Les "Eles de neif" de Thea Blaas
LA ESPOSIZION DE THEA BLAAS TL ISTITUT LADIN A SAN MARTIN É DAVERTA ENFIN AI 6 DE AOST
Thea Blaas, artista, vize-diretoura y ensegnanta tla academia de ert de Urtijei, sporj la poscibelté de ciutié da plu cialadures te n univers de poscibeltés de vedei, a la chirida de orizonc spirituai nuefs, olàche la lum, la lerch, la esistenza y la traszendenza jia n rodul particolar. Chest é l tema de 8 laours particolars metus fora chisc dis tl istitut ladin MdR a San Martin de Tor.
Thea Blaas, la artista da Urtijei.
Thea Blaas se dà ju bele da trueps agn dantaldut con ert conzetuala. Ala laora con fotos, lum y materiai nuefs. Si laours maduresc bel plan: chedri singui vegn mudés ju lesiermenter y spo metus adum te composizions, a na moda che ai se aclareie, jendran ence contegnus nuefs.
Al se trata de na prozedura de stampa digitala dles fotografies sun Dibond. Al ti gareta enscì a la artista de abiné ite te de biei chedri de gran format les ciadeines de creps corides de neif dl Stubai, de Valongia y dl Scilier, con l uedl tresfora out al orizont dalonc demez: na joena con ciavei muec dal vent se naina y ciala encantourn te chest scenar demarevueia (sun chest gran retrat dal Scilier devers Saslonch), n pue coche an mess tresfora amplié si confins tla vita, cialé entournvia, per enrescì l nuef y na realté plu grana. La instalazion metuda permez desceida tamben assoziazions de temporarité y de ilimitazion. Felter blanch stopa l fonz: neif da jì a tola, neif con sie grum de formes, ega cristaliseda te floc, prisms y steiles glacedes. Vigni cristal raprejenteia la temporarité dl individe te sia strutura zartidla. Permez à la artista metù na raita, na metafora, per se nainé tres plu alaut enfin a che la anima giata ales y se met sun l viade, depierpul che i pensiers y les recordanzes se desfanta. Tl film video mesceida l'artista i confins tres na soura-iluminazion: la realté se desfej tl some y envieia a se archité y a pensé do na orela.
La esposizion de Thea Blaas tl salf dl Istitut Ladin a San Martin de Tor resta daverta enfin ai 6 de aost, da chest orar da les 10.00 a les 12.00 y da les 15.00 a les 19.00.
