benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum da souramont: ester o nia ester ladins
scrit ai 11 October 2007 da les 18:45:05 da noeles

Politica

L contest politich ti deura na porta nueva ai ladins

N no a la reunificazion dla Ladinia fossa n dejaster - la storia ne pitarà nia plu tant atira na tel ocajion - Plures per coche la Usc y la RAI ladina trata la chestion

Comentar

N SCI al referendum, n messaje cler ai vejins che i volon resté ladins 

L referendum é per  i ladins, per duc i ladins, na ocajion storica. La storia di ladins é dagnora vegnuda scrita dai autri, demé te pueces ocajions ài abù la poscibelté de lascé audì sia ousc, plu avisa en gaujion de de gran rosedamenc politics, sciche do les does gran veres.
Pro n referendum sàn normalmenter ciun che é l resultat, sce an dij de "scí" o de "no" y sce l "scí" la davagna o la perd. L referendum à n valour legal. Pro l referendum teritorial da souramont sàn endere demé che al se trata de na desmostrazion de "volei", ajache l iter che vegn do, sce l referendum resulteia positif, é bendebot raidous y ne depen nia plu demé da la volonté dla popolazion locala. La lege de destach messarà passé tl parlament talian (Ciamena y Senat)  y al se prejentarà problematiches nueves, desche ence l parlamentar dla SVP Karl Zeller à anunzié enier (10.10) te na intervista al Alto Adige. Ma redont chest "volei" dla popolazion di trei comuns ladins da souramont é sen dassen emportant y pont da pié via.



Tla intervista de Karl Zeller de enier  tl Alto Adige àl lascé adentene clermenter che la Svp todescia litarà per i ladins da souramont, sce la provinzia de Bulsan - do n referendum positif - vegnirà cherdeda a dé ju sie arat. I capo-partis dles mendres frazions todesces  (Union, Freiheitliche y Sudtiroler Freiheit), Pöder, Hanspeter Leiter y Eva Klotz, à tamben lascé adentene sia adejion. N sostegn ciamò plulere tiebe, méssen dé pro, che podessa endere deventé majer do n resultat referendar positif. Na situazion analoga àn tla region Friul-Venezia-Giulia oláche l president dla jonta, Riccardo Illy, se à tamben declaré a una de ti dì de scì a duc i comuns confinars furlans tl Venet che vuel passé via tl Friul.
 

Comentar ....
 ....  Do la pruma vera ova i raprejentanc di ladins prové de se paré contra la despartizion, ma ai ne é nia vegnus ascutés. Tl 1946 sun l jouf de Sela ova la jent ladina scraié adaut sia volonté de ruvé endò adum, ma ala é vegnuda sofoieda dai "sacri egoismi" dles maioranzes, chela  taliana y chela todescia,  tamben ti Tratés de Paris  che  tl Statut de autonomia per l Trentin-Sudtirol. Ma ence sce la gran enduneda sun l jouf dl Sela (messel 1946) ne ova nia arjont enlaouta n resultat concret, àla empò abù na fazion psicologica sterscia per i ladins: ala é resteda na badiera, na ispirazion, na motivazion per se bate inant per l'unité,  per ti fé vedei a les maioranzes y a les autorités locales y nazionales che nos esiston y che i volon resté ladins: Ladins sonse y Ladins restonse!
Encuei, do plu de caranta agn, onse endò na tel ocajion storica. L contest politich y l mudament dles leges per l spostament di confins ti deura na porta nueva ence ai ladins. La reunificazion deventa poscibla, ence sce la streda per ruvé a chest travert é dret erta y ne depen nia demé dai ladins ma – sciche dagnora – da la bona volonté dles maioranzes.
N scì a la reunificazion fossa dantaldut n messaje cler di ladins a se enstesc y ai vejins che i volon mantegnì nosta identité, che i volon vive inant sciche Ladins. Sce al fala n scì cler a la reunificazion é vigni politica culturala ladina nia auter che n folclorism vuet y patetich che deida pro a  la mochenisazion dla Ladinia.
N no a la reunificazion fossa n dejaster; la storia ne pitarà nia plu tant prest na tel ocajion. N no fossa n segnal de n destach definitif – politich, psicologich, cultural - de Ampez, Fodom y Col dal rest dla Ladinia, n messaje che ai renunzieia a sia identité ladina. La conseguenza  fossa che n no ti daurissa empontaut su la porta a l'assimilazion de cheles valedes al mond venet-talian. Ma ence i ladins da l'autra pert di joufs essa da perde; al vegnissa a mancé l ideal de unité che à dagnora ispiré la azion dl moviment ladin raprejenté da la Union Generela di Ladins. L prozes de desfantament dla Ladinia jissa ence da chesta pert inant tres plu snel. L resultat ne é nia rie da se imaginé, la formazion de trei bantustans o parcs naturai ladins: Fascia da una na pert, Badia y Gherdeina da l'autra pert, y plu dessegur ence chestes does valedes jissa enultima do sie troi, ma tramesdoes devers l mond todesch.
N no significassa n stop definitif a la reunificazion di ladins. La pruma fazion concreta fossa n stop a la Lia di comuns ladins. Cie significat essa  pa na lia ladina anter comuns che ne  vuel nia sté adum y se identifiché te chela merscia che ai à metù ite tla denominazion ofiziala dla Lia? Ma chest fossa demé l scomenciament dla fin. Perchel, sce i ladins vuel souravive sciche mendranza ài demé una na poscibelté: dì de scì  a la reunificazion dla Ladinia.

Dr. Erwin Valentini

Da la pert de Bulsan él tamben l "volei" - almanco en prinzip - de ti dé lum verda a la agregazion di trei comuns y de ti sté eventualmenter permez tl parlament. L parlamentar Karl Zeller é sté perauter chisc dis  firmatar de na mozion al govern talian sun les "percuisizions" di Carabiniers, piedes via da Belun, pro la senta dla Union di Ladins de Anpezo, da olàche al fova vegnù mané demez de messel material informatif.  Duc, enfinamai l president dla region Venet, Giancarlo Galan, les ova raté fora de schedra y nia giustifichedes.
Duc i segns lascia speré sun n bon resultat y n cert sostegn politich doprò: i comités pro-referendum ne essa nia ciafié da fé n laour de informazion cis miour. Ai à metù a desposizion dutes les informazions de uega partides su te 9 schedes. Samben, economicamenter, vegnissa i trei comuns a se sté miec tla region autonoma Trentin-Sudtirol y respetivamenter tla provinzia de Bulsan. Bendebot da volei creve la osservazion dl ombolt de La Val, Franz Complojer, te sia intervista enier al Alto Adige, olàche dij che al ne veid nia les "motivazions economiches" sciche na gauja da podei azeté. Se lascé dí valch de tel da ladins che à demé per sia fortuna geografica fat pert -  zenza sie merit - da empruma encà dla provinzia autonoma de Bulsan o de chela de Trent, depierpul che chi da souramont - con les medemes rejons storiches - à trat la curta per les gaujes che duc conesc (tripartizion fascista) y nia per sia colpa, ne é nia da azeté. Piec, al é na ofenuda a la memoria storica. Scemai messéssel slomené sie partì, la Svp, che ne à enlaouta (1947) nia armuet valch deplù, o dl 1964 nience, per mantegnì Ampez y Fodom almanco de gliejia pro la diozeja de Bulsan-Persenon pro chela che Fodom ova audì da tres y Ampez da feter 150 agn.

Rie y burt da se imaginé che l referendum jissa fora negativamenter. N eventual no significassa che la souc anter i ladins tla provinzia de Belun y chi tla region Trentin-Sudtirol vegnissa ciamò plu lergia a dann de duc i ladins. Chest condujessa a na folclorisazion ciamò plu sterscia de chela i on encuei. N scì deura depierpul trois y scenars nuefs, independentamenter da n destach teritorial, temporif o tardif che al sie, da la provinzia de Belun, che an se aoda samben che al suzede plu aslum che al é meso. N rai positif: l problem ne é daldut nia limité ai comuns da souramont, ma reverda na schira de comuns de confin te deplù regions tla Talia, unis da n valgugn agn tla "unione italiana dei comuni per cambio regione". L prum che à fat da deurapista é sté l comun furlan de S. Micjel al Tiliment/San Michele al Tagliamento tla planura aunejiana dl mandament de Puart/Portogruaro che á fat tomé dl 2004 a colps de sentenzes  la lege che vedova dantfora n iter de mudazion da region a region tant che imposcibel.

Tremolé endere messaràn enfin a enultima. Trueps se recorda  ciamò con n cert glai l pre-referendum da Fodom dl 1992, envié via - an mess dé pro - con na certa prescia y con na prospetiva de suzes tant che nia realistica. La situazion é encuei miec, sibe per l cheder giuridich y politich che tres la campagna de informazion y de sensibilisazion. Tres l sit de adejion www.amiscdlaladinia.info él ence vegnù trat su cenc de firmes de adejion ta Fodom y via en Ampez. Les does unions di ladins a Fodom y Ampez  ti sta do con gran convinzion y festide y ales à viadò l spinel les aministrazions comunales. Da la Val Badia él vegnù truep sostegn, adejions, dantaldut ence da pert di ombolc che se à dé ca, zenza n pez pesimé sun envit dl Comit "Amisc dla Ladinia Unida". La popolazion enstessa à sen veramenter la poscibelté de tó na dezijion do n grum de encontedes publiches y sfueis informatifs che é ruvés te vigni ciasa. La informazion ne à dessegur nia mancé, enceben che "da la Usc di Ladins y da la RAI ladina éssen podù se aspeté valch sforz en plu per promueve la chestion storica dl referendum", desche valch plura dassen.  (is)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum da souramont: ester o nia ester ladins (ponc: 1)
da Claudio ai 13 October 2007 da les 10:00:53
(Infos sun l utilisadour | Ti mané n messaje privat)
Ence a mi me paréntela dassen che ombolc tire ca les rejons economiches y les classificheia desche "gaujes pazes". Fariseism pur. Al é belunfat cie rejons che al é viadedò, dal moment che an reconesc storicamenter la Ladinia te chestes 5 valedes. Son demé contenc che rejons economiches é ence emportantes y porta pro te chest caje eventualmenter a na reunificazion.



Re: Referendum da souramont: ester o nia ester ladins (ponc: 1)
da marco ai 15 October 2007 da les 07:01:40
(Infos sun l utilisadour | Ti mané n messaje privat)
Iu sun a öna con ci che Claudio disc. Les cuestiuns economiches é emportantes y ti pormet a na mendranza ince da sconé so lingaz y söa cultura.
Ne ti vegnel nie de ince tla Val Badia y Gherdena en gran pert la usc a en partí su mat por gaujes economiches?
Cöstes é de gran ipocrisies!!!!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.380 seconc