La reforma sanitara, nia dagnora a ben dl pazient

L pazient dess podei cerne te cie strutura sanitara che al vuel vegnì medié, ence fora de Sudtirol

I reladours dla seira é stés: l dot. Florian Zerzer, cef-departiment dl Assessorat a la Sanité dla Provinzia Autonoma da Bulsan , che à rejoné sun la tematica dl'organisazion y dl'aministrazion dla sanité te Sudtirol. La funzionalité y la cualité di servisc sanitars de ospedal é vegnuda trateda dal primar dla repartizion de reanimazion y anestesia dl ospedal da Bornech, dot. Marco Pizzinini, d' Al Plan de Mareo. N auter argoment enteressant é spo sté chel di debujegns y dles poscibeltés de svilup dl raion sanitar. Inant ésen jus con l referat de Fiung Franz che é ju ite sun l tema: l personal dla Azienda Sanitara, condizions y ghiranzes per ti  ofrì n bon servisc a la jent. A scluje  ju la seira de formazion y informazion él ciamò sté Renato Paratscha y Roland Thaler, che à porté dant sies esperienzes dal pont de veduda dl pazient.

Sanité: n argoment che enteresseia dagnora.

    L mede Florian Zerzer à prejenté te sia relazion l sistem sanitar nuef. Atualmenter cumpeida la provinzia de Bulsan, 8 ospedai con 24 sentes de raions sozio-sanitars. I on 250 medesc de basa y 51 medesc di mutons, 220 apoteches y 8.758 dependenc te chest setour. Chest servisc publich che vegn finanzié y aministré da la provinzia, à tresfora debujegn de mudamenc. A Bulsan él vegnù istituì n servisc nuef de let TAC, n aparat plu sofistiché per la diagnosa de certes patologies. Chest é l setour che peisa finanziaramenter l plu - enscì l dr. Zerzer.  Ben l 23% dla popolazion à malaties croniches. An ne vuel nia fé plu classes de medejina de encuei.  L mede Marco Pizzinini à rejoné te sie referat de na autra pert dla medaia dla sanité dret emportanta y plu avisa dl' organisazion di servisc sanitars. Al dij, che i scioldi ne é nia dut. Ma avisa te chest setour  vàl dassen debujegn de finanziamenc segurs y de na bona cualité y de na garanzia segura per  l pazient. L pazient à la plena rejon de se fé mané te autres strutures sanitares publiches, sce la parentela dl pazient se l ghira. Les vijites de urgenza mess vegnì fates anter 24 ores, les vijites prioritares anter 8 dis, y les autres vijites anter 30 dis. Truepa jent à l gran dejidere de morì a ciasa. La etica y la privacy é n argoment dret zite. Tl ospedal da Bornech végnel sport trueps servisc, ma te na gran pert di caji mess l pazient vegnì mené a Bulsan o Desproch.

     Anegret Rungaldier à splighé en curt la funzion dl raion sanitar. Ala dij che la colaborazion anter les repartizions de ospedal y l servisc de raion é dassen emportanta. Ala à splighé en curt cie servisc che é da abiné te raion y tles valedes. L infermier profescional Fiung Franz é ju ite te sia relazion sun l aspet sindacal di infermiers y sun l proporz di Ladins tla Azienda Sanitara te Sudtirol. Personal ladin él ti ospedai da Bornech y tl ospedal da Bulsan. L ospedal da Bornech cumpeida l 14% de personal ladin,  l ospedal da Bulsan endere nen cumpeida 8% de personal ladin.

    Per cie che reverda l personal infermieristich y sozio-assistenzial é l 35% infermiers ei y l 65% di infermiers é eles che sta gen per n cert temp a ciasa per n temp de maternité.
    Roland Thaler y Paratscha Renato à a la fin conté en curt de sies esperienzes sciche pazienc y utilisadours dl servisc sanitar. Roland Thaler à recordé l gran debujegn de deplù comunicazion anter pazient, mede y infermier. Ciamò é la comunicazion dassen scluta. Paratscha Renato d' Antermeia dij che l pazient dess vegnì daidé ence sciche persona y  che pazient ladin se sent plu daciasa sce al vegn curé y traté da sia jent. Dedò ésen passés ales domandes da pert dla jent.
    An à podù audì fora esperienzes positives. L dot. Carlo Willeit à metù a cuer na chestion dassen emportanta dantaldut per cie che reverda la chirida da pert dl pazient dles prestazions te strutures sanitares publiches convenzionedes con la provinzia de Bulsan che é da abiné tla Talia y foradecà p.ej. a Desproch. Willeit rata dret che la provinzia de Bulsan dess se aficé cotant deplù de chest vers. Carlo dij - y al é veir - che la provinzia ne vuel nia che trueps pazienc vae foradecà per prestazions sanitares. L pazient l endere dert de jì olache el rata che al sie l miour servisc per el.
Perchel apeleia Carlo Willeit  ai aministradours provinziai de chesta reforma de ti jì plu adencontra al pazient y l mené foradecà per
prestazions olàche l pazient à n miour servisc y de mioures poscibeltés y condizions de tratament per sia patotogia. Chest dess gnì finanzié deplù da la provinzia, zenza che l pazient enstes messe paié les prestazions fora de sia gaiofa. L Dr. Willeit ne veid nia massa de bon uedl la reforma nueva sanitara, dantdaldut nia l sparagné speises sun l personal y l pazient. Sce l pazient rata che les strutures  foradecà é mioures dess la provinzia o l ospedal ti dé la poscibelté da podei se ouje a les strutures publiches convenzionedes a ben dl pazient, à dit te sie entervent l dot. Carlo Willeit con gran rejon . L  pazient ne pò nia vegnì tegnì a ries te nostes strutures , ma al dess ti vegni dé la poscibelté a el da chirì fora te cie strutura publica che el vuel jì a se lascé medié ence foradecà te strutures publiches convenzionedes con Sudtirol.
rt