benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Zent Ladina Dolomites: n comentar
scrit ai 14 July 2007 da les 21:00:33 da noeles

Politica

I obietifs de Zent Ladina Dolomites:  vijions mai realisedes

ZENT LADINA DOLOMITES SE GHIROVA AI 14 DE MESSEL DL 1946 N PICE CIANTON AUTONOM LADIN - LA SVP DEPIERPUL SCOLES BLOT TODESCES PER BADIA Y GHERDEINA

I obietifs dl moviment politich "Zent Ladina Dolomites" dl 1946 fova nobli y resta dutaorela obietifs da arjonje te na politica ladina moderna. L proclam de ghiranzes sun l jouf dl Sela dl 1946 de "Zent Ladina Dolomites", de Sisto Ghedina (president), de Sisto de Bigontina (secreter), tramedoi ampezans y de Guido Iori de Rocia (Fascia), ova de gran vijions. An se damanova: l reconesciment ofizial desche grup etnich ladin dles Dolomites, union de duc i ladins sot a la provinzia de Bulsan, na zircoscrizion litala ladina, na aministrazion autonoma ladina, reconesciment ofizial dl lingaz ladin, scolines, scoles, publicazions y sfueis ladins, respet y defendura dles usanzes, dles tradizions y dles festes, na pretura ambulanta, n ent per l turism ladin, n consorz per l comerz, provedimenc contra la emigrazion di ladins, trasmiscions ladines tl radio y l respet di toponims ladins. Sisto Ghedina liej dant l proclam sun l jouf dl Sela, encuei dant a avisa 61 agn.



Contrat Degasperi-Gruber dl 1946 - Scialdi entorta la touta de posizion de Mussner, dut sun la lingia de Degasperi per cie che reverda la chestion ladina
La fin de n conflit - 10 agn do la scluta dla chestion sudtiroleisa dant a la ONU
Gino Fontana y Carlo Willeit: nos ladins messon nes enjigné enstesc nost destin
L referendum pò desdruje la utopia ladina
ma al pò ence ti dé na sburla forta a na comunanza nueva che nos conescion con l inom de Ladinia

"Zent Ladina Dolomites" colaborova enlaouta dassen con la Svp, partì todesch ence apeina metù su tla provinzia de Bulsan dl 1945, per fé tourné Ampez, Fodom y Col pro Sudtirol, ajache al é liams storics y culturai fons y ajache ala corespon dutentourn miec ai debujegns economics di ladins. Ma l moviment nasc sot a na ria steila. Les aurorités y n valgugn politics talians pèr de avei abù enlaouta na certa simpatia per i ladins y sies ghiranzes. An ne dess nia se desmentié che i ladins fova vegnus reconescius pro la cumpeida dla jent dl 1921 sot a la Talia per l prum iade sciche grup linguistich a pert, depierpul che sot a Tirol y l'Austria fòvei feter dagnora (con la soula ezezion dl 1855) vegnus cumpedés - per rejons politiches - de lingaz talian. Enscì ova i prefetours (encuei comissars dl govern) tres endò trat a consei esponenc ladins tla definizion dl statut de autonomia dl Trentin-Alto Adige. Da l'autra pert vegn "Zent Ladina Dolomites" y sie majer esponent, Sisto Ghedina, vedus da les autorités talianes desche "austriacanc y separatisc´". N colp bendebot grief a "Zent Ladina Dolomites" ti vegn propi dé da sie alié politich plu strent, la Svp, che tiza chestes temes talianes tres sia politica dla scola tla Val Badia y te Gherdeina che audiva bele aministrativamenter pro la provinzia de Bulsan: chest belavisa en chi agn dal 1945 al 1948. Per ela fova souramont - do l moto - demé na chestion teritoriala y nia "ladina". La Svp fej na propaganda mata y agressiva ite per les valedes per mete en pe na scola todescia (con l ensegnament dl lingaz talian desche tles scoles todesces samben), na cossa che fova bele enlaouta clermenter na soluzion nia azetabla per les autorités talianes che ne ova degun enteres de lascé todeschisé i ladins tres la scola. Dl 1945 fòven enfinamai piés via - sun prescion dla Svp - con na scola todescia, sceben che te n prum moment se ova n comité de plovans y de peresc de familia ghiré n sistem paritetich desche al é en doura encuei y che al fova en doura dant l fascism. Ma a la Svp ne ti scusòvel daldut nia, dantaldut nia l ensegnament dl ladin. Ala à enscì enfinamai aisé su i genitours da ne lascé nia tó pert si mutons a les lezions de ladin, ma da s'en jì da usc fora. Rejoné te n tel cheder de "mendranza ladina" unida sot a la provinzia de Bulsan fova per i talians - chel é saurì da vedei ite - rie da capì y da glotì. La Svp ti à enscì dé enlaouta na spenta politica fatala al destach y a la despartizion di comuns da souramont da la provinzia de Bulsan.

I obietifs y les vijions de "Zent Ladina Dolomites" fova y é dutaorela nobli, ma tant podòven pa ti creie enlaouta ai ladins, oben miec a la raprejentanza tla provinzia de Bulsan, che se ghirova na scola blot todescia, en pratica de ester na sort de sotgrup todesch (encuei dìjen "Minderheit in der Minderheit"). La Svp ova enlaouta enfinamai metù a jì na azion de sotescrizions, oláche ladins se declarova de lingaz todesch per avei na scola todescia. Na niazion totala di ladins donca. Vijo Pupp, esponent ladin a d'aut livel dla Svp da enlaouta y laprò dal 1945 inant, dijova ciamò dl 1969 che l lingaz ladin ne dòven nia ensegné te scola. Enfin a dl 1977 àn tegnì pro de volei mete su scoles todesces tles valedes ladines. La Svp se vertoleia dagnora fora che i "talians" ne volova nia reconesce l grup etnich ladin, ma chesta é demé mesa la verité storica, na vertola per ne vedei nia les pertes da dombrian de sia storia.

"Zent Ladina Dolomites" ova dl 1946 les idees bendebot cleres desche sie catalogh de ghiranzes encondedes sun l jouf dl Sela desmostra. Baudi é l moviment ju endalauter per gauja dles manipolazions entournvia che ne durova nia che al se formassa n moviment politich ladin. Ma la tradizion de n moviment autonom é empò juda inant can deplù, can demanco: te Fascia se àl formé la Union Autonomista Ladina (UAL) che tol ite encuei na posizion emportanta tl raport politich-aministratif con la provinzia de Trent. Tla provinzia de Bulsan él nasciù dl 1994 l Moviment Politich Ladins. Tamben ta Souramont él nasciù dl 1999 endò n moviment che meina ence do pro l referendum. La aodanza é che dutes chestes aspirazions nobles, che vegn endò da souramont sciche tl 1946, de union di ladins tres l referendum, ne vegne nia endò raitedes sot da manipolazions che ne volova enlaouta y ne vuel encuei nia ti reconesce ai ladins si derc. Al mess ester na vijion unitara dla mendranza ladina per realisé valch deplù de gre en gre. (ii)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Zent Ladina Dolomites: n comentar (ponc: 1)
da Jandaniel ai 14 July 2007 da les 23:14:39
(Infos sun l utilisadour | Ti mané n messaje privat)
De chestes cosses: jouf dl Sela dl 1946 y ei.i. ne ài mai audì valch te scola ... y al demé puec sà chestes cosses, storia ladina, ignoranza feter completa.



Re: Zent Ladina Dolomites: n comentar (ponc: 1)
da Claudio ai 14 July 2007 da les 23:19:15
(Infos sun l utilisadour | Ti mané n messaje privat)
De chel temp de storia en él puec che se recorda gen. Trueps messova empermò se desçiurnì, n prozes che dura dutaorela, bendebot lonch, ma nia tant, sce an pensa che 61 agn ne é nience la dureda de na vita de na persona mesana.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.416 seconc