benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum da souramont: les contra-mesures
scrit ai 07 July 2007 da les 19:19:04 da noeles

Politica

Galan, l "doge" dl Venet, manacia con na "declarazion de vera"

A RECOARO TERME ÉL VEGNÚ FIRMÉ CHISC DIS N ACORD ANTER VENET Y TRENT PER ARCHITÉ LA DEROTA REFERENDARA

La vueia y volonté ferma de trueps comuns de confin de passé la sief dal Venet al Trentin tres n referendum popolar à ativé i politics delà y decà a tó contra-mesures. Nia demé i promotours laora, ma dantaldut ence i aversars aguza "les ermes". Una de chestes é l acord firmé anter la provinzia de Trent y la region Venet ai 4 de messel a Recoaro Terme con na intenzion clera: archité la derota. L Trentin se à oblié de paié ite de sia bona te n fond per daidé finanzié operes publiches y infrastrutures ti comuns de confin. An rejona de entourn a 12 milions de euro.  Giancarlo Galan (Venet) y dlongia Lorenzo Dellai à firmé ai 4 de messel l acord de Recoaro Terme.



 

 

L sotsecreter dl govern Prodi é ruvé a Belun a prejenté sia rezeta che essa da archité la sangoneda de comuns dal Venet y de Belun dlvers dl Trentin-Sudtirol. Ala se trata de n fond perecuatif con finanziamenc statai y da pert de Trent y de Bulsan che dessessa vegnì destinés ai comuns de confin
Dellai patajeia con Galan - y ence Durnwalder podessa se plié tlafineda a dé pro de paié ite te n fond perecuatif. I ladins dess endere avei l dert de se delibré da n tort fascist che i à zaré endalauter.
Giancarlo Galan, president dla region Venet, à dit a Recoaro che l referendum criarà demé ilujions y melcontent, zenza deslié n problem y met laprò na sort de "declarazion de vera", n avertiment che la batalia sarà dura y stranciousa da pert dla region Venet: "Sce i privilegs dles provinzies/regions autonomes vegn adorés per empizé demez comuns venec y per spijé ilujions, deventaréi inflessibel y i recorarà ence a les Courtes giudiziares nazionales y internazionales. Sce chest ne suzedarà nia, spo saréi n amich dles autonomies speziales".

"L acord de cooperazion firmé a Recoaro Terme anter Venet y Trentin ne architarà nia la vueia di trei comuns ladins storics de mudé ju region", dij depierpul en resposta l ombolt de Fodom Gianni Pezzei al "Corriere delle Alpi", sotlignan che l acord anter Galan y Dellai é demé finanziar, depierpul che les rejons referendares de Ampez, Col y Fodom é storich-linguistiches, vuel dì desvalives da cheles de Lamon, Sleghe/Asiago y de d'autri comuns aunejians confinars che é blot economiches. L comun de Fodom é l soul che confineia con trames les provinzies, chela de Trent y chela de Bulsan, y perchel tómel ite tl raion de acord anter Venet y Trent. Ma l ombolt Pezzei ne à nia tout pert a la enconteda de Recoaro, per coerenza, a na moda che an ne dijessa nia: "Ciala ciala medré, olàche al é tof da scioldi rùvei".

Entratant còel bele certes "poures" da d'autres pertes, da la merca "Sudtirol". La Südtiroler Wirtschaftszeitung "SWZ" scriv te sia ultima edizion che na inclujion de Ampez, Fodom y Col tla provinzia de Bulsan condujessa a la costituzion de na "Gran Ladinia" che se ghirassa enuncheltant na "sub-autonomia", ma, enscì ironiseiela la chestion, la probabelté é tant grana desche la reunificazion todescia entratant la vera freida.

La Union Generela (UGLD) che se damana da dagnora la unificazion di ladins sot a un n tet aministratif. Te na enconteda con l assessour regional Luigi Chiocchetti dantenier a Urtijei se baudien dles finanzes dla Usc,ma an planificheia depierpul la edizion de na revista trimestrala nueva, pruma edizion de setember, dal inom "Gana" che se ghira samben finanziamenc y persones che ti sta do. "Razionalisé la Usc y investin tl sit on-line, fossa poester n miour investiment", miena na ousc critica. La unité linguistica dess dantaldut vegnì promueta tres l ladin standard.

glossar
derota = "Ausbruch",  "emoraggia" (ma "derot ite tl laour" = emparé ite ben n laour)

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum da souramont: les contra-mesures (ponc: 1)
da christian ai 08 July 2007 da les 09:53:13
(Infos sun l utilisadour | Ti mané n messaje privat)
Chёl sce po ester, che chi co à la poscibilité po orёi se sposté te na tera olache economicamonter se stan miù.
La chestiun è che ći che dess podёi lié adöm è dać y liams storics.
Da capì edl inće, che sce an è bogn, dailò fossl da daidé chi co se stà economicamonter manco bun co nos. Iolan



Re: Referendum da souramont: les contra-mesures (ponc: 1)
da marco ai 08 July 2007 da les 10:28:34
(Infos sun l utilisadour | Ti mané n messaje privat)
An veiga endô en iade che jont foresta ô to tles mans le destin dai Ladins. Ince la miu colauraziun danter les trei provinzies (BZ, TN y BL) orüda da Galan, Mussner & Co. é mat na püra consolaziun. Cösta jont se tem dla unité dla Ladinia, ciodi che tle cösta unité él en gran potenzial economich y cultural co podess desturbé certes categories y lobbies.
Mat l´unité dles valades se dará la forza da to nos tles mans nosc dagní. Ju m´aodi che trec veighi ete cösta cosa.



Re: Referendum da souramont: les contra-mesures (ponc: 1)
da Claudio ai 08 July 2007 da les 11:51:38
(Infos sun l utilisadour | Ti mané n messaje privat)
Sce ie fossa pro la USC ti essi bele atira metù ite na plata entiera per cherdé a fé na spenula per l referendum. Ence na tel azion pò endespré y scassé su enteres. Sce i nes ston bele tant ben desche christian dij, messessa redont i ladins dé ca valch. Tla ultima Usc ne éi vedú nia de dut chest? A chi dla USC: metede ite na plata entiera da sen inant per daidé l comité a cueie adum finanzes!!!!!!!!!!!!!!!!



Re: Referendum da souramont: les contra-mesures (ponc: 1)
da Jandaniel ai 08 July 2007 da les 13:33:57
(Infos sun l utilisadour | Ti mané n messaje privat)
Ie me imagineie ence che al volarà ester bendebot de campagna de informazion, nia demé per ampezans y fodoms, ma a 380 gres, dantaldut ence sun foliec nazionai canche la chestion essa da passé al parlament. Entratant sun l Gazzettino y l Corriere delle Alpi per splighé en curt les rejons clef dl referendum. I savon duc plates entieres sun chisc foliec à bendebot de cost, ma an dess fé dut cie che an pò fé y per fé chest vuelel ester mesums finanziars. La Usc dess jì dantfora con na tel campagna. Ie creie che l parlament a Roma ne podarà nia dì de nò a na esprescion democratica y benfondeda.



Re: Referendum da souramont: les contra-mesures (ponc: 1)
da medo ai 09 July 2007 da les 10:24:52
(Infos sun l utilisadour | Ti mané n messaje privat)
Conscidrenn la situazion, edl de morveia che Aunejia se armeri empormò sen. Massa tardì? O cuestiuns burocratiches? O magari conscideraziuns strategiches? Ch'al ne foss nia döt mat jü saorì da sù dô l'ega fora ea ben belo cumpedè laprò - la cossa che nosta pert (chera pro referendum) ne à nia fat cina sen, do mia minonga, è chera da identifichè les maius figöres contraries al referendum y les modalites che cöstes arà por dejturbè le prozess referendar. Ci co ne è nia cia`mò der da odei è na strategia.



Re: Referendum da souramont: les contra-mesures (ponc: 1)
da christian ai 13 July 2007 da les 00:42:29
(Infos sun l utilisadour | Ti mané n messaje privat)
Chel sce, la gran sbürla mess gnì dal Parlament talian.
Al foss, tan ennant che ara va, da sensibilisé l'minister ala cultura, Francesco Rutelli! Söa parora po ester emportanta. Dantadöt te n discurs storich cultural co portass a löm les rajuns fondamentales por porté ennant le "io" pro le referendum y tal iter istituzional co gnarà dedô..


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.398 seconc