Sit internet per ladin standard - http://www.dipendenza.it o http://www.sucht.it
L'assoziazion di clubs di alcolisc' desmostra nia demé coraje tl ciamp sozial, ma ence tl ciamp cultural. Dant da puec dis él ju online la version ladina te ladin standard. Chest a desmostrazion che l servisc che vegn pité é ben de interes soura i confins dla provinzia fora.
I tolon enscì l'ocajion de splighé l servisc dla assoziazion te na maniera plu menuda. L'ativité à scomencé de dezember dl 1987 a La Ila. L'iniziativa é pieda via da Signour Degan Franz Sottara y da l'Union di Oms da La Ila. Ma determinanc per la realisazion é stés la gran convinzion, la costanza y l coraje de Costante Valentini.
Da enlaouta inant él a La Ila n club di alcolisc' en tratament. Chesta sort de terapia é vegnuda svilupeda dal psicoterapeut Vladimir Hudolin y da si colaboradours.
Al se trata de grups daverc, chest vuel dì che ai ne se scluj nia ite tla anonimité, ma che ai se deura a la comunité con dutes sies problematiches y si bujegns. La familia tol pert a la terapia de grup.
Ai 3 d'aost 1989 él vegnù daurì ofizialmenter l'Assoziazion di Clubs di Alcolisc' dla Prov. de Bulsan (APCAT-BZ). Tl ann 1990 él vegnù sotscrit na convenzion anter l'assoziazion y la Prov.Autonoma de Bulsan, convenzion che definesc les condizions de colaborazion con l Assessorat a la Sanité dla Jonta Provinziala.
Dai 2 de november 2001 inant é nosta assoziazion scrita ite tla lista dl volentariat, con decret nr. 215 dla Jonta provinziala.
Per l moment esìstel 17 clubs, con zirca 150 families. Zirca l 80% di alcolisc' é stés bogn de lascé de beive y de scomencé na vita nueva.
La finalité di clubs é chela de afronté i problems dl alcol con la colaborazion dl alcolist enstes, de sia familia y dla comunité. L club é na comunité de 2 - 12 families che s'enconta n iade a l'edema per se daidé un con l auter a afronté dutes les situazions familiares liedes al consum de alcol. Na gran importanza ti végnel dé a se destò dal beive bevandes alcoliches y a descuerje na vueia nueva de vive.
L sit á doi ponc prinzipai, tl prum giàten informazion soura l'assoziazion, les finalités di club, lista di clubs, novités y en fin na lista de liams liés al problem de alcol.
Tl secont pont (problems liés al alcol) végnel dé resposta a n grum de domandes liedes a problems de alcol, p. ej. co vegn pa l autist condizioné dal alcol? Co végnel pa mesuré l alcol tl sanch? Él na mesura segura per jì sun streda? Tant de promile él pa conzedù tla Talia y tl'Europa?
L sit internet é da giaté a la miscion http://www.dipendenza.it o http://www.sucht.it.
Assoziazion di alcolisc' en tratament dla Provinzia de Bulsan
