benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum da souramont: dezijion sun l destin di ladins
scrit ai 17 August 2007 da les 22:07:39 da noeles

Politica

Referendum a souramont: lita dl destin de duc i ladins

L COMITÉ DI AMISC PER NA LADINIA UNIDA TOL POSIZION SUN LES AFERMAZIONS DE E. DEMETZ

L referendum ti trei comuns da souramont, Anpezo, Fodom y Col, se deligneia plu y plu desche na lita de destin, nia demé per i ladins da souramont, ma tamben per duta la Ladinia. I segns che l referendum jirà fora positivamenter é per fortuna dutentourn dantman. Lamon, Sovramonte y i comuns sun l altiplan de Asiago/Sleghe ti l'à fata da arjonje l cuorum dopl ghiré dal referendum teritorial, zenza avei cheles rejons storiches  fones che Anpezo, Fodom y Col à, teritores che à audì cenc d'agn pro Tirol y che se à damané plu outes de fé pert dla region Trentin-Sudtirol. I comités pro-referendum enjigna ca con busia dut l material de informazion y sun l sit www.amiscdlaladinia.info végnel clupé su damprovia adejions da dutes les pertes. L president dla provinzia de Bulsan, Luis Durnwalder, ti à da empruma encà tres endò segnalé l benvolei dla Svp todescia. L arat dl consei provinzial/regional sarà dret emportant tla seconda fasa do-referendara.

La gliejia plovanala de La Plié de Fodom do la pruma vera mondiala. I fodoms fova vegnus evacués y é arciasés te na valeda desdruta.



Al ne mancia nia valch ousc contrara. Una de chestes, chela de Erich Demetz, conesciù desche organisadour dla gara de copa dl mond te Gherdeina, se à fat audì tla Dolomiten ai 07 de aost tla rubrica "Meine Meinung" (mia minonga) con afermazions che ti à peté su a truepa jent, dantaldut a chi che conesc la storia. Al ne se trata nia plu de na critica, de na interpretazion, de rejoné enré, de loces de conescenzes storiches, ma de na defamazion dla memoria storica che ti fej n gran tort ai ladins da souramont, ai cenc de tomés tles veres. E. Demetz, member dla "regola de Gherdeina", metuda su dl 1992 deberieda con E. Dellago per laoré contra l ladin dolomitan ("Kunstsprache"), l'à ence desmeneda die alalongia contra la lista "Ladins" con na campagna de defamazion, tant die che al é vegnù pluré da Carlo Willeit n iade dant a signoria. Clera é sen la resposta dl comité "amisc dla Ladinia unida" che à splumé y sbaujeré te na touta de posizion dutes sies afermazions "storiches".

La letra dl comité:

Estrat da: Meine Meinung de E. Demetz - Dolomiten, 07.08.2007

Marco Pizzinini unterstellt der Provinz Belluno, die "gemeinsame Geschichte der Ladiner"  zu vergessen und ihren "Wunsch nach Wiedervereinigung" zu torpedieren ("Dolomiten", 26. Juli). In Wirklichkeit hat es in der Geschichte Ladiniens seit 798, als Säben und seine Pfarreien von Aquileia abgetrennt und Salzburg unterstellt wurde, weder eine politische noch eine administrative und schon gar keine kirchliche Einheit im Sinne etwa eines ladinischen Bezirkes oder Diözese wie im Kanton Graubünden gegeben. Ampezzo ist nicht
wie Tirol 1363 (mit Gröden und Abtei) freiwillig der Österreichischen Monarchie beigetreten, sondern 1511 von Kaiser Maximilian in Schutt und Asche gelegt und gewaltsam besetzt worden. Buchenstein und Cortina gehörten seither nicht zu Südtirol sondern (unfreiwillig) zur Domäne Habsburgs und zu Tirol, dessen Landeshauptstadt nicht Bozen, sondern Innsbruck war. Wer von einer Wiedervereinigung mit Südtirol oder gar von einer verloren gegangenen Einheit Ladiniens spricht, betreibt also Geschichtsfälschung.
Von diesen geschichtlichen Überlegungen abgesehen wäre es tatsächlich an der Zeit - darin bin ich mit Herrn Pizzinini einig -, nicht nur die am 28. Oktober zu einem Volksentscheid berufenen Bürger der Provinz Belluno, sondern auch die Südtiroler über den genauen Sachverhalt im Falle eines Anschlusses eines Teils der Provinz Belluno an Südtirol aufzuklären: Die Buchensteiner und Ampezzaner sollten über die verfassungsrechtlichen Folgen in bezug auf Proporz, offizielle Sprachen, Schulwesen usw. im Bild sein und die Südtiroler über die veränderte politische Gewichtung (zu Schaden der heutigen Mehrheitspartei) insbesondere in Ladinien. Es dürfte kaum zu regionalen
Grenzverschiebungen kommen, dennoch sollten die Medien einen sachlichen Beitrag leisten, nicht zuletzt um wenigen Eiferern diesseits des Falzaregos den politisch-ideologischen Nährboden zu entziehen, um den es in Wirklichkeit nur geht

Dantpertfora él da recordé che l referendum di comuns ladins d’Ampez, Col y Fodom ai 28 d’otober 2007 é bonamenter l’ultima ocajion per reunifiché la Ladinia che é despartida da passa 80 agn encà. Ma Erich Demetz sà da dì - tl spirit dla politica despotica dl „divide et impera“ di temps scurs dl passé - che chest ne sarà ben nia poscibel, ajache chisc comuns n’à mai fat pert de Sudtirol.

Enfin al 1918 jiva l Tirol da Kufstein enfin a Ala. Ence i comuns de souramont audiva samben laprò. Ma aladò de Demetz n’esistìvel deguna unité politica, aministrativa y religiousa ladina. Al se desmentia endere che tla Ladinia fòvel signories, sciche la signoria de Marou, la signoria de Selva y d’autres. Ampez y Fodom costituiva enfinamai n capitanat („Bezirkshauptmannschaft“) per sie cont. A livel de gliejia formova Marou, Fascia y Fodom l decanat „cis et ultra montes“ y fajova duc pert dla diozeja da Persenon. Tl 1814 ruvova ence Cortina pro Persenon. L vescul ausiliar Heinrich Forer per ejempl, ma ence trueps prevesc dla Val Badia é stés degans dailò. Con gran desplajei dla jent é Fodom y Ampez en l ann 1964 vegnus metus pro Belun ence de gliejia. Per protesta jiva trueps ampezans ciamò codie la domenia a Toblach a messa.
Do l 1918 é l Tirol vegnù despartì a forza y a ries. I comuns da souramont à audì enfin al ann 1923 pro Sudtirol. Empermò tl 1923 ései vegnus despartis da Sudtirol contra sia volonté. Notes de protesta, petizions y toutes de posizion di enteressés n’à jové a nia. Perchel é n referendum per na reunificazion con Sudtirol plu che giustifiché, ajache souramont à bele n iade audì laprò.
Demetz sà da conté che l imperadour Massimilian essa tl  ann 1511 desdrut Cortina. Chest n’é nia veir! Veir él endere che Massimilian à en chel ann cherdé adum la jent de Cortina sun plaza de gliejia y ne ti à nia demé confermé si derc, ma ti i à enfinamai amplié. En plu dij Demetz che i comuns d’Ampez, Col y Fodom fossa vegnus metus contra sia volonté pro Tirol. Sce ala fossa steda enscì, spo éssei ti secui dedò dessegur abù tres endò la ocajion da se fé ledesc. Ma la storia ensegna che ai ti à dagnora confermé la fedelté al Tirol: al basta demé pensé ai agn 1809, 1848, 1866. L’ann 1914 jiva fodoms y ampezans adum con i „Kaiserjäger“ tla Galizia; tl 1915 ài combatù con i „Standschützen“ con gran ardiment sun l Col de Lana y sun Sas de Stria, entratant che si paisc dessot vegniva bombardés y desdruc. A degun ampezan o fodom ne ti fóssel mai tomé ite da deserté! L Tirol da enlaouta fova idealmenter, culturalmenter, economicamenter y per cie che reverda la contreda chersciù adum tant dassen che an fova atira bogn da vedei fora l confin con l Venet a Digonera, pont de Codalongia y Dogana Vedla, ence zenza peres de termul!
Sciche n auter ejempl dla fedelté al Tirol pòn recordè con cie “entusiasm“ che les trupes talianes é vegnudes toutes ite a Cortina tl 1915. An dess ence lieje do (Luciana Palla) con cie ligreza endere che l emperadour Karl é vegnù saludé a Cortina l’ann 1917!
En cont dl „Ladin dolomitan“, à l signour Demetz samben na sia minonga. Ma duc sà che n popul con n lingaz y na cultura à demé tant inant na poscibelté de souravive, tant inant che al à ence n sie lingaz de scritura unitar. Zenza lingaz de scritura unitar vegeteia i singui idioms demé y tert o adora végnei assimilés dai gran lingac.
I messon baudi constaté che en cont dl referendum de souramont él ćiamò n gran defizit d’informazion, perchel nes onse tout dant da informé la jent – y chest dalonc da vigni influs ideologich o politich.
Dì che l passaje de Ampez, Col y Fodom a Sudtirol portassa a n descuiliber politich a dann dl partì de maioranza é, a dì puech, trat adalerch ti ciavei, ajache al é bele sen te Sudtirol deplù extracomunitars che ladins!
L benester postmodern vegnù su tres l turism met tres endò a lum temes nia giustifichedes da messei ence demé partì n pue de valch con d’autri, y chest à porté pro che la identité ladina y la volonté de na reunificaziun é pro valch conzitadins ladins baudi ormai desfanteda daldut.
L stramudament tendenzious dla storia de duc i ladins fat dal signur Demetz ti someia dassen a la contrapropaganda de chisc dis de valch om politich aunejian.

 
Per l comité “Amisc dla Ladinia unida”
Dr. Marco Pizzinini

y les firmes de duc i presidenc dles unions di ladins, dla union Generela y de Hilda Pizzinini desche presidenta onorara.

 

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum da souramont: dezijion sun l destin di ladins (ponc: 1)
da marco ai 19 August 2007 da les 10:27:03
(Infos sun l utilisadour | Ti mané n messaje privat)
Le gran problem dla unité ladina n´é nia Galan, Reolon o d´atres istituziuns nazionales.
Le gran problem é la mancianza de na identité ladina sterscia. Le sostegn dla gran pert dles istituziuns ladines é der debl. Can che ara va d´atres cuestiuns o de atres minoranzes, spo el düc co se scherza la müsa.
Mat belo da conscidré l´ipocrisia da se temei dla "italianité" dai ladins da Soramunt can che te nostes valades de Gherdena y Badia anse belo venü trepes ciases a foresti.
Les istituziuns ladines se tem da di söa minunga, se tem da ester "ladines".
Trec ladins se tem da möstré söa identité.
Püc veiga danfora les gran poscibilitês culturales y economiches de na Ladinia Unida.
Sce nos ne sun nia bogn da superé cösta debleza romagnará l´ identité ladina na lionda, y nüsc ijins dijará ennant "püri, pici ladins...".



Re: Referendum da souramont: dezijion sun l destin di ladins (ponc: 1)
da christian ai 19 August 2007 da les 12:06:53
(Infos sun l utilisadour | Ti mané n messaje privat)
Brau Marco, al è na gran poscibilité culturala y economica por i ladins da tó ei enstesc, sonza tema, so destinn tles mans

"Amisc dla Ladinia Unida"
(www.amiscdlaladinia.info)



Re: Referendum da souramont: dezijion sun l destin di ladins (ponc: 1)
da MateoTaibon ai 19 August 2007 da les 12:29:14
(Infos sun l utilisadour | Ti mané n messaje privat)
al é ben enteressant che al n'é trec co se tem da firmé n'adejiun por tó jö n tort fascist.
Dai ombolc p.e. á firmé der püc ... Can che ara jea da firmé por despartí i ladins te dui stac (nia mâ te trei provinzies), ésai stês tan snì da firmé!
Ince da Pichler-Rolle n'aldon tlo nia: can che ara jea dai todesc, trombetâl ben le "Recht auf Selbstbestimmung" de vigne popul, sen ch'ara se trata de n tort fascist cuntra la mendranza ladina él ben chît te bosch.
Mo an alada pa raboscen: al n'é de chi co s'articuleia por tigní sö cösta tripartiziun - n pert i medemi co ea ben dassenn por la "Selbstbestimmung"


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc