benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum da souramont: oujes dla jent
scrit ai 31 August 2007 da les 18:51:39 da noeles

Fodom

La jent dij ence la sia sun www.amiscdlaladinia.info

BRUNA GRONES DA FODOM: PER RESPET DE CHI CHE NES É JUS DANTFORA Y PER AMOUR DE CHI CHE VEGN DO - PRUM FIRMATAR DI 19 OMBOLC LADINS, PEPI DEJACO DA SAN MARTIN DE TOR

Les adejions sun l sit www.amiscdlaladinia.info despassarà tost via les 800 firmes, ma l travert per l comité é cotant, cotant plu aut. An rejona de 5.000-10.000 adejions. Dlongia la adejion él ence la poscibelté de lascé valch aodanza, valch comentar o valch consei. Trueps à tout la ocajion de se fé valch pensier y de scrive ite zeche, paroles de encorajament y de aodanza, dret sentudes dantaldut da Anpezo, Fodom y Col, datrai ence scomoventes. Valch unes lascia entravedei les motivazions plu sotes che à sies raijes tla storia, tl enchersciadum, tla desperazion y tla apatia do ester vegnus metus permez aministrativamenter y de gliejia pro la provinzia de Belun che an sent dutaorela dassen foresta y dalonc. Pierina de Jan da Fodom dij: "I volesse finalmenter che nosc antenac posse paussé saurì".

L sentiment de avei na storia deberieda con duc i ladins ne é nia da souravedei ti comentars. Laura Alverà de Anpezo: "Voron tornà adùna coi nostre fardiei ladis parchè usànzes costumes,storia de 400 ane no se pò desmenteà". Denicolò M. Giacinta da Fodom se aoda: "Respet per nosta storia, amour per nosta tiera ... dijon de scí a cuor giaurì!!! O Maria Maddalena Delazer, "Nëna Francia" da Chierz, ma de ciasa encuei a Bulsan dij che: "Mie pere s'à batù sul Col de Lana tla pruma vera mondiala adum con i autri ladins per defene sia tera". Cie ingiustizia che al fova sté de vegnì metus a ries pro Belun. 

    Wilma Chizzali de Col S. Lizia enjonta: "N paisc con na gran bela storia, ma nia n gran bel davegní. N granmarcé de cuer ai " Amisc dla ladinia unida" che nes deida con chest gran vare". Lezuo Michela da Fodom miena ence: "Al é ora de se damané chi che son, zenza poura de jí olàche i audion. Nos ne son no agordins ne venezians." Per Evelina Rossi da La Plié de Fodom él tamben cler: "Al é la ultima ocajion per tré demez i confins che Mussolini à metù. Inant auna!", Bruna Grones, presidenta onorara dla union di ladins da Fodom, da La Plié: "Percie che nos volon nes tegnì strenta nosta identité ladina per RESPET a chi che nes é jus dantfora y per AMOUR de chi che vegn do!"

Stefano de Martin, ence da Fodom: "La Ladinia é sciche n gran cheder che n valgugn à destaché en toc, volonse tourné a l taché auna? Marchi Pietro da Reba dij segur: "Nos son Ladins y nos on da l desmostré. Al é da sgricé savei che n valgugn o per poura o per daudanza renegheie dut". Paroles sacrosantes da pert de Lodovica Dioli de Fascia che se aoda: "Speron che i ladins da Souramont entene l'emportanza dla dezijion che ai à da tó nia demé per ei, ma per duc i Ladins!" Stela Palla de Comune, Reba: "Plu che al passa l temp y plu me rendi cont che la despartizion dla Ladinia é sté n grief dann a nosta identité storica-linguistica-culturala y na dejolazion tla coscienza de nosta jent y tl ambient natural, da podei concé ite demé a tourné auna. Miec tert che mai! Marchione Isabella, de Reba: "Ie pense che al sie dret passé con l Aut-Adesc percie che a chesta moda nos ladins dles Dolomites nes sention plu fredesc tl condivide nostes beles tradizions y nosta storia! sciode che i ne pò nia ciamò jì a lité ...". Maurizio Chizzali da Col se aoda: "I son da Col y i spere tant che l referendum vae ben y che nos podonse s'en jí con Sudtirol". Konrad Lezuo: "I ne podon nia nes desmentié nosta storia y nosta cultura. Ladins duc adum inant". Dret truepes adejions él vegnù coiù adum te Mareo, olàche i promotours dl comité é da ciasa. Paurs, artejans y ostiers firma zenza pesimé végnel dit. L problem é demé che, dantaldut tla Val Badia, nia duc ne à internet o ne se entopa ite, perchel vegniràl abiné adum ence firmes pro manifestazions y da ciasa a ciasa.

     Pro les ultimes adejions ence cheles de n valgugn ostiers sciche chela dla familia Franz Pizzinini dl Hotel Rosa Alpina da San Ciascian y chela de Paul Wieser dla Ciasa Salares, ence da San Ciascina che dij: "La union di ladins per na majera colaborazion tl ciamp dla cultura ladina y ence tl aspet economich! Tegnì adum con fac y nia demé con paroles." Prum firmatar di 19 ombolc ladins: Pepi Dejaco da San Martin de Tor. Encorajamenc ence da foradecà, Nicola Soia, da Triest: "E' la grande occasione per i Ladini storici per confermare la loro unità, non solo col sentimento, ma con un atto civile e politico. Auguro che il referendum sia il primo passo verso la ricostituzione dell'unità amministrativo - territoriale dei Ladini del Sella."  Adejions a pion da Mareo y Val Badia, da Fodom y da Ampez, n fil da Fascia, a gotes da Gherdeina. Cie aspeta pa les unions di ladins da jí da ciasa a ciasa a prié do la adejion?


 
Liams emparentés
· Deplú sun l tema Fodom
· Chier te noeles


L articul plu liet te chest tema Fodom:
Truep entusiasm per mete su na compagnia de scizeri


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum da souramont: oujes dla jent (ponc: 1)
da Claudio ai 31 August 2007 da les 19:29:29
(Infos sun l utilisadour | Ti mané n messaje privat)
An pò plenamenter capì che la jent da souramont se sente ofenuda da certes letres plenes de fauzités y de riedés da jent de Gherdeina che fej la roda. Degugn de Gherdeina, no intendent no valch auter esponent istituzional de dovei, ne se à tout ciamò la bria de tó posizion contra chisc compaejans che ne se merita nience de se clamé "tiroleisc" che ai tol tant gen tla bocia.



Re: Referendum da souramont: oujes dla jent (ponc: 1)
da Jandaniel ai 06 September 2007 da les 17:43:20
(Infos sun l utilisadour | Ti mané n messaje privat)
Chesta dirigenza de Gherdeina (assessour, istitut, intendenza, diretour dla intendenza ..) ne funzioneia nia y dantaldut ne ala nia l dert spirit.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.368 seconc