Dialogh con la Lista LADINS sun statut y normes de atuazion, lege litala, referendum, proporz y trilinguism, université ne ti interesseia nia al Assessorat Ladin
La Lista LADINS fossa steda interesseda de envié via do la cherdeda de Florian Mussner a assessour n dialogh costrutif sun chestions che reverda na mioura y majera sconanza per dl grup etnich ladin. A chest fin ti fòvel ence vegnù sourandé n catalogh de ponc sun chi che al fossa sté debujegn de giaté n consens: statut y normes de atuazion, lege litala, referendum, proporz, trilinguism, université y e.i. ma no l partì Svp, no l assessour à desmostré interes y desponibelté concreta. Sun l retrat: dr. Giovanni Mischi, president dla LL.
Ciamò dant la cherdeda de Florian Mussner, ai 18 de fauré 2001, ti ova l president dla Lista LADINS, Giovanni Mischì, scrit deplù iadesc a Mussner y a la Svp, damanan che la cherdeda de n assessour ladin da foradecà vegnissa te vigni caje concordeda con duc i interessés y dantaldut con la raprejentanza ladina ofiziala tl Consei liteda democraticamenter, a na moda che les relazions essa podù ester dal scomenciament inant costrutives. Deguna ressonanza. Conseguenza: n raport con puech y degun dialogh dal scomenciament inant. Empò él tres endò vegnù proé de arjonje valch contat: de fauré dl 2002, dant la debata dla lege sun l referendum damana la Lista LADINS Mussner do n'enconteda per rejoné di interesc di ladins tla chestion, ma Mussner ne se lascia nia audì. Permò valgugn meisc plu tert, ai 11 de messel dl 2002, rùvel adalerch n envit, chest iade da pert de Mussner, y al vegn ence fat fora n dì y na ora, ai 20.07.2002 sun Jouf de Frera, ma con gran marevueia dla Lista "Ladins" vegn l terminn desdit puech denant, ma empermetù da l tré do tl temp de 10 dis. Degugn ne se lascia plu adentene. La cossa deventa ciamò plu entorta y misteriousa canche valgugn meisc dedò te na intevista alf foliet "Dolomiten", ai 19.12.2002, ti dà Mussner la gauja a la Lista LADINS de ne ester nia daverta al dialogh. Sun chesta ti à l president dla Lista LADINS, Mischì Giovanni, endò ortié n envit a Mussner y ence al vizeobmann dla Svp Pepi Dejaco, renovan la desponibelté a na enconteda. Tla letra végnel fat la proposta de fissé na data deberieda tles prumes does edemes de fauré. Al é ence vegnù fat n valgunes telefonedes, ma enchin a encuei ne n'é Mussner nia ju ite sun l'envit te na forma ofiziala, enscì nience Dejaco, l vize-obmann. Degugn ne sà avisa ciunes che é les gaujes che blocheia l'assessorat ladin a jì ite n dialogh con esponenc dla lista LADINS, la soula raprejentanza ladina tl Consei, sun tematiches che reverda damprò l grup etnich ladin. Al intern dla Svp ladina n'él de chi che miena che al sie bendebot de presciuns internes da pert de esponenc Svp de Gherdeina, dagnora stés plu contrars a formes de daurida. La situazion ne n'é per la LL nia cis plajoula: entratant pò Mussner sciche assessour ai laours publics fé chilò y dailò empermetudes de sostegnì valch laour o projet ti paisc, s'enjigné ca l bonus da assessour.Y de november saràl les lites.
