benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum a souramont: la minonga de n joen
scrit ai 18 October 2007 da les 17:53:59 da noeles

Ampez

Co la pensa pa i joegn a Ampez?  

Iacopo Sottsass ne fej degugn pronostics, ma al spera che l 100% lite de "Scí"

I son dant a na situazion referendara dret particolara. Da una na pert onse Ampez, olàche an dij che i ladins-ampezans ne sie nia plu la maioranza y che al en sie valgamia trueps da foradecà con secondes ciases che à l dert de lita y da l'autrra pert i comuns de Fodom y Col olàche an rata che i ladins sie dutaorela damprò dal 90%. Ampez à ence na storia y na identité "ladina" particolara, desche Marina Verocai scriv te n sfuei che é ence vegnù partì fora dal comité pro-referendum de Ampez.  Ampez é da l'autra pert l comun olàche an registreia la maiour convinzion referendara. Perauter él ence sté l prum comun che à dé pro la delibera te comun ai 4 de auril 2007, dant Fodom y Col. Truep peis végnel metù sun la "unificazion ladina". Ti dìjela endere valch ai ampezans de encuei? Co la pensa pa i joegn via n'Ampez? Nicol Alberti de Al Plan à intervisté n joen ampezan, Iacopo Sottsass, 28 agn, cie che el en pensa soura l referendum. D'invern féjel l maester de schi y d'isté l fever. An pò demé se fé demarevueia dla convinzion viadedò y se aodé che chesta sibe raprejentativa.

 



Cie nen rateste pa dl referendum?
 I rate che al sie la mioura ocajion che i on per cialé de mudé valch en miec.

Ciunes é pa les temes per n "scì" o per n "no" al referendum?
Temes per gauja de n "scì" ne en veidi ie nia truepes. Al se trata demé de capì desche les cosses podarà vegnì metudes a jì y sce chest referendum vegnirà veramenter tout en consciderazion da chi che governeia. Sce l "no" la sticassa me temi che al se crieia per nos na situazion enchencia y che dedò ne aronse nia plu la poscibelté de nes fé audì.

Pro les rejons prinzipales per dì eventualmenter n "scì", penseste demé a les rejons economiches o penseste che la ladinité ae via n'Ampez ciamò n valour?
I pense che la ladinité ae ciamò bendebot de valour t'Ampez che mess vegnì tramané y coltivé plu die che al é meso. Privilegs economics? I rate che an messarà dagnora y empò se regocé ite les manies.

El na desferenzia anter cie che i joegn pensa y i cherscius o atempés en rata dl referendum?
I pense de no. Poester ne é n valgugn joegn nia ciamò vegnus pro a analisé endretura la situazion te chela che i vivon, depierpul che i cherscius y i plu atempés à bele capì dadie che al é ora de mudé, ma sostanzialmenter rati che i pensiers sie i medems.

Saveise che i ladins te Sudtirol y ence l president Durnwalder fossa dret ligri de vosta anescion?
Scì, i sé de chest y al me fej dret plajei, ajache al fova sté un de mi prums pensiers canche an à metù man de rejoné concretamenter de referendum, sce i fossan benvegnus.

Cie ti damanàssei pa i joegn ampezans tl caje de anescion a Bulsan? Cie ai "fredesc" ladins?
La ghiranza é chela de avei truepa colaborazion da pert de duc a na maniera de podei cresce y mioré ciamò deplù duc adum: per n davegnì plu raient.

Ciàfiei pa i joegn ampezans de tré su na familia a Cortina?
Baudi nia duc, piec, tres demanco. I rate che al sie un di problems plu griefs che i messon pié a mans.

N pronostich referendar?
I ne feje nia pronostics, ma i spere che al sie 100% de scì!


Nicol Alberti


 
Liams emparentés
· Deplú sun l tema Ampez
· Chier te noeles


L articul plu liet te chest tema Ampez:
Aiut Alpin Anpezo: Granmarcé de cuer a Ra Regoles


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum a souramont: la minonga de n joen (ponc: 1)
da christian ai 20 October 2007 da les 09:01:53
(Infos sun l utilisadour | Ti mané n messaje privat)
Bela cösta testimonianza! Ince tröc jogn dla Val Badia y de Gherdena, dla Val de Fascia ... mo emajinei, sostegn con spirit lede le referendum.

Christian


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.431 seconc