benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Zent Ladina Dolomites: les ghiranzes y les vijions dl 1946
scrit ai 18 July 2007 da les 20:56:19 da noeles

Storia

Les does animes de "Zent Ladina Dolomites"

I AMPEZANS SE DAMANA LA AUTODETERMINAZION - GUIDO IORI DE ROCIA SE DAMANA RECONESCIMENT Y SOMIEIA DE N CIANTON LADIN DLES DOLOMITES TLA PROVINZIA DE BULSAN

Mindicé pòl ester dret enteressant y de uega cialé tla storia, dantaldut te chela ladina che i conescion dret puech o dret puech avisa. Enscì éla ence pro l moviment politich ladin de "Zent Ladina Dolomites" che se formeia atira do la vera, pian via da Ampez y da Fascia. Informazion dret d'utl y tl detai vegn reportedes tl liber de Mauro Scroccaro "Guido Iori de Rocia e la grande utopia dell'unità ladina 1945-1973" (Edizions: Museo Risorgimento - Istitut Cultural Ladin - Trent 1994) che recostruesc tl menù la genesa de "Zent Ladina Dolomites". Depierpul che i esponenc ampezans é liés a la SVP y a sia ajenda politica (destach de Sudtirol con les valedes ladines da la Talia y anescion a l'Austria), porta ite Guido Iori de Rocia na lignola de ponc programatics che la fej empermò vijionara. Guido Iori de Rocia enchedra ite la situazion da enlaouta plu realisticamenter. Nia con l'Austria, ma da Roma mess i ladins giaté l reconesciment desche terz grup etnich tl contest dla autonomia regionala. Chesta plata de storia ampezana vegn completamenter ignoreda da la storiografia, n capitul de storia che mancia ence sun l sit ofizial de "Ra Regoles" de Ampez.

 



Contrat Degasperi-Gruber dl 1946 - Scialdi entorta la touta posizion de Mussner, dut sun la lingia de Degasperi per cie che reverda la chestion ladina
I obietifs de "Zent Ladina Dolomites" - Vijions mai realisedes
Zent Ladina Dolomites  - Sie spirit enier y encuei. Dl 1945 fova i ampezans dret atifs politicamenter: memorandums, jolantins, petizions - documentazion storica 
L referendum pò desdruje la utopia ladina
ma al pò ence ti dé na sburla forta a na comunanza nueva che nos conescion con l inom de Ladinia
Guido Iori de Rocia ciala de arvene "Zent Ladina Dolomites" da empruma ensù sun n troi autonom. Al é clermenter contra na politica de vasalaje dla SVP y la rata enfinamai de dann a la credibelté dles ghiranzes di ladins dant da les autorités talianes. Na autra acia é depierpul les Unions di Ladins che se formeia bel plan, empruma con la Union Culturala de Max Tosi a Maran y dedò te Gherdeina che vuel laoré dantaldut "culturalmenter", cialan de abiné ca ence valch finanziament da les autorités talianes che ti vegn ence conzedù, danz nia ajache an crei te na mendranza ladina, ma ajache an laora politicamenter per rompe la compateza di ladins con la SVP. La SVP ne veid da sia pert i ladins nia te na otica de n reconesciment sciche terz grup etnich, ma plutost sciche na chestion teritoriala y de egemonia politich-aministrativa, desche les prumes ghiranzes de "Zent Ladina Dolomites" y les traines per la scola tles valedes ladines de Badia y Gherdeina desmostra. Sies vijions vegn fora cleres tl strit scolastich dal 1945 al 1948: per i todesc se damànen con rejon na scola todescia, ma la SVP la ghira ence per i ladins.
D'auril dl 1946 nàscel via n'Ampez l prum moviment politich ladin clamé "Unione Popolare Ampezzana" che ti ortia atira a la Comiscion di Aliés a Bulsan sciche prums la ghiranza che Ampez vegne destaché da la provinzia de Belun y metù permez a la provinzia de Bulsan. Viadò chesta iniziativa politica él dantfora l dotour Sisto Ghedina y l rajonier Sisto de Bigontina. Les autorités beluneises (questura y carabiniers) i perseghiteia. An ti proibesc ence na manifestazion politica. Empermò pro na enconteda folcloristica tegnuda ai 25 de mei dl 1946 a Toblach végnel dit fora clermenter dai raprejentanc ampezans y fodoms cie che an se ghira: l dert a la autodeterminazion empera con i todesc de Sudtirol. Chest ti tira ados ai promotours ampezans les rujes dles autorités de Belun che i eticheteia desche "filo-austriacs".  Ai ti tira dant "propaganda antitaliana", "iredentism" y "sezescionism". Sisto Ghedina fova ence veramenter anter i plu atifs per na union de Ampez a la Austria y mantegn na colaborazion dret strenta con la SVP. L reconesciment di ladins desche grup etnich ne fova enlaouta per i ampezans desche per la SVP nia na chestion primara. Depierpul se muev ence Guido Iori de Rocia te Fascia con n program dassen politich. Al met su a Cianacei la "Lega Ladina Indipendente delle Dolomiti" (LILD). Anter la "Unione Popolare Ampezzana" de Sisto Ghedina y la "Lega Ladina Indipendente delle Dolomiti" él tl meteman bendebot de desferenzies , ma an tol la dezijion de unì les forzes sot a n program deberieda. Depierpul che la "Unione Popolare Ampezzana" fova lieda politicamenter a la SVP, é la LILD cotant plu autonoma te sies ghiranzes. Ai 15 de jugn dl 1946 se abina sun jouf de Frera l grup ampezan de "Unione Popolare Ampezzana" con esponenc de dutes les valedes y met en pe "Zent Ladina Dolomites". Chisc i doi ponc:
 
1) union de destin de duc i ladins tla provinzia de Bulsan de chela che ai fej pert etnicamenter, economicamenter y turisticamenter;
2) union de duc i comuns ladins a la provinzia de Bulsan, tamben dla Val de Flem (ndr: la val de Flem se ratova enlaouta ciamò en pert ladina, dantaldut Pardac, Tieser y Juian).
 
Al sauta a uedl che al ne vegn nia damané atira n reconesciment desche grup etnich a pert. Guido Iori de Rocia ne tol nia pert a chesta enconteda, ma a chela dl dì do, ai 16 de jugn dl 1946, cherdeda ite da el a inom dla LILD, tamben con esponenc de dutes les valedes con chestes ghiranzes:
 
1) reconesciment di ladins sciche terz grup etnich;
2) agregazion dles valedes de Fascia, de Fodom, de Col y de Ampez a la provinzia de Bulsan per defene miec i enteresc di ladins;
3) reconesciment a la pèr di ladins te chestions de mendranza desche prevedù per i autri grups etnics.
 
Ti dis do se enconta Guido Iori de Rocia con i esponenc ampezans, presidenziés da Sisto Ghedina via n'Ampez y ai met ju deberieda n document nuef con chestes enjontes:
 
1) reconesciment desche grup etnich ladin;
2) de fé pert entegranta dla provinzia de Bulsan y daviadechel reagregazion di comuns de Ampez, Col, de Fodom y de Fascia y de Flem a la provinzia de Bulsan;
3) destin comun con la popolazion dla provinzia de Bulsan a chela che i ladins é liés da enteresc vitai de carater economich, turistich y someies (afinités) etniches;
4) dert di ladins a stravardé y a defene te sies valedes y dlonch si enteresc. Al vegn auzé fora l reconesciment desche grup etnich.
 
Guido Iori de Rocia sourantol ence la funzion da president. Ai 14 de messel dl 1946 cherda spo ite "Zent Ladina Dolomites2 sun l jouf dl Sela la gran manifestazion storica. Sisto Ghedina (president) encondova te chesta ocajion les ghiranzes dl moviment politich. Tl comunicat végnel damané a d'enjonta di ponc dessoura, con na vijion cotant plu ampla, na sort de cianton autonom ladin pro la provinzia de Bulsan, na vijion dutaorela nia realiseda:
 
1) reconesciment ofizial desche grup etnich ladin dles Dolomites;
2) reconjonjiment de duc i ladins tla provinzia de Bulsan;
3) na zircoscrizion litala ladina
4) na aministrazion autonoma ladina;
5) reconesciment ofizial dl lingaz ladin;
6) scolines, scoles libri, zaites y sfueis ladins;
7) respet y defendura dles usanzes, dles tradizions y dles festes;
8) na pretura ambulanta;
9) n ent turistich ladin, n consorz per l comerz;
10) provedimenc contra la emigrazion di ladins;
11) trasmiscions ladines tl radio;
12) revitalisazion di toponims ladins.
 
Chisc ponc ti vegn ortiés  da Guido Iori de Rocia tres telegram al president dl Consei di Ministri Alcide Degasperi en previjion dla conferenza de pesc a Paris.
De november dl 1946 arjonj l moviment "Zent Ladina Dolomites" bendebot de suzes pro les lites comunales, 16 sun 20 scagns tl consei de comun a Ampez y 13 sun 15 tl consei de comun a Col.
 
Ai 18 de messel dl 1946 ti ortia Sisto Ghedina y Sisto de Bigontina a inom de "Zent Ladina Dolomites" n memorandum a la Conferenza de Pesc a Paris te chela che al vegniva sotligné la ghiranza de agregazion de dutes les valedes ladines sot a Bulsan y  che a Sudtirol ti vegníssel conzedù l dert a la autodezijion, en sintonia con la SVP, zenza avei damané denant Guido Iori de Rocia.  Chest y n valgunes d'autres entravegnudes, per el desplajoules, amerscia l destach gradual de Guido Iori del Rocia dal grup ampezan, raté da el massa lié a la ajenda politica dla SVP (egemonia teritoriala, politica y aministrativa sun i ladins) y enultima da "Zent Ladina Dolomites" che se desfej su. Defat ova les autorités talianes osservé avisa chisc "svilups ampezans" ratés da ei "austriacanc". Pro la conferenza de pesc a Paris se ova Alcide De Gasperi ghiré denant che rejoné con la contrapert austriaca, l minister Karl Gruber, de lascé demez i ladins completamenter. L'Austria ne se à nia emponté y à dé pro. Per ela fova demé la popolazion todescia da sconé. Defat sot a la Austria enfin al 1918 fova i ladins ofizialmenter talians (per ne irité nia i trentins). Chest fova samben na cherta de gran trionf per Alcide Degasperi y les autorités talianes da enlaouta.

 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 4.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Zent Ladina Dolomites: les ghiranzes y vijions (ponc: 1)
da christian ai 19 July 2007 da les 01:15:24
(Infos sun l utilisadour | Ti mané n messaje privat)
"Damit die Ladiner in den Dolomiten keine Angst um ihren Fortbestand haben müssen
und damit alte ladinische Gegenden auch außerhalb Südtirols selbstverständlich
Sprache und Kultur pflegen können, scheint es mir höchst an der Zeit, offen über
die sonderbaren und ziemlich willkürlichen Grenzziehungen zwischen Provinzen und
Regionen nach dem Ersten Weltkrieg zu diskutieren.

...


Es geht auch nicht darum: Sprachen der Talschaften (Dialekte) versus Ladin
dolomitan (Standard-Ladinisch) auszuspielen, also um ein "entweder-oder",
sondern - wie so oft in Leben - um ein "sowohl-als auch". Es braucht sowohl die
lebendigen Dialekte im Alltag vor Ort und als auch eine Dachsprache, vor allem
in der schriftlichen Kommunikation, bei den Medien und als Amtssprache.

...


Mitten in den Alpen liegen die Dolomiten als Weltkurlturerbe. Da leben Ladiner,
die man nicht als Biotop schützen, sondern leben und wachsen lassen soll. "

Sepp Kusstatscher, Europarlamentar


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.380 seconc