benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Université sezion ladina: cursc daverc a duc
scrit ai 08 August 2007 da les 21:13:58 da noeles

Cultura

La sezion ladina dla université amplieia sies propostes 

ALA PIETA ENCE N CURS DE JORNALISM CON ERWIN FRENES - ISCRIZIONS DAVERTES ENCE A PERSONES ENTERESSEDES

La repartizion ladina dla facolté de scienzes dla formazion dla université ledia de Bulsan deura si cursc ence a chi che ne é nia scric ite sciche studenc. A duc i enteressés ti végnel perchel pité la poscibelté da se lascé scrive ite a lezions singules sciche student ghest.
L prof. univ. dr. Paul Videsott, professour dla sezion ladina.
Chesta outa ensegna a la université ence dr. Lois Craffonara, svilups storics dl ladin (a man dreta).



Ejempli fora dla storia dles mudazions fonetiches dl ladin dl Sela (Codesc 12229)
Ciuldì dij pa i ladins dla Val Badia mür, dür, ma i autri ladins mur, dur; ciuldì dij pa i ladins dla Val Badia ciasa, strada, ma chi de Gherdeina cësa (cun ë, ma zënza c) y streda (con e normal), ciuldì dij pa i ladins dla Val Badia lu, ju, ma chi de Gherdeina jëuf, lëuf (scebëgn che tl talian onse -p- : lupo y -g-: giogo) y i.i.?
Dut chest à gaujes storiches. Plu avisa se tràtela de svilups particolars che l ladin à abù entratant si prest 2000 agn de svilup che l à porté dal latin ai idioms de encuei. Chest sarà l argoment dl curs de gramatica storica (de 30 ores) dl dr. Lois Craffonara, espert dl ladin dles Dolomites conesciù y renomé, che met man ai 12 d'otober 2007 y che sarà tres de vender domesdì, da les 14.00 a les 16.00.

Personalités dla Ladinia: vita, operes, influs (Codesc 13020)
Matî Ploner, Micurà de Rü, Matî Declara, Jan Batista Alton, Hugo de Rossi,  Arcangiul Lardschneider, Angelo Trebo, Jepele Frontull ... trueps ladins à audì rejonan n iade o l auter de chestes personalités, n valgugn conesc enfinamai sies operes prinzipales. Manco conesciudes é endere sies biografies, i autri laours che ai à scrit, l'influenza che ai à abù sun l lingaz y la cultura ladina. L prof. Paul Videsott rejonarà de chest te sie curs (de 30 ores) che metarà man ai 9 de otober 2007, tres de mertesc anter les 9.00 y les 11.00.


Scrive jornalistich per ladin
Tanc de nos é pa n iade vegnus damanés da scrive valch pice articul o reportaja soura na manifestazion per la stampa ladina, ma al n'é nia tant saurì... Perchel fajarà Erwin Frenes, jornalist dla redazion ladina dla RAI da Bulsan, na introduzion sun les tecniches plu emportantes che reverda l scrive jornalistich per ladin. L curs (de 15 ores) vegn tegnù vigni does edemes tl cheder dl laboratore de scritura dla facolté de scienzes dla formazion y metarà man ai 10 d'otober 2007, tres de mercui anter les 9.00 y les 11.00.

Al vegn ence pité cursc de ladin : curs de ladin scrit dla Val Badia y de Gherdeina

L'ortografia ladina ne é nia tant ria sciche ala ciala fora, ma n pue de pratica fej dagnora ben... Na tel ocajion fossa i cursc de ladin scrit dla Val Badia y de Gherdeina che vegn pités en colaborazion con l Zenter linguistich dla Université Ledia de Bulsan y che metarà man ai 25 d'otober 2007, tres de juebia domesdì anter les 16.00 y les 18.00.
Chisc cursc (de 20 ores per curs) é pensés ence per i studenc ladins che va te na 4. y 5. classa de na scola auta todescia o taliana y che à enteres da renfresché o aprofondì sies conescenzes ortografiches, souradut sce ai à intenzion da se scrive ite tla Facolté de Scienzes dla formazion. Ence d'autres persones enteressedes é decuermenter enviedes a tó pert a chisc cursc, che vegnirà tegnus dal dr. Giovanni Mischi (Ladin scrit dla Val Badia) y da la dr.a Rut Bernardi (Ladin scrit de Gherdeina).

Informazions emportantes: dutes les lezions vegnirà tegnudes a Persenon tla facolté de scienzes dla formazion y sarà per ladin. Per podei se scrive ite sciche student ghest végnel damané la matura. Informazions plu menudes soura les condizions d'iscrizion é da ciafé tl secretariat di studenc dla facolté de scienzes dla formazion (0472/012200); i formulars pò ence vegnì desciariés da internet sot a chest liam:
formulars.

Per i cursc de ladin ne vàl nia debujegn dla matura. Les iscrizions vegn toutes su diretamenter dal Zenter Linguistich (0471-012400) dai 10 d'otober  inant. Informazions plu avisa sun chisc cursc ciàfen sun les plates internet  dl Zenter Linguistich. Sie per les lezions che per i cursc de lingaz él da paié 50,00 EUR. Chesta é na tarifa particolarmenter bassa, aproveda dal consei dla université ledia de Bulsan sun proposta dl Consei de Facolté y dl dr. Theodor Rifesser, desche mesura de sostegn aposta per l grup linguistich ladin.

Informazions plu avisa sun vigni curs sciche ence sun i termins pòn ciafé dal prof. Paul Videsott ,  
paul.videsott@unibz.it .


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.359 seconc