La notizia dla mort de siour Fonjo Clara é ruveda adalerch enier domesdì en aiet. Ala à sperdù y ne à nia demé desconcé la popolazion de Corvara y de Colfosch, olàche al fova plovan, ma chela de duta la Val Badia. Siour Fonjo fova pu ence sté preve a Al Plan de Mareo per cotant de agn. Ai prums de setember de chest ann éssel complì i 12 agn de cura a Corvara y Colfosch.

Al fova na persona che stova gen anter jent y con i mutons y che tolova ence a pert a si juesc. Al se enteressova dles ativités de dutes les unions y duc l ova gen. L ann 1954 fòvel vegnù metù su la crousc sun l Sassongher y el l'ova fata restauré l ann passé y propi enier fòvel l prum aniversar de sia restaurazion y perchel volòvel fé na festa lassù dijan ence la Santa Messa. Te sie flucion òvel dut l nezesciar y samben bendebot de peis. A n cert moment entratant ch'ai jiva supert àl metù man de sentí mel dantcá. Sot a la piza àl messù se senté y lascé jì inant duc i autri dijan con bona luna: "I seis pa sforzés de me aspeté, ajache la messa pòi pa demé ie dí". Puech dedò él tomé da na pert ju: al ti à dé l bot. Chest é suzedù entourn a les 11.00. Siour Fonjo Clara fova nasciù ai 20 de setember dl 1940 a Lungiarü, consacré preve ai 29 de jugn dl 1964 dal vescul Gargitter, belavisa en l ann che Ampez y Fodom é vegnus destachés da la diozeja de Persenon. Al fova sté caplan a La Pli de Mareo, a Selva de Gherdeina, a Branzoll y a Naturns. Spo àl sourantout la cura de Al Plan de Mareo, dedò él sté a Sant André dlongia Persenon y dedò a Corvara y Colfosch. Cotant de agn fòvel member dl consei pastoral dla diozeja, dla comiscion dl turism y ence assistent spiritual dl servisc ai joegn dla Val Badia. Al ova 67 agn. La messa de sepoltura vegnirà tegnuda en mercui da les 14.00 a Corvara, dedò vegniràl sepolì tla cortina de Colfosch. I ti dijon dilan a siour Fonjo per sie laour tles ploanies y i prion per sia pesc.