foliet Dolomiten sun Ampez che é vegnudes sbaujeredes a la grana dal resultat referendar a Cortina d'Ampez.

 



Mussner al foliet Dolomiten en sabeda, ai 27 de otober 2007:
Florian Mussner: Im Veneto sind 36 Orte als ladinische Gemeinden ausgewiesen worden, alles Gemeinden, die überhaupt nicht ladinisch, sondern italienisch sind. Außer Fodom und Col, das sind geschichtliche Gemeinden Ladiniens.
"D": Und Cortina?
Mussner: "Bei Cortina habe ich da schon meine Zweifel. Dort vermisse ich die kulturellen ladinischen Wurzeln. Deshalb muss man diese Einstufung rückgängig machen"
. Al essa volù ti desreconesce "tout court" la ladinité a Cortina d'Ampez. Sia moda de "colaboré, colaboré ...." y "rejoné deberieda, rejoné deberieda ....".
Per fortuna ne é chestes afermazions nia vegnudes sourantoutes da la stampa beluneisa-taliana a chela che ales ti essa dessegur dassen plajù en la veia dl referendum. En verité à Cortina d'Ampez fat pert 400 agn alalongia dl vedl Tirol (dal 1511 a la despartizion fascista dl 1923 y plu tert dal 1943-1945; de gliejia à Ampez fat pert dla diozeja de Persenon enfin al 1964). Chest vegn ence tres endò sotrissé dal president dla jonta Luis Durnwalder.
La terza gaffe, chela de Ernesto Majoni, dl grup dl no al referendum via Cortina y paladin di neo-ladins tl Beluneis, che scrivova te sie ultim jolantin "Rieccoci", partì fora puec dis dant l referendum, do avei scrit che "lité de scì é na forma de protesta, lité de no" é na forma dopla de protesta y se astegnì é enfinamai na protesta treidopla", chestes afermazions: "Ritenete di ... Appartenere storicamente, etnicamente e culturalmente alla minoranza ladina del Sudtirolo? VOTATE SI" o "Ritenete di ... essere prima di tutto Ampezzani, Cortinesi, Bellunesi, Veneti? VOTATE NO!", insinuan che "ampezan" sie valch de auter che "ladin" sudtiroleis y bonamenter con la speranza che un di doi quorums fossa ju cech. La resposta di Ampezans: entourn a 80% à declaré "SCI". Aladò dl foliet beluneis "Il Gazzettino" ne fova Majoni nia da spié en l dì dl referendum, demez en vacanzes.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum a souramont: les gaffes (ponc: 1)
da Claudio ai 31 October 2007 da les 07:44:39
(Infos sun l utilisadour | Ti mané n messaje privat)
N copion che i conescion bele: personal show, che va ben pro na maratona, ma nia te chestions tant zities.
Mìnovel che Prodi ti "garantissa" zeche, canche an ne sà nience enstes tant giut che al sarà govern. Al vegn bele rejoné de "rimpasto".



Re: Referendum a souramont: les gaffes (ponc: 1)
da marco ai 31 October 2007 da les 10:58:54
(Infos sun l utilisadour | Ti mané n messaje privat)
Le jont che an veiga se trep tai mass media êa dan le referendum nia massa da ciafé.
La telefonada a Prodi é stada na catastrofe, na gran gaffe na slopetada de revers.
Al ô ester plü serieté y manco protagonsim.



Re: Referendum a souramont: les gaffes (ponc: 1)
da Jandaniel ai 31 October 2007 da les 12:47:38
(Infos sun l utilisadour | Ti mané n messaje privat)
Na azion scicousa che ti costa credibelté a les ghiranzes ladines.



Re: Referendum a souramont: les gaffes (ponc: 1)
da Chichemei ai 31 October 2007 da les 13:51:10
(Infos sun l utilisadour | Ti mané n messaje privat)
Ntan che te duta la provinzia de Bulsan veniel audanzes per l bon ejit dl referendum di chemuns de seuramont - dala Klotz a Durnwalder, dai Verc a l Partit Democratich - fej mé l assesseur ai leures publics Florian Mussner marueia cun si detlarazions. Tla Dolomiten de n vendredi pon liejer: "Ich möchte nicht, dass morgen die Südtiroler in der Minderheit sind in einer Provinz Ladinien." Cie arà-l pa ulù di cun na tel frasa? Che n mudament dl proporz da 4 % de ladins a 5% di ladins manacia la "mendranza" tudescia? Aldò de la detlarazions de chisc dis semies belau che Durnwalder ie l assesseur per la cultura y ntendenza ladina. Ie rate che Mussner messesa dé vel spiegazions ai ladins per si teutes de posizion.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.401 seconc