benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum a souramont: edemes finales
scrit ai 05 October 2007 da les 18:36:35 da noeles

Politica

N salf toch y plen enseira a Cortina:per la unité ladina

Gran aplaus per l laour di comités pro-referendum - Marco Pizzinini à liet dant na letra de Durnwalder olàche al ti assegureia che al veid de bon uedl les aspirazions di ampezans y di fodoms de ruvé endò pro Sudtirol - La fioura dl referendum à ence pié ite la Val Badia: duc i ombolc deida pera

La stampa taliana, chela beluneisa en particolar, à tout su enier con gran plajei l arat negatif dla comiscion per chestions de autonomia dla provinzia de Bulsan contra la adejion di comuns vicentins dl altiplan de Asiago a la region Trentin-Sudtirol. Determinantes les oujes contrares dla Svp todescia, ma ence i partis talians - tout fora Unitalia de Donato Seppi - à dit de no. Sen passarà la chestion inant tl consei provinzial. L medem déssel enzai ence suzede con Cortina à reporté amplamenter la stampa taliana, paroles de Durnwalder, ma zenza jì ite plu avisa. Sen sàn che al ne é nia veir. Per i trei comuns ladins de souramont sta les cosses autramenter, à responù ciamò enseira l president dla jonta Luis Durnwalder. Al ti à atira asseguré ai ampezans y fodoms, anter auter ence con na letra al Comité di "Amisc dla Ladinia Unida", che i trei comuns é benvegnus te Sudtirol, samben a condizion che l referendum resulteie positif y che dut l iter ruve a conclujion.

An ne vuel endere nia se mescedé ite tla campagna referendara. Chesta é na chestion che reverda demé la jent di trei comuns, enscì Durnwalder. L troi sarà lonch y sfadious. En plu ne é l arat dla provinzia de Bulsan y de chela de Trent nia lient, ma demé orientatif per l govern a Roma che mess ti mete dant la lege de destach al parlament talian. Ciun che sarà l resultat dl referendum y cie che al suzedarà tl parlament a Roma ne él degugn che sà dampertfora. Cie che conta sen endere é n resultat referendar positif y sce ala va con na bona maioranza che ti tegn bot a dutes les critiches. L quorum dopl (maioranza + maioranza di scric ite a les listes litales) ne sarà nia tant saurì da arjonje, dantaldut nia a Cortina con na procentuala bendebot auta de jent da foradecà, talians che ne à bonamenter nia l majer enteres per chesta mudazion teritoriala, ence sce, desche valch ampezan dij: propi anter chisc él truep enteres. N aspet positif: al se trata de n referendum deberieda di trei comuns y ence l resultat vegn raté en basa ai trei comuns, perchel podessa n bon resultat ta Fodom avalivé fora oujes che mancia via en Ampez o enzescul. I litadours cherdés a les urnes: 6834, de chisc 5195 a Cortina, 1235 ta Fodom y 404 a Col Santa Lùzia. De chisc mess almanco 3418 litadours/litadoures dì de scì.
I comités pro-referendum busia y fej. Sibe dai comités sun l post che dal comité "Amisc dla Ladinia Unida" él pié via n grum de iniziatives: letres, toutes de posizion, contac con i media, chirida de sostegns politics tla provinzia de Bulsan, stampa de placac y de chertes, clupé su adejions y d'auter plu. Cuer de dutes chestes fadies: i 9 sfueis informatifs che ti é en pert bele vegnus manés fora a dutes les ciasedes de Ampez, Col y Fodom. L comité Amisc dla Ladinia à enjigné ca deberieda con i comités da souramont ti ultims meisc na lignola de 9 schedes per informé la jent sun i aspec giuridics y soziai plu emportanc che na mudazion teritoriala comportassa, dantaldut ence per cie che reverda la proporzionala y l ejam de bilinguism, con chi che i aversars ti fej tema y ciala de sprigolé da Belun su, depierpul che al é en verité brances emportantes per na mioura sconanza dla jent dl post. Sun l sit internet www.amiscdlaladinia se à registré enfin a sen entourn a 2.000 sostegnidours. Te chestes ultimes edemes vegniràl metù a jì de plu encontedes publiches per cialé de convence ence i plu pesimousc. Nia demé via en Ampez y ta Fodom, ma ence tla Val Badia ti stan do con bendebot de festide: i ombolc de duc i comuns dla Val Badia en persona jirà ta Fodom, ja Col y via en Ampez a daidé pera y ti spligarà ai ladins da souramont en pruma persona che i vantajes é cotanc, nia demé de natura economica, ma dantaldut ence per cie che reverda normes a sconanza dla mendranza ladina che é tl Beluneis damprò da nul.
Enseira él vegnù tegnù via Cortina na conferenza sun "Tera, storia, cultura y unité de n popul che ne vuel nia morì" con i reladours: Siro Bigontina, coordinadour dl comité referendar per la reunificazion dla Ladinia dl Sela, Riccardo Zanoner, vize-president dla Union Generela di Ladins dles Dolomites, Elsa Zardini, presidenta dla union di ladins de Ampez y Marco Pizzinini, coordinadour dl comité "Amisc dla Ladinia unida" che à fat de curtes relazions. Gran aplaus per Marco Pizzinini, dantaldut canche al à liet dant la letra de benvolei de Durnwalder. La sperduda dl "no" da doman sun la stampa fova steda bendebot grana. L salf fova toch y plen y an sentiva che an é ruvés a na outa. Al é sté n grum de entervenc y toutes de posizion, anter l auter da la assessoura a la cultura ladina de Ampez Paola Del Valle. Dret motivedes les esponentes dles unions di Ladins y di comités Daniela Templari (Fodom), Elsa Zardini (Ampez), Cristina Lezuo (Fodom) y Paula Agostini (Col), les 4 Catarines Lanz desche ales vegn entratant nominedes. Eles à fat pié via la cogola, se damanan de fauré dl 2007 che i comuns envieie via la prozedura de referendum per l destach teritorial da la region Venet y la agregazion a la region Trentin-Sudtirol.

La letra de Durnwalder
Traduzion tl ladin:
Stimé dot. Pizzinini,
i Ves respone a Vosta domanda, tegnan ence cont dles notizies che roda autramenter encantourn ti media. I volesse sclarì chest: L fat che la enscidita Comiscion provinziala de chestions de autonomia ae dé ju n arat negatif a l'adejion de Lamon, Asiago y d'autri comuns a la Region Trentin-Sudtirol, ne vuel die ne nia dì che tl caje de na domanda valiva da pert di trei comuns ladins de Col, Fodom y Anpezo, vegniràl tamen dé ju n arat negatif. La eventuala domanda de chisc trei comuns à na fondamenta storica. Fodom y Anpezo à audì plu de 400 alalongia, adum ai autri ladins de Sudtirol, pro l teritore dl Tirol. I comuns de Asiago y de Lamon ne à depierpul mai fat pert dla Region Trentin-Sudtirol. Personalmenter sonsi tres sté de chesta minonga y i l é ence tresfora dit: i veide con plajei les aspirazions di ladins tla provinzia de Belun de vegnì pro Sudtirol. La provinzia y la jent de Sudtirol à de bones relazions y na bona colaborazion con la jent de chisc trei comuns. I trei comuns mess endere crié enstesc les premisses giuridiches y politiches. La provinzia de Bulsan ne vuel nia se mescedé ite y ne vuel nience tré ca ghiranzes teritoriales. Te vigni caje ti diji decuermenter benvegnus ai ladins di trei comuns pro nos te Sudtirol.

Decuermenter saluda
L president dla Jonta
Dot. Luis Durnwalder


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum a souramont: edemes finales (ponc: 1)
da christian ai 05 October 2007 da les 18:51:14
(Infos sun l utilisadour | Ti mané n messaje privat)
al è sté veramonter na bela sera ennier ia Cortina d'Ampez!

Ampezagn y Cortineji`ai odü è jont der da orei bun y plegns de entusiasm!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.360 seconc