benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Dì dles mujighes a Corvara: ladin sbaufé
scrit ai 21 July 2007 da les 21:55:02 da noeles

Val Badia

De biei sons, ma ence na bela stoneda 

LADIN: AN TI DÀ PUECH VALOUR - L "VERBAND DER SÜDTIROLER MUSIKKAPELLEN" NE RESPETEIA NIA L LINGAZ DI NIA-TODESC

Na festa dles mujighes tla Val Badia a Corvara. Con l lingaz ladin emarginé. L envit, i placac, les brosciures o porí per todesch, o todesch y talian. Ma zenza ladin. Y con i responsabli che defen chesta dezijion. Sintomatich. Sintomatica ence la maniera da traté la chestion da pert di media. Al ladin ti végnel dé n mender valour. Y chi che se damana n tratament a la per, n tratament tl segn dla valivanza, fej "polemica". Chesta é la valutazion deda dant da valch dis da la Dolomiten. Sce i ladins damana l'adoranza de sie lingaz él "polemica"; sce i todesc damana l'aplicazion, él samben la rejon al lingaz dla mendranza: l "Recht auf Muttersprache" tant gonot trat ca da la Dolomiten, che fej pu gonot articui nia demé can che al fala l todesch (na rarité oramai), ma ence can che al é valch fal. Ben dret. Ciuldí n'autra valutazion can ch'ala va dl ladin (per nia rejoné dl talian): dailò vegn l "Recht auf Muttersprache " valuté sciche "polemica".



      Al vegn fat na gran festa te n paisc ladin: envic, placac, brosciures: l ladin vegn sbaufé. Pòn se imaginé che al vegnissa fat a Toblach o a Turesc na tel festa zenza l todesch? Dessegur nia. Les tofles dantfora fova per ladin, deplù ne pòn nia damané. A chel scì che an pò damané deplù. Al é ben veir: les tofles dantfora con i colours dla bandiera ladina y lassoura scrit per ladin p.e. "Mujiga de Stegen". Ma chel ne basta nia. S'acontentassa i todesc de na tel mesura? Dessegur nia. Valch paroles de salut per ladin - ence chel ne basta nia: valch paroles ladines sciche alibi ne ti tol nia ai organisadours dla manifestaziun l dovei da ti dé na lerch adegueda al lingaz ladin. Che al sie sté truepa bona volonté a mete a jì chesta festa, é da laudé, ma ne muda nia tla chestion dl lingaz dla oma sbaufé; che al sie vegnù soné "bel lingaz" ence nia: chest bel lingaz, ciuldí pa nia ti l prejenté con respet scich'al auda ai entervegnus da Puster? Ai liej y auda gen l ladin, sciche la popolarité de Trail tla valada vejina desmostra.

      L envit é ju en gran pert ai todesc? Bun argoment: olàche valch ti va con la maioranza ai talians, messessa i todesc - do chesta logica - lascé fora sie lingaz. L féjei? No, ciuldí che ai sà da se damané l respet de sie lingaz. L argoment é chel dla maioranza, nia chel dla mendranza: sc'an tol ca chest argoment, pòn lascé fora l lingaz de mendranza (unfat ciun ch'al sie) dlonch olàche n document ti va ence a la maioranza. La conseguenza de chesta logica fossa l monolinguism. Demé bon che al é persones che se lascia audí te chestions de chesta sort: zenza l amoniment n'éssen enfin encuei concuisté deguna lerch per l ladin. Y ciuldí ne podessa pa i ladins ne dì nia sce sie lingaz vegn sbaufé (da ladins enstesc), ciuldí messessa pa i ladins scuté sce sie lingaz ne ciafa nia la lerch meriteda? Ma ence sce zachei vegn critichés, ne ti tol chest nia i autri meric, desche chisc autri meric ne ti tol nia l tort dla mancianza dl ladin: La festa é steda bela y plajoula, ma ala á abù na stoneda. L cheder é te chesta chestion ben plu ampl. L "Verband Südtiroler Musikkapellen" é porì todesch, ence sie sit internet y sies comunicazions n'à deguna lerch no per l talian y no per l ladin. Co fossa mo les critiches dla Dolomiten y de d'autri sce na gran union provinziala - sostegnuda con trueps dinés dles coutes - fossa porì taliana y adorassa porí l talian? Al fossa pa ben la gran "kollektive Empörung". Pro i ladins l contrar: al é demassa indiché l defet. Al fossa gran ora da adoré por duc i medems criters. (mt)


 
Liams emparentés
· Deplú sun l tema Val Badia
· Chier te noeles


L articul plu liet te chest tema Val Badia:
Mareo per i maroi: na Talsprache nueva


Valutazion dl articul
Cumpeida mesana de oujes: 3.5
Oujes: 8


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.716 seconc