Noeles.net - Informazion ladina - Amisc dla Ladinia / comité per la reunificazion dla Ladinia

L comité "Amisc dla Ladinia Unida"

L COMITÉ PER LA REUNIFICAZION DLA LADINIA SE PREJENTEIA Y TOL SU ONLINE ADEJIONS SOT A WWW.AMISCDLALADINIA.INFO AL REFERENDUM DA SOURAMONT - SPENULES BENVEDUDES

Ai 28 d´otober 2007 saràl i Ladins da Fodom, Col y Anpezo che tegnirà n referendum per podei endò ruvé a fé pert dla Provinzia de Bulsan. Chest é n fat storich per duta la Ladinia. La poscibelté da ruvé adum sot una na aministrazion, do da plu de 80 agn de tripartizion voluda dai fascisć, à na emportanza fondamentala per l souravive de nosta mendranza tl davegnì. Per chesta ocajion él vegnù metù su l comité “Amisc dla Ladinia Unida” per sostegnì l referendum. Al é n comité sourapartitich, metù adum da jent de dutes les valedes ladines y ence da foradecà.

L apel dl comité "Amisc dla Ladinia - Comité per la reunificazion dla Ladinia":
Nost travert é da ti dé
plen sostegn al referendum d’Anpezo, Col y Fodom per la reunificazion dla Ladinia.
Per arjonje chest travert él nosta intenzion da:

- aumenté i contac anter les valedes ladines;
- coordiné les informazions per la popolazion adum con l comité da Souramont, souraldut per cie che reverda l referendum, les prospetives y aspetatives di ladins da Souramont da fé pert dla provinzia de Bulsan. Te chest ciamp él na gran dejinformazion y perchel ence na gran melsegurté;
- tò su contac con assoziazions, movimenc y personalités politiches per chirì sostegn y colaborazion per l referendum y la unité dla Ladinia.

Nos s’auguron che i seise ence Vos n Amich/na Amica dla Ladinia y Ves damanon Vost sostegn per l ben de nosta mendranza. Chest sostegn podeise nes dé publicamenter sun nosta plata internet www.amiscdlaladinia.info , ma ence con l dé inant chestes informazions anter Vosc compagns/conescenc y tolan posizion sun i media. Per chest Ves dijonse bele sen n gran bel dilan. Tegnon adum, la forza vegn dal grum!
A inom dl comité Ves saluda
Dr. Marco Pizzinini
P.S.: sce i podessais, te chest moment storich, ence nes daidé con n sostegn finanziar, fóssel per nos n gran aiut. Per chest fin él vegnù daurì n cont aposta, intesté al “Comité Amisc dla Ladinia Unida” tla Cassa Raiffeisen/Val Badia, filiala Al Plan, ABI 08010, CAB 58550, C/C 000305021596; IBAN IT 80. Ence de chest ves ves dijonse bele segn n dilan fort!
Coordinadour: Dr. Marco Pizzinini - str. C. Lanz, 39 I-39030 Al Plan de Mareo


Vos ne seis nia loghé ite. [ Loghé ite ]