N SCI che arjonj l 80% di litadours jus a lité

Al sclopa la ligreza per l resultat arjont y ence leghermes, ma dovia oréscel ence bele i festidesc coche la chestion se brodola inant

I colours "vert-blanch-brum" dla bandiera ladina dominova via n'Ampez chisc dis.

    Encandenò éla garateda saurì a Cortina. I dis 28-29 de otober 2007 dess a poura nia passé a la storia sciche n Dì de Festa di Ladins y vegnì comemorés vigni ann enfin al arjonjiment dla unité. Al ti tol ence flé a chi che minova che i ladins da souramont sie oramai "talianisés". Ma co dij l proverb: "Al veid la stela tl uedl dl auter, ma nia la tref tl sie"? Propi na gran prova de atacament a sies rajies do entourn a 90 agn sot a na provinzia che à dagnora abù puech dessourora per ei. Determinent samben ence l sostegn di ambienc economics via Cortina. La atmosfera fova dret emozioneda, sibe a Cortina che a Col y ta Fodom. Pro encontedes publiches él plu outes regorù leghermes.

    I comités da souramont a Cortina con a cef Siro Bigontina y Elsa Zardini y Eddy Demenego (comité pro-referendum), ta Fodom con Daniela Templari y Cristina Lezuo y a Col con Paola Agostini, à enjigné ca dut tl detai, sostegnus dal comité "Amisc dla Ladinia" che à operé da Bulsan enfora, ortian ite informazions, schedes y reladours a les seires tegnudes te chisc ultims meisc. I nerfs fova aboc trac. La Usc y la Union Generela se à comporté die a la longia sciche ala ne essa nia da en fé con l referendum. Al é enfinamai tomé les paroles nia da creie de "par condicio" dal diretour pro la Usc, da sia istituzion encà organ che à l fin de promueve la unité di ladins. L laour di "Amisc dla Ladinia" é sté en gran pert sun les sciables de Marco Pizzinini y Paul Videsott y n pice team de colaboradours, codaidés da esperc tl setour a d'enjigné les 9 schedes che é vegnudes partides fora a dutes les families ladines da souramont y che é stedes de gran utl, desche an pò ence lieje dai ressons sun l sit www.amiscdlaladinia.info. Da chest moment ài sapù che trueps ladins da chesta pert i veid dret de bon uedl y ti dà decuermenter l "benvegnù". I laour dl comité "Amisc dla Ladinia Unida" ne se ruva nia chilò, ma jirà inant, ti stan permez tres duta la prozedura ai comités da souramont a na moda che la chestion ne se endorme nia ite.

con dert de lita	che à lité	Che ne à nia lité	Sezion	SCI	NO	Soma dles oujes	% SCI	% NO	blances y nules	SCI minim	SCI de vantaje	% sun chi che ova l dert de lita
			1	359	149	508	70,67	29,33
			2	486	125	611	79,54	20,46
			3	540	127	667	80,96	19,04
			4	445	126	571	77,93	22,07
			5	463	134	597	77,55	22,45
			6	495	168	663	74,66	25,34
5.191	3.643	1.548	Anpezo entier	2.788	829	3.617	76,53	22,76	26	2.596	192	53,71
1.234	965	269	Fodom	834	119	953	86,42	12,33	12	618	216	67,59
403	270	133	Col	225	41	266	83,33	15,19	4	202	23	55,83
6.828	4.878	1950		3.847	989	4.836	78,86	20,27	42	3415	431	56,34