Noeles.net - Informazion ladina - N comentar al dí dla unité ladina sun jouf dl Sela

Dì dla Unité Ladina, Generela en crisa

PER FORTUNA À L ASSESSOUR LUIGI CHIOCCHETTI Y L PRESIDENT DLA COMUNANZA DE BULSAN, LEZUO IVAN, SALVÉ LA SITUAZION CON SI ENTERVENC STORICS

L’abineda dla Generela de en sabeda passeda (21.07.07) sun l jouf dl Sela é steda zenz’auter n faliment per cie che reverda la partezipazion. Ence sce l’intenzion de salvé almanco valch dles vedles manifestazions che al fova tradizion de tegní en gaujion dl Dì dla Unité Ladina, ai 14 de messel, sun l jouf dl Sela, fova positiva, méssen empò dí che l’organisazion, l enteres per la cossa y souraldut la conscidrazion dl moment storich che sta dant da nos per gauja dl referendum de chi da souramont, é francamenter vegnus manco.

L’imprescion ch’an à é chela che la Generela é dassen en crisa. Ence l debujegn de tegní clausura con i conseis dles unions dles cinch valedes dant la picera manifestazion, desmostra che la crisa é sterscia. Sce an pensa che valch consei de valeda ne à nience tout pert, spo ne pòn dessegur nia pretene che la jent saute adalerch, cis canche la manifestazion vegn anunzieda chindesc, o enfinamei demé ot dis denant. Al é cler che la jent ova bele si programs. La seira denant él sté l’abineda sun l jouf de Börz dles personalités dla Svp ladina y todescia: na enconteda de nuet, per sté adum, se la ciacolé, mangé y beive. Plu de cent persones con gran apetit y seit che ne dova nia politisé, "sondern nur das gemütliche Zusammensein im Vordergrund halten und dabei lernen, wie man die Menschlichkeit in der politischen Arbeit vermittelt” , demé fé festa y matié… y bonamenter sun l cont dl partì. N valgugn é propi fortunés.

Pro la festa fòvel samben ence l assessour Florian Mussner che l dí do fova ence sun l jouf dle Sela. Deplù persones à osservé ch’al fova scialdi content y se la riova sovenz, poester per l spetacul da la ria en confront a les truepes autorités prejentes la seira denant sun Börz. Tegnan cont de sia ligna politica ne pòn nia ti dé tort. La scleta figura la à dessegur fata n valgugn dla Generela.

Sce l spostament dl monument di Ladins é sté na bona idea, spo messòvel ence vegnì reclamisé aladò y enjigné ca autramenter. Al dí dla Maratona dles Dolomites pénsen dutalann alalongia, an fej publizité da Bulsan a Roma, per la festa dl spostament dl monument di Ladins de dutes les valedes nience chindesc dis denant y se acontenteia de fé valch telefoneda chilò y dailò. L spetacul da en sabeda sun l jouf dl Sela ti à dé l’ocajion a talians y todesc de se la rì y de coioné l spirit de unité di ladins: valch radio à dit che sce al ne fossa nia sté l cor de Soraga che ciantova, spo ne fóssel sté feter degugn. La vueia de unité di ladins à propi dé n burt ejempl con l pericul de roviné l spirit de sostegn da pert de talians y todesc per l referendum. Les vertoles per l faliment pò ester n grumon conscidran l moment di laours che é entourn via, l grumon de manifestazions bele enviedes via fora per les valedes y e.i., ma dut chest ne é deguna vertola per l puech festide per la gauja di ladins da pert dla Generela, che ne à nia ciamò vedù ite che l’era dl folclor, dl show personal é fineda.

La streda dl dialogh con i comuns y no demé con les lies de turism, indiché da les trei presidentes dles Unions da Souramont, tolan pert ativamenter a les consultes metudes adum da unions y comuns, chesta é la streda da jí y souraldut da brancé ite con la Lia di comuns ladins. Scraié fora a paroles ch’an vuel sostegnì l referendum y spo dé na tel burta imaja dla vueia de unité de duc i ladins é propi n scandal. Per fortuna à salvé la manifestazion l bel discurs dl assessour Luigi Chiocchetti, che à afronté i liams anter duc i ladins ence storicamenter recordan i documenc. Bel y entusiastich ence l discurs dl president dla Comunanza ladina a Bulsan, dr. Ivan Lezuo. (ji)