La convenzion nueva con la RAI, dut tles steiles ciamò

L president dla jonta provinziala, Durnwalder, à abù chisc dis na enconteda con l Minister per les comunicazions Gasparri per rejoné dles trasmiscions radio-televisives publiches tla provinzia da Bulsan y la convezion nueva con la RAI. L resultat ne é nia cler: endò demé empermetudes o pòn speré che al vegne fat varesc inant per cie che reverda l ampliament dles trasmiscions ladines pro la RAI? La jent ladina é praticamenter resteda zenza n servisc publich radio-televisif a l'auteza de si debujegns, condut che ala à per prinzip y per nezescité l medem dert y i medems debujegns che i autri doi grups linguistics tla provinzia. Al contrar, n pericul nuef leva su: RAI TRE/Bis.

Deplù che valgunes empermetudes ne él endere nia vegnù a lum da la enconteda, piec, sen pérel che al sie problems tecnics de rei. An volessa trapiné les trasmiscions locales sun RAI TRE/Bis, atualmenter termeneda a n raion strent entourn Bulsan y Leifers. I ladins fossa bonamenter i prums da nen patì. Contra chesta prospetiva é ence Durnwalder che à sotlinié che les trasmiscions locales ne dessa nia vegnì cuartieredes fora sun RAI TRE/bis con n rai de rezezion cotant plu restrent. Ence la LL ti dà rejon sun chest pont a Durnwalder y se damana souraprò che l president dessa desbuté vigni acordanza con la RAI che ne veide nia dantfora n radoplament dles trasmiscions ladines tla RAI pro la convenzion nueva.