benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum a souramont: na tel ocajion ne saràl nia plu
scrit ai 30 September 2007 da les 18:48:37 da noeles

Politica

Jouf dl Sela 1946 y referendum ladin 2007: outa miliara

Enfin a sen à i ladins dagnora messù petlé y se adaté, ma al fossa ora che ai emparassa enstesc a deventé politicamenter plu atifs

L messel dl 1946 volova ester tla speranza de trueps ladins y ladines l meis dla outa. La gran manifestazion sun l jouf dl Sela fova n segnal sterch dla volonté di ladins de ruvé endò adum. Na tel manifestazion ne n’án mai plu vedù, na reunion de popul, de persones de dutes les valedes, persones con coscienza ladina, persones che à volù tó pert per convinzion personala y no demé ajache iscrites ite a valch Union di Ladins. Donca na manifestazion politica clera, na declarazion clera de volei ester unis, de volei conté desche grup etnich y no demé desche mendranza te na mendranza maioura, chela todescia..



    L conzet fova cler: ”Nos son ladins, enjignés a colaboré con todesc y talians, ma ladins”. Enlaouta ne fòvel nia ciamò democrazia, al fova discuscions anter i stac y vignun volova conté plu de duc i autri. I todesc de Sudtirol stova da la pert dl’Austria y conscidrova na pert di ladins, chi de Gherdeina y Badia, pro sia mendranza. La soluzion dl problem ti spetova ai gragn, vegniva dal aut. I ladins podova demé damané y prié de podei resté unis. I savon duc desche la cossa é juda. Encuei é la situazion autramenter: nos vivon tla democrazia populara olàche vigni grup etnich pò se fé audì, pò pretene si derc y souraldut defene sia identité. Ma dut chest depen da la coscienza politica dl grup etnich, da sie liam coscient interladin. La dezijion ti speta sen ai ladins enstesc, ala depen da sia volonté, da sia creta de podei ester n popul unì no demé teritorialmenter, ma ence politicamenter fajan pert de na giurisdizion soula, chela dl raion Trentin-Sudtitrol.

    Chest é l moment di Ladins, l moment dla outa miliara de sia storia. N aveniment unich, na ocajion assolutamenter nia da arjumé. Baudi trueps ladins ne veid nia ite l’emportanza dl moment storich, dla ocajion d’or per mete man de scrive na storia nueva. Per daidé la jent vedei ite l significat politich, economich, social y cultural dl referendum, végnel rejoné de vantajes y desvantajes ch’al comporta l passaje da Belun a Bulsan, ajache la jent à tema sun la segureza dl vive, sun l mantegniment dles comodités da denant, sun les relazions soziales, sun i doveis nuefs che l davegnì nes pò porté. Motivazions sceries, da tó en conscidrazion. Ma dut chest deventa secondar y saurí da superé sce an pensa dantaldut a la forza, al spirit, al entusiasm ch’al nes darà l ester finalmenter n popul unì.

    L impuls, l elan vital, la gaissa, che nes vegnirà da la outa storica sarà tant grant da nes mudé daldut. La vita soziala, l comerz, i barac de vigni sort, l maiour moviment turistich, na cultura duta nosta y con n majer certl de letours, dut chest nes fajarà vedei ite cie ch’al vuel dì ester na mendranza unida. Nos ne on mai podù comané, nes organisé a livel regional, i on tres messù damané y petlé l’autorisazion per podei fé valch a livel comunal. Nosta esperienza de organisazion, de iniziatives é demé comunala. I ne savon nia cie che al vuel dí aministré n teritore, crié n svilup turistich nuef y plu ampl, organisé a livel intercomunal manifestazions culturales y de temp lede per i turisc' y per la populazion. Enfin a sen sonse tres demé stés na esprescion dla volonté di todesc o di talians. Ester mendranza unida y coscienta de sia identité, de sie teritore, de sies tradizions architetoniches y culturales é na richeza, na bravura grana. Nos ne l on mai prové y perchel sautel fora dutes chestes tricoles y temes. I aron sen l’ocajion de nes desmostré miec ladins. Adum y deberieda féjen cotant deplù. Inant adum, no demé a paroles ma con i fac y concretamenter. Sostegnon duc deberieda l referendum de chi da Souramont per ester unis y capazesc de nos enstesc! Uc


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum a souramont: na tel ocajion ne saràl nia plu (ponc: 1)
da marco ai 30 September 2007 da les 14:50:02
(Infos sun l utilisadour | Ti mané n messaje privat)
Iu sun completamonter a öna con cösc bel articul.
Che le momont é storich por nos él ste trec co á capí, ince chi co é decuntra. Sce le referendum va fora bun, ci che nos sperun ben dassen, oi odei sce la Parlament Talian s´anfida da ji cuntra la orenté dla jont.
Sce la cosa va mal él düc l ladins co ven plü debli, ince Badioc, Gherdenes y Fasciagn.
Porchél te cöstes 4 edemes, les plü emportantes da trec agn por la Ladinia, messunse ativé vigne forza por arjunje nosc travert.
Sen o mai plü!!!!!



Re: Referendum a souramont: na tel ocajion ne saràl nia plu (ponc: 1)
da christian ai 30 September 2007 da les 18:14:15
(Infos sun l utilisadour | Ti mané n messaje privat)

por na Ladinia unida

per una Ladinia unita

für ein vereintes Ladinien

for a united Ladinia

www.amiscdlaladinia.info
"Amisc dla Ladinia unida"



Re: Referendum a souramont: na tel ocajion ne saràl nia plu (ponc: 1)
da christian ai 01 October 2007 da les 12:14:42
(Infos sun l utilisadour | Ti mané n messaje privat)
Stimês/stimades

Al foss na bona idea da meter da jì ince chesc iade na gran incuntada popolara por la Ladinia Unida.


info@amiscdlaladinia.info


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.369 seconc